๒. ทุติยวคฺโค

๑๑. ‘‘ปาโมชฺชพหุโล ภิกฺขุ, ธมฺเม พุทฺธปฺปเวทิเต;

อธิคจฺเฉ ปทํ สนฺตํ, สงฺขารูปสมํ สุข’’นฺติ.

… จูฬวจฺโฉ [จูลควจฺโฉ (สี.)] เถโร….

๑๒. ‘‘ปญฺญาพลี สีลวตูปปนฺโน, สมาหิโต ฌานรโต สตีมา;

ยทตฺถิยํ โภชนํ ภุญฺชมาโน, กงฺเขถ กาลํ อิธ วีตราโค’’ติ.

… มหาวจฺโฉ [มหาควจฺโฉ (สี.)] เถโร….

๑๓. ‘‘นีลพฺภวณฺณา รุจิรา, สีตวารี สุจินฺธรา;

อินฺทโคปกสญฺฉนฺนา, เต เสลา รมยนฺติ ม’’นฺติ.

… วนวจฺโฉ เถโร….

๑๔. ‘‘อุปชฺฌาโย มํ อวจ, อิโต คจฺฉาม สีวก;

คาเม เม วสติ กาโย, อรญฺญํ เม คโต มโน;

เสมานโกปิ คจฺฉามิ, นตฺถิ สงฺโค วิชานต’’นฺติ.

… สิวโก สามเณโร….

๑๕. ‘‘ปญฺจ ฉินฺเท ปญฺจ ชเห, ปญฺจ จุตฺตริ ภาวเย;

ปญฺจสงฺคาติโค ภิกฺขุ, โอฆติณฺโณติ วุจฺจตี’’ติ.

… กุณฺฑธาโน เถโร….

๑๖. ‘‘ยถาปิ ภทฺโท อาชญฺโญ, นงฺคลาวตฺตนี สิขี;

คจฺฉติ อปฺปกสิเรน, เอวํ รตฺตินฺทิวา มม;

คจฺฉนฺติ อปฺปกสิเรน, สุเข ลทฺเธ นิรามิเส’’ติ.

… เพลฏฺฐสีโส เถโร….

๑๗. ‘‘มิทฺธี ยทา โหติ มหคฺฆโส จ, นิทฺทายิตา สมฺปริวตฺตสายี;

มหาวราโหว นิวาปปุฏฺโฐ, ปุนปฺปุนํ คพฺภมุเปติ มนฺโท’’ติ.

… ทาสโก เถโร….

๑๘. ‘‘อหุ พุทฺธสฺส ทายาโท, ภิกฺขุ เภสกฬาวเน;

เกวลํ อฏฺฐิสญฺญาย, อผรี ปถวึ [ปฐวึ (สี. สฺยา.)] อิมํ;

มญฺเญหํ กามราคํ โส, ขิปฺปเมว ปหิสฺสตี’’ติ [ปหียภิ (สพฺพตฺถ ปาฬิยํ)].

… สิงฺคาลปิตา [สีคาลปิตา (สี.)] เถโร….

๑๙. [ธ. ป. ๘๐, ๑๔๕ ธมฺมปเทปิ] ‘‘อุทกํ หิ นยนฺติ เนตฺติกา, อุสุการา นมยนฺติ [ทมยนฺติ (ก.)] เตชนํ;

ทารุํ นมยนฺติ ตจฺฉกา, อตฺตานํ ทมยนฺติ สุพฺพตา’’ติ.

… กุโล [กุณฺฑโล (สี.), กุโฬ (สฺยา. ก.)] เถโร….

๒๐. ‘‘มรเณ เม ภยํ นตฺถิ, นิกนฺติ นตฺถิ ชีวิเต;

สนฺเทหํ นิกฺขิปิสฺสามิ, สมฺปชาโน ปฏิสฺสโต’’ติ [ปติสฺสโตติ (สี. สฺยา.)].

… อชิโต เถโร ….

วคฺโค ทุติโย นิฏฺฐิโต.

ตสฺสุทฺทานํ –

จูฬวจฺโฉ มหาวจฺโฉ, วนวจฺโฉ จ สีวโก;

กุณฺฑธาโน จ เพลฏฺฐิ, ทาสโก จ ตโตปริ;

สิงฺคาลปิติโก เถโร, กุโล จ อชิโต ทสาติ.