๕. ปญฺจมวคฺโค

๔๑. ‘‘วิวรมนุปตนฺติ วิชฺชุตา, เวภารสฺส จ ปณฺฑวสฺส จ;

นควิวรคโต จ ฌายติ, ปุตฺโต อปฺปฏิมสฺส ตาทิโน’’ติ.

… สิริวฑฺโฒ เถโร….

๔๒. ‘‘จาเล อุปจาเล สีสูปจาเล ( ) [(จาลา อุปจาลา, สีสูปจาลา) (ก.)] ปติสฺสตา [ปฏิสฺสติกา (สฺยา. ก.)] นุ โข วิหรถ;

อาคโต โว วาลํ วิย เวธี’’ติ.

… ขทิรวนิโย เถโร….

๔๓. ‘‘สุมุตฺติโก สุมุตฺติโก สาหุ, สุมุตฺติโกมฺหิ ตีหิ ขุชฺชเกหิ;

อสิตาสุ มยา นงฺคลาสุ, มยา ขุทฺทกุทฺทาลาสุ มยา.

ยทิปิ อิธเมว อิธเมว, อถ วาปิ อลเมว อลเมว;

ฌาย สุมงฺคล ฌาย สุมงฺคล, อปฺปมตฺโต วิหร สุมงฺคลา’’ติ.

… สุมงฺคโล เถโร….

๔๔. [สํ. นิ. ๑.๒๓๙] ‘‘มตํ วา อมฺม โรทนฺติ, โย วา ชีวํ น ทิสฺสติ;

ชีวนฺตํ มํ อมฺม ปสฺสนฺตี, กสฺมา มํ อมฺม โรทสี’’ติ.

… สานุตฺเถโร….

๔๕. ‘‘ยถาปิ ภทฺโท อาชญฺโญ, ขลิตฺวา ปติติฏฺฐติ;

เอวํ ทสฺสนสมฺปนฺนํ, สมฺมาสมฺพุทฺธสาวก’’นฺติ.

… รมณียวิหาริตฺเถโร….

๔๖. ‘‘สทฺธายาหํ ปพฺพชิโต, อคารสฺมานคาริยํ;

สติ ปญฺญา จ เม วุฑฺฒา, จิตฺตญฺจ สุสมาหิตํ;

กามํ กรสฺสุ รูปานิ, เนว มํ พฺยาธยิสฺสสี’’ติ [พาธยิสฺสสีติ (สี.), พฺยาถยิสฺสสีติ (?)].

… สมิทฺธิตฺเถโร….

๔๗. ‘‘นโม เต พุทฺธ วีรตฺถุ, วิปฺปมุตฺโตสิ สพฺพธิ;

ตุยฺหาปทาเน วิหรํ, วิหรามิ อนาสโว’’ติ.

… อุชฺชโย เถโร….

๔๘. ‘‘ยโต อหํ ปพฺพชิโต, อคารสฺมานคาริยํ;

นาภิชานามิ สงฺกปฺปํ, อนริยํ โทสสํหิต’’นฺติ.

… สญฺชโย เถโร….

๔๙. ‘‘จิหจิหาภินทิเต [วิหวิหาภินทิเต (สี. สฺยา.)], สิปฺปิกาภิรุเตหิ จ;

น เม ตํ ผนฺทติ จิตฺตํ, เอกตฺตนิรตํ หิ เม’’ติ.

… รามเณยฺยโก เถโร….

๕๐. ‘‘ธรณี จ สิญฺจติ วาติ, มาลุโต วิชฺชุตา จรติ นเภ;

อุปสมนฺติ วิตกฺกา, จิตฺตํ สุสมาหิตํ มมา’’ติ.

… วิมโล เถโร….

วคฺโค ปญฺจโม นิฏฺฐิโต.

ตสฺสุทฺทานํ –

สิรีวฑฺโฒ เรวโต เถโร, สุมงฺคโล สานุสวฺหโย;

รมณียวิหารี จ, สมิทฺธิอุชฺชยสญฺชยา;

รามเณยฺโย จ โส เถโร, วิมโล จ รณญฺชโหติ.