๘. อฏฺฐมวคฺโค

๗๑. ‘‘สุสุขุมนิปุณตฺถทสฺสินา, มติกุสเลน นิวาตวุตฺตินา;

สํเสวิตวุทฺธสีลินา [สํเสวิตพุทฺธสีลินา (ก.)], นิพฺพานํ น หิ เตน ทุลฺลภ’’นฺติ.

… วจฺฉปาโล เถโร….

๗๒. ‘‘ยถา กฬีโร สุสุ วฑฺฒิตคฺโค, ทุนฺนิกฺขโม โหติ ปสาขชาโต;

เอวํ อหํ ภริยายานิตาย, อนุมญฺญํ มํ ปพฺพชิโตมฺหิ ทานี’’ติ.

… อาตุโม เถโร….

๗๓. ‘‘ชิณฺณญฺจ ทิสฺวา ทุขิตญฺจ พฺยาธิตํ, มตญฺจ ทิสฺวา คตมายุสงฺขยํ;

ตโต อหํ นิกฺขมิตูน ปพฺพชึ, ปหาย กามานิ มโนรมานี’’ติ.

… มาณโว เถโร….

๗๔. ‘‘กามจฺฉนฺโท จ พฺยาปาโท, ถินมิทฺธญฺจ [ถีนมิทฺธญฺจ (สี. สฺยา.)] ภิกฺขุโน;

อุทฺธจฺจํ วิจิกิจฺฉา จ, สพฺพโสว น วิชฺชตี’’ติ.

… สุยามโน เถโร….

๗๕. ‘‘สาธุ สุวิหิตาน ทสฺสนํ, กงฺขา ฉิชฺชติ พุทฺธิ วฑฺฒติ;

พาลมฺปิ กโรนฺติ ปณฺฑิตํ, ตสฺมา สาธุ สตํ สมาคโม’’ติ.

… สุสารโท เถโร….

๗๖. ‘‘อุปฺปตนฺเตสุ นิปเต, นิปตนฺเตสุ อุปฺปเต;

วเส อวสมาเนสุ, รมมาเนสุ โน รเม’’ติ.

… ปิยญฺชโห เถโร….

๗๗. ‘‘อิทํ ปุเร จิตฺตมจาริ จาริกํ, เยนิจฺฉกํ ยตฺถกามํ ยถาสุขํ;

ตทชฺชหํ นิคฺคเหสฺสามิ โยนิโส, หตฺถิปฺปภินฺนํ วิย องฺกุสคฺคโห’’ติ.

… หตฺถาโรหปุตฺโต เถโร….

๗๘. ‘‘อเนกชาติสํสารํ, สนฺธาวิสฺสํ อนิพฺพิสํ;

ตสฺส เม ทุกฺขชาตสฺส, ทุกฺขกฺขนฺโธ อปรทฺโธ’’ติ.

… เมณฺฑสิโร เถโร….

๗๙. ‘‘สพฺโพ ราโค ปหีโน เม, สพฺโพ โทโส สมูหโต;

สพฺโพ เม วิคโต โมโห, สีติภูโตสฺมิ นิพฺพุโต’’ติ.

… รกฺขิโต เถโร….

๘๐. ‘‘ยํ มยา ปกตํ กมฺมํ, อปฺปํ วา ยทิ วา พหุํ;

สพฺพเมตํ ปริกฺขีณํ, นตฺถิ ทานิ ปุนพฺภโว’’ติ.

… อุคฺโค เถโร….

วคฺโค อฏฺฐโม นิฏฺฐิโต.

ตสฺสุทฺทานํ –

วจฺฉปาโล จ โย เถโร, อาตุโม มาณโว อิสิ;

สุยามโน สุสารโท, เถโร โย จ ปิยญฺชโห;

อาโรหปุตฺโต เมณฺฑสิโร, รกฺขิโต อุคฺคสวฺหโยติ.