๔. จตุตฺถวคฺโค

๓๑. ‘‘ผุฏฺโฐ ฑํเสหิ มกเสหิ, อรญฺญสฺมึ พฺรหาวเน;

นาโค สํคามสีเสว, สโต ตตฺราธิวาสเย’’ติ.

… คหฺวรตีริโย เถโร….

๓๒. ‘‘อชรํ ชีรมาเนน, ตปฺปมาเนน นิพฺพุตึ;

นิมิยํ [นิมฺมิสฺสํ (สี.), นิรามิสํ (สฺยา.), นิมิเนยฺยํ (?)] ปรมํ สนฺตึ, โยคกฺเขมํ อนุตฺตร’’นฺติ.

… สุปฺปิโย เถโร….

๓๓. ‘‘ยถาปิ เอกปุตฺตสฺมึ, ปิยสฺมึ กุสลี สิยา;

เอวํ สพฺเพสุ ปาเณสุ, สพฺพตฺถ กุสโล สิยา’’ติ.

… โสปาโก เถโร….

๓๔. ‘‘อนาสนฺนวรา เอตา, นิจฺจเมว วิชานตา;

คามา อรญฺญมาคมฺม, ตโต เคหํ อุปาวิสิ [อุปาวิสึ (สี.)];

ตโต อุฏฺฐาย ปกฺกามิ, อนามนฺเตตฺวา [อนามนฺติย (สี.)] โปสิโย’’ติ.

… โปสิโย เถโร….

๓๕. ‘‘สุขํ สุขตฺโถ ลภเต ตทาจรํ, กิตฺติญฺจ ปปฺโปติ ยสสฺส วฑฺฒติ;

โย อริยมฏฺฐงฺคิกมญฺชสํ อุชุํ, ภาเวติ มคฺคํ อมตสฺส ปตฺติยา’’ติ.

… สามญฺญกานิตฺเถโร….

๓๖. ‘‘สาธุ สุตํ สาธุ จริตกํ, สาธุ สทา อนิเกตวิหาโร;

อตฺถปุจฺฉนํ ปทกฺขิณกมฺมํ, เอตํ สามญฺญมกิญฺจนสฺสา’’ติ.

… กุมาปุตฺโต เถโร….

๓๗. ‘‘นานาชนปทํ ยนฺติ, วิจรนฺตา อสญฺญตา;

สมาธิญฺจ วิราเธนฺติ, กึสุ รฏฺฐจริยา กริสฺสติ;

ตสฺมา วิเนยฺย สารมฺภํ, ฌาเยยฺย อปุรกฺขโต’’ติ.

… กุมาปุตฺตตฺเถรสฺส สหายโก เถโร….

๓๘. ‘‘โย อิทฺธิยา สรภุํ อฏฺฐเปสิ, โส ควมฺปติ อสิโต อเนโช;

ตํ สพฺพสงฺคาติคตํ มหามุนึ, เทวา นมสฺสนฺติ ภวสฺส ปารคุ’’นฺติ.

… ควมฺปติตฺเถโร….

๓๙. [สํ. นิ. ๑.๒๑, ๙๗]‘‘สตฺติยา วิย โอมฏฺโฐ, ฑยฺหมาโนว [ฑยฺหมาเนว (สพฺพตฺถ)] มตฺถเก;

กามราคปฺปหานาย, สโต ภิกฺขุ ปริพฺพเช’’ติ.

… ติสฺโส เถโร….

๔๐. ‘‘สตฺติยา วิย โอมฏฺโฐ, ฑยฺหมาโนว มตฺถเก;

ภวราคปฺปหานาย, สโต ภิกฺขุ ปริพฺพเช’’ติ.

… วฑฺฒมาโน เถโร….

วคฺโค จตุตฺโถ นิฏฺฐิโต.

ตสฺสุทฺทานํ –

คหฺวรตีริโย สุปฺปิโย, โสปาโก เจว โปสิโย;

สามญฺญกานิ กุมาปุตฺโต, กุมาปุตฺตสหายโก;

ควมฺปติ ติสฺสตฺเถโร, วฑฺฒมาโน มหายโสติ.