๙. นวมวคฺโค

๘๑. ‘‘ยํ มยา ปกตํ ปาปํ, ปุพฺเพ อญฺญาสุ ชาติสุ;

อิเธว ตํ เวทนียํ, วตฺถุ อญฺญํ น วิชฺชตี’’ติ.

… สมิติคุตฺโต เถโร….

๘๒. ‘‘เยน เยน สุภิกฺขานิ, สิวานิ อภยานิ จ;

เตน ปุตฺตก คจฺฉสฺสุ, มา โสกาปหโต ภวา’’ติ.

… กสฺสโป เถโร….

๘๓. ‘‘สีหปฺปมตฺโต วิหร, รตฺตินฺทิวมตนฺทิโต;

ภาเวหิ กุสลํ ธมฺมํ, ชห สีฆํ สมุสฺสย’’นฺติ.

… สีโห เถโร….

๘๔. ‘‘สพฺพรตฺตึ สุปิตฺวาน, ทิวา สงฺคณิเก รโต;

กุทาสฺสุ นาม ทุมฺเมโธ, ทุกฺขสฺสนฺตํ กริสฺสตี’’ติ.

… นีโต เถโร….

๘๕. ‘‘จิตฺตนิมิตฺตสฺส โกวิโท, ปวิเวกรสํ วิชานิย;

ฌายํ นิปโก ปติสฺสโต, อธิคจฺเฉยฺย สุขํ นิรามิส’’นฺติ.

… สุนาโค เถโร….

๘๖. ‘‘อิโต พหิทฺธา ปุถุ อญฺญวาทินํ, มคฺโค น นิพฺพานคโม ยถา อยํ;

อิติสฺสุ สงฺฆํ ภควานุสาสติ, สตฺถา สยํ ปาณิตเลว ทสฺสย’’นฺติ.

… นาคิโต เถโร….

๘๗. ‘‘ขนฺธา ทิฏฺฐา ยถาภูตํ, ภวา สพฺเพ ปทาลิตา;

วิกฺขีโณ ชาติสํสาโร, นตฺถิ ทานิ ปุนพฺภโว’’ติ.

… ปวิฏฺโฐ เถโร….

๘๘. ‘‘อสกฺขึ วต อตฺตานํ, อุทฺธาตุํ อุทกา ถลํ;

วุยฺหมาโน มโหเฆว, สจฺจานิ ปฏิวิชฺฌห’’นฺติ.

… อชฺชุโน เถโร….

๘๙. ‘‘อุตฺติณฺณา ปงฺกปลิปา, ปาตาลา ปริวชฺชิตา;

มุตฺโต โอฆา จ คนฺถา จ, สพฺเพ มานา วิสํหตา’’ติ.

… เทวสโภ เถโร….

๙๐. ‘‘ปญฺจกฺขนฺธา ปริญฺญาตา, ติฏฺฐนฺติ ฉินฺนมูลกา;

วิกฺขีโณ ชาติสํสาโร, นตฺถิ ทานิ ปุนพฺภโว’’ติ.

… สามิทตฺโต เถโร….

วคฺโค นวโม นิฏฺฐิโต.

ตสฺสุทฺทานํ –

เถโร สมิติคุตฺโต จ, กสฺสโป สีหสวฺหโย;

นีโต สุนาโค นาคิโต, ปวิฏฺโฐ อชฺชุโน อิสิ;

เทวสโภ จ โย เถโร, สามิทตฺโต มหพฺพโลติ.