๓. ตติยวคฺโค

๒๑. ‘‘นาหํ ภยสฺส ภายามิ, สตฺถา โน อมตสฺส โกวิโท;

ยตฺถ ภยํ นาวติฏฺฐติ, เตน มคฺเคน วชนฺติ ภิกฺขโว’’ติ.

… นิโคฺรโธ เถโร….

๒๒. ‘‘นีลา สุคีวา สิขิโน, โมรา การมฺภิยํ [การํวิยํ (สี.), การวิยํ (สฺยา.)] อภินทนฺติ;

เต สีตวาตกีฬิตา [สีตวาตกทฺทิตกลิตา (สี.), สีตวาตกลิตา (สฺยา.)], สุตฺตํ ฌายํ [ฌานํ (สฺยา.), ฌายึ (?)] นิโพเธนฺตี’’ติ.

… จิตฺตโก เถโร….

๒๓. ‘‘อหํ โข เวฬุคุมฺพสฺมึ, ภุตฺวาน มธุปายสํ;

ปทกฺขิณํ สมฺมสนฺโต, ขนฺธานํ อุทยพฺพยํ;

สานุํ ปฏิคมิสฺสามิ, วิเวกมนุพฺรูหย’’นฺติ.

… โคสาโล เถโร….

๒๔. ‘‘อนุวสฺสิโก ปพฺพชิโต, ปสฺส ธมฺมสุธมฺมตํ;

ติสฺโส วิชฺชา อนุปฺปตฺตา, กตํ พุทฺธสฺส สาสน’’นฺติ.

… สุคนฺโธ เถโร….

๒๕. ‘‘โอภาสชาตํ ผลคํ, จิตฺตํ ยสฺส อภิณฺหโส;

ตาทิสํ ภิกฺขุมาสชฺช, กณฺห ทุกฺขํ นิคจฺฉสี’’ติ.

… นนฺทิโย เถโร….

๒๖. ‘‘สุตฺวา สุภาสิตํ วาจํ, พุทฺธสฺสาทิจฺจพนฺธุโน;

ปจฺจพฺยธึ หิ นิปุณํ, วาลคฺคํ อุสุนา ยถา’’ติ.

… อภโย เถโร….

๒๗. ‘‘ทพฺพํ กุสํ โปฏกิลํ, อุสีรํ มุญฺชปพฺพชํ;

อุรสา ปนุทิสฺสามิ, วิเวกมนุพฺรูหย’’นฺติ.

… โลมสกงฺคิโย เถโร….

๒๘. ‘‘กจฺจิ โน วตฺถปสุโต, กจฺจิ โน ภูสนารโต;

กจฺจิ สีลมยํ คนฺธํ, กึ ตฺวํ วายสิ [กจฺจิ สีลมยํ คนฺธํ, ตฺวํ วาสิ (สฺยา.)] เนตรา ปชา’’ติ.

… ชมฺพุคามิกปุตฺโต เถโร….

๒๙. ‘‘สมุนฺนมยมตฺตานํ, อุสุกาโรว เตชนํ;

จิตฺตํ อุชุํ กริตฺวาน, อวิชฺชํ ภินฺท หาริตา’’ติ.

… หาริโต เถโร….

๓๐. ‘‘อาพาเธ เม สมุปฺปนฺเน, สติ เม อุทปชฺชถ;

อาพาโธ เม สมุปฺปนฺโน, กาโล เม นปฺปมชฺชิตุ’’นฺติ.

… อุตฺติโย เถโร….

วคฺโค ตติโย นิฏฺฐิโต.

ตสฺสุทฺทานํ –

นิโคฺรโธ จิตฺตโก เถโร, โคสาลเถโร สุคนฺโธ;

นนฺทิโย อภโย เถโร, เถโร โลมสกงฺคิโย;

ชมฺพุคามิกปุตฺโต จ, หาริโต อุตฺติโย อิสีติ.