๗. สตฺตมวคฺโค

๖๑. ‘‘ปสฺสติ ปสฺโส ปสฺสนฺตํ, อปสฺสนฺตญฺจ ปสฺสติ;

อปสฺสนฺโต อปสฺสนฺตํ, ปสฺสนฺตญฺจ น ปสฺสตี’’ติ.

… วปฺโป เถโร….

๖๒. ‘‘เอกกา มยํ อรญฺเญ วิหราม, อปวิทฺธํว วนสฺมึ ทารุกํ;

ตสฺส เม พหุกา ปิหยนฺติ, เนรยิกา วิย สคฺคคามิน’’นฺติ.

… วชฺชิปุตฺโต เถโร….

๖๓. ‘‘จุตา ปตนฺติ ปติตา, คิทฺธา จ ปุนราคตา;

กตํ กิจฺจํ รตํ รมฺมํ, สุเขนนฺวาคตํ สุข’’นฺติ.

… ปกฺโข เถโร….

๖๔. ‘‘ทุมวฺหยาย อุปฺปนฺโน, ชาโต ปณฺฑรเกตุนา;

เกตุหา เกตุนาเยว, มหาเกตุํ ปธํสยี’’ติ.

… วิมลโกณฺฑญฺโญ เถโร….

๖๕. ‘‘อุกฺเขปกตวจฺฉสฺส, สงฺกลิตํ พหูหิ วสฺเสหิ;

ตํ ภาสติ คหฏฺฐานํ, สุนิสินฺโน อุฬารปาโมชฺโช’’ติ.

… อุกฺเขปกตวจฺโฉ เถโร….

๖๖. ‘‘อนุสาสิ มหาวีโร, สพฺพธมฺมาน ปารคู;

ตสฺสาหํ ธมฺมํ สุตฺวาน, วิหาสึ สนฺติเก สโต;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติ.

… เมฆิโย เถโร….

๖๗. ‘‘กิเลสา ฌาปิตา มยฺหํ, ภวา สพฺเพ สมูหตา;

วิกฺขีโณ ชาติสํสาโร, นตฺถิ ทานิ ปุนพฺภโว’’ติ.

… เอกธมฺมสวนีโย เถโร….

๖๘. [อุทา. ๓๗; ปาจิ. ๑๕๓] ‘‘อธิเจตโส อปฺปมชฺชโต, มุนิโน โมนปเถสุ สิกฺขโต;

โสกา น ภวนฺติ ตาทิโน, อุปสนฺตสฺส สทา สตีมโต’’ติ.

… เอกุทานิโย เถโร….

๖๙. ‘‘สุตฺวาน ธมฺมํ มหโต มหารสํ, สพฺพญฺญุตญฺญาณวเรน เทสิตํ;

มคฺคํ ปปชฺชึ [ปปชฺชํ (ก.)] อมตสฺส ปตฺติยา, โส โยคกฺเขมสฺส ปถสฺส โกวิโท’’ติ.

… ฉนฺโน เถโร….

๗๐. ‘‘สีลเมว อิธ อคฺคํ, ปญฺญวา ปน อุตฺตโม;

มนุสฺเสสุ จ เทเวสุ, สีลปญฺญาณโต ชย’’นฺติ.

… ปุณฺโณ เถโร….

วคฺโค สตฺตโม นิฏฺฐิโต.

ตสฺสุทฺทานํ –

วปฺโป จ วชฺชิปุตฺโต จ, ปกฺโข วิมลโกณฺฑญฺโญ;

อุกฺเขปกตวจฺโฉ จ, เมฆิโย เอกธมฺมิโก;

เอกุทานิยฉนฺนา จ, ปุณฺณตฺเถโร มหพฺพโลติ.