๑๐. ทสมวคฺโค

๑. ปริปุณฺณกตฺเถรคาถา

๙๑. ‘‘น ตถา มตํ สตรสํ, สุธนฺนํ ยํ มยชฺช ปริภุตฺตํ;

อปริมิตทสฺสินา โคตเมน, พุทฺเธน เทสิโต ธมฺโม’’ติ.

… ปริปุณฺณโก เถโร….

๒. วิชยตฺเถรคาถา

๙๒. ‘‘ยสฺสาสวา ปริกฺขีณา, อาหาเร จ อนิสฺสิโต;

สุญฺญตา อนิมิตฺโต จ, วิโมกฺโข ยสฺส โคจโร;

อากาเสว สกุนฺตานํ, ปทํ ตสฺส ทุรนฺนย’’นฺติ.

… วิชโย เถโร….

๓. เอรกตฺเถรคาถา

๙๓. ‘‘ทุกฺขา กามา เอรก, น สุขา กามา เอรก;

โย กาเม กามยติ, ทุกฺขํ โส กามยติ เอรก;

โย กาเม น กามยติ, ทุกฺขํ โส น กามยติ เอรกา’’ติ.

… เอรโก เถโร….

๔. เมตฺตชิตฺเถรคาถา

๙๔. ‘‘นโม หิ ตสฺส ภควโต, สกฺยปุตฺตสฺส สิรีมโต;

เตนายํ อคฺคปฺปตฺเตน, อคฺคธมฺโม [อคฺโค ธมฺโม (สี.)] สุเทสิโต’’ติ.

… เมตฺตชิ เถโร….

๕. จกฺขุปาลตฺเถรคาถา

๙๕. ‘‘อนฺโธหํ หตเนตฺโตสฺมิ, กนฺตารทฺธานปกฺขนฺโท [ปกฺขนฺโน (สี.), ปกฺกนฺโต (สฺยา. สี. อฏฺฐ.)];

สยมาโนปิ คจฺฉิสฺสํ, น สหาเยน ปาเปนา’’ติ.

… จกฺขุปาโล เถโร….

๖. ขณฺฑสุมนตฺเถรคาถา

๙๖. ‘‘เอกปุปฺผํ จชิตฺวาน, อสีติ [อสีตึ (สี.)] วสฺสโกฏิโย;

สคฺเคสุ ปริจาเรตฺวา, เสสเกนมฺหิ นิพฺพุโต’’ติ.

… ขณฺฑสุมโน เถโร….

๗. ติสฺสตฺเถรคาถา

๙๗. ‘‘หิตฺวา สตปลํ กํสํ, โสวณฺณํ สตราชิกํ;

อคฺคหึ มตฺติกาปตฺตํ, อิทํ ทุติยาภิเสจน’’นฺติ.

… ติสฺโส เถโร….

๘. อภยตฺเถรคาถา

๙๘. ‘‘รูปํ ทิสฺวา สติ มุฏฺฐา, ปิยํ นิมิตฺตํ มนสิกโรโต;

สารตฺตจิตฺโต เวเทติ, ตญฺจ อชฺโฌส ติฏฺฐติ;

ตสฺส วฑฺฒนฺติ อาสวา, ภวมูโลปคามิโน’’ติ [ภวมูลา ภวคามิโนติ (สี. ก.)].

… อภโย เถโร….

๙. อุตฺติยตฺเถรคาถา

๙๙. ‘‘สทฺทํ สุตฺวา สติ มุฏฺฐา, ปิยํ นิมิตฺตํ มนสิกโรโต;

สารตฺตจิตฺโต เวเทติ, ตญฺจ อชฺโฌส ติฏฺฐติ;

ตสฺส วฑฺฒนฺติ อาสวา, สํสารํ อุปคามิโน’’ติ.

… อุตฺติโย เถโร….

๑๐. (ทุติย)-เทวสภตฺเถรคาถา

๑๐๐. ‘‘สมฺมปฺปธานสมฺปนฺโน, สติปฏฺฐานโคจโร;

วิมุตฺติกุสุมสญฺฉนฺโน, ปรินิพฺพิสฺสตฺยนาสโว’’ติ.

… เทวสโภ เถโร….

วคฺโค ทสโม นิฏฺฐิโต.

ตสฺสุทฺทานํ –

ปริปุณฺณโก จ วิชโย, เอรโก เมตฺตชี มุนิ;

จกฺขุปาโล ขณฺฑสุมโน, ติสฺโส จ อภโย ตถา;

อุตฺติโย จ มหาปญฺโญ, เถโร เทวสโภปิ จาติ.