๑๑. เอกาทสมวคฺโค

๑๐๑. ‘‘หิตฺวา คิหิตฺตํ อนโวสิตตฺโต, มุขนงฺคลี โอทริโก กุสีโต;

มหาวราโหว นิวาปปุฏฺโฐ, ปุนปฺปุนํ คพฺภมุเปติ มนฺโท’’ติ.

… เพลฏฺฐานิโก เถโร….

๑๐๒. ‘‘มาเนน วญฺจิตาเส, สงฺขาเรสุ สํกิลิสฺสมานาเส;

ลาภาลาเภน มถิตา, สมาธึ นาธิคจฺฉนฺตี’’ติ.

… เสตุจฺโฉ เถโร….

๑๐๓. ‘‘นาหํ เอเตน อตฺถิโก, สุขิโต ธมฺมรเสน ตปฺปิโต;

ปิตฺวา [ปีตฺวาน (สี. สฺยา.)] รสคฺคมุตฺตมํ, น จ กาหามิ วิเสน สนฺถว’’นฺติ.

… พนฺธุโร [พนฺธโน (ก.)] เถโร….

๑๐๔. ‘‘ลหุโก วต เม กาโย, ผุฏฺโฐ จ ปีติสุเขน วิปุเลน;

ตูลมิว เอริตํ มาลุเตน, ปิลวตีว เม กาโย’’ติ.

… ขิตโก เถโร….

๑๐๕. ‘‘อุกฺกณฺฐิโตปิ น วเส, รมมาโนปิ ปกฺกเม;

น เตฺววานตฺถสํหิตํ, วเส วาสํ วิจกฺขโณ’’ติ.

… มลิตวมฺโภ เถโร….

๑๐๖. ‘‘สตลิงฺคสฺส อตฺถสฺส, สตลกฺขณธาริโน;

เอกงฺคทสฺสี ทุมฺเมโธ, สตทสฺสี จ ปณฺฑิโต’’ติ.

… สุเหมนฺโต เถโร….

๑๐๗. ‘‘ปพฺพชึ ตุลยิตฺวาน, อคารสฺมานคาริยํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติ.

… ธมฺมสโว เถโร….

๑๐๘. ‘‘ส วีสวสฺสสติโก, ปพฺพชึ อนคาริยํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติ.

… ธมฺมสวปิตุ เถโร….

๑๐๙. ‘‘น นูนายํ ปรมหิตานุกมฺปิโน, รโหคโต อนุวิคเณติ สาสนํ;

ตถาหยํ วิหรติ ปากตินฺทฺริโย, มิคี ยถา ตรุณชาติกา วเน’’ติ.

… สงฺฆรกฺขิโต เถโร….

๑๑๐. ‘‘นคา นคคฺเคสุ สุสํวิรูฬฺหา, อุทคฺคเมเฆน นเวน สิตฺตา;

วิเวกกามสฺส อรญฺญสญฺญิโน, ชเนติ ภิยฺโย อุสภสฺส กลฺยต’’นฺติ.

… อุสโภ เถโร….

วคฺโค เอกาทสโม นิฏฺฐิโต.

ตสฺสุทฺทานํ –

เพลฏฺฐานิโก เสตุจฺโฉ, พนฺธุโร ขิตโก อิสิ;

มลิตวมฺโภ สุเหมนฺโต, ธมฺมสโว ธมฺมสวปิตา;

สงฺฆรกฺขิตตฺเถโร จ, อุสโภ จ มหามุนีติ.