๑๒. ทฺวาทสมวคฺโค

๑๑๑. ‘‘ทุปฺปพฺพชฺชํ เว ทุรธิวาสา เคหา, ธมฺโม คมฺภีโร ทุรธิคมา โภคา;

กิจฺฉา วุตฺติ โน อิตรีตเรเนว, ยุตฺตํ จินฺเตตุํ สตตมนิจฺจต’’นฺติ.

… เชนฺโต เถโร….

๑๑๒. ‘‘เตวิชฺโชหํ มหาฌายี, เจโตสมถโกวิโท;

สทตฺโถ เม อนุปฺปตฺโต, กตํ พุทฺธสฺส สาสน’’นฺติ.

… วจฺฉโคตฺโต เถโร….

๑๑๓. ‘‘อจฺโฉทิกา ปุถุสิลา,โคนงฺคุลมิคายุตา;

อมฺพุเสวาลสญฺฉนฺนา, เต เสลา รมยนฺติ ม’’นฺติ.

… วนวจฺโฉ เถโร….

๑๑๔. ‘‘กายทุฏฺฐุลฺลครุโน, หิยฺยมานมฺหิ [หียมานมฺหิ (สี.)] ชีวิเต;

สรีรสุขคิทฺธสฺส, กุโต สมณสาธุตา’’ติ.

… อธิมุตฺโต เถโร….

๑๑๕. ‘‘เอสาวหิยฺยเส ปพฺพเตน, พหุกุฏชสลฺลกิเกน [สลฺลกิเตน (สี.), สลฺลริเกน (สฺยา.)];

เนสาทเกน คิรินา, ยสสฺสินา ปริจฺฉเทนา’’ติ.

… มหานาโม เถโร….

๑๑๖. ‘‘ฉผสฺสายตเน หิตฺวา, คุตฺตทฺวาโร สุสํวุโต;

อฆมูลํ วมิตฺวาน, ปตฺโต เม อาสวกฺขโย’’ติ.

… ปาราปริโย [ปาราสริโย (สี.), ปารํปริโย (ก.)] เถโร ….

๑๑๗. ‘‘สุวิลิตฺโต สุวสโน,สพฺพาภรณภูสิโต;

ติสฺโส วิชฺชา อชฺฌคมึ, กตํ พุทฺธสฺส สาสน’’นฺติ.

… ยโส เถโร….

๑๑๘. ‘‘อภิสตฺโตว นิปตติ, วโย รูปํ อญฺญมิว ตเถว สนฺตํ;

ตสฺเสว สโต อวิปฺปวสโต, อญฺญสฺเสว สรามิ อตฺตาน’’นฺติ.

… กิมิโล [กิมฺพิโล (สี. สฺยา.)] เถโร….

๑๑๙. ‘‘รุกฺขมูลคหนํ ปสกฺกิย, นิพฺพานํ หทยสฺมึ โอปิย;

ฌาย โคตม มา จ ปมาโท, กึ เต พิฬิพิฬิกา กริสฺสตี’’ติ.

… วชฺชิปุตฺโต เถโร….

๑๒๐. ‘‘ปญฺจกฺขนฺธา ปริญฺญาตา, ติฏฺฐนฺติ ฉินฺนมูลกา;

ทุกฺขกฺขโย อนุปฺปตฺโต,ปตฺโต เม อาสวกฺขโย’’ติ.

… อิสิทตฺโต เถโร….

วคฺโค ทฺวาทสโม นิฏฺฐิโต.

ตสฺสุทฺทานํ –

เชนฺโต จ วจฺฉโคตฺโต จ, วจฺโฉ จ วนสวฺหโย;

อธิมุตฺโต มหานาโม, ปาราปริโย ยโสปิ จ;

กิมิโล วชฺชิปุตฺโต จ, อิสิทตฺโต มหายโสติ.

เอกกนิปาโต นิฏฺฐิโต.