๑๕. อตฺตทณฺฑสุตฺตํ

๙๔๑. ‘‘อตฺตทณฺฑา ภยํ ชาตํ, ชนํ ปสฺสถ เมธคํ;

สํเวคํ กิตฺตยิสฺสามิ, ยถา สํวิชิตํ มยา.

๙๔๒. ‘‘ผนฺทมานํ ปชํ ทิสฺวา, มจฺเฉ อปฺโปทเก ยถา;

อญฺญมญฺเญหิ พฺยารุทฺเธ, ทิสฺวา มํ ภยมาวิสิ.

๙๔๓. ‘‘สมนฺตมสาโร โลโก, ทิสา สพฺพา สเมริตา;

อิจฺฉํ ภวนมตฺตโน, นาทฺทสาสึ อโนสิตํ.

๙๔๔. ‘‘โอสาเนเตฺวว พฺยารุทฺเธ, ทิสฺวา เม อรตี อหุ;

อเถตฺถ สลฺลมทฺทกฺขึ, ทุทฺทสํ หทยนิสฺสิตํ.

๙๔๕. ‘‘เยน สลฺเลน โอติณฺโณ, ทิสา สพฺพา วิธาวติ;

ตเมว สลฺลมพฺพุยฺห, น ธาวติ น สีทติ.

๙๔๖. ‘‘ตตฺถ สิกฺขานุคียนฺติ [สิกฺขานุกิริยนฺติ (ก.)], ยานิ โลเก คธิตานิ;

น เตสุ ปสุโต สิยา, นิพฺพิชฺฌ สพฺพโส กาเม;

สิกฺเข นิพฺพานมตฺตโน.

๙๔๗. ‘‘สจฺโจ สิยา อปฺปคพฺโภ, อมาโย ริตฺตเปสุโณ;

อกฺโกธโน โลภปาปํ, เววิจฺฉํ วิตเร มุนิ.

๙๔๘. ‘‘นิทฺทํ ตนฺทึ สเห ถีนํ, ปมาเทน น สํวเส;

อติมาเน น ติฏฺเฐยฺย, นิพฺพานมนโส นโร.

๙๔๙. ‘‘โมสวชฺเช น นีเยถ, รูเป เสฺนหํ น กุพฺพเย;

มานญฺจ ปริชาเนยฺย, สาหสา วิรโต จเร.

๙๕๐. ‘‘ปุราณํ นาภินนฺเทยฺย, นเว ขนฺตึ น กุพฺพเย;

หิยฺยมาเน น โสเจยฺย, อากาสํ น สิโต สิยา.

๙๕๑. ‘‘เคธํ พฺรูมิ มโหโฆติ, อาชวํ พฺรูมิ ชปฺปนํ;

อารมฺมณํ ปกปฺปนํ, กามปงฺโก ทุรจฺจโย.

๙๕๒. ‘‘สจฺจา อโวกฺกมฺม [อโวกฺกมํ (นิทฺเทส)] มุนิ, ถเล ติฏฺฐติ พฺราหฺมโณ;

สพฺพํ โส [สพฺพโส (สฺยา. ก.)] ปฏินิสฺสชฺช, ส เว สนฺโตติ วุจฺจติ.

๙๕๓. ‘‘ส เว วิทฺวา ส เวทคู, ญตฺวา ธมฺมํ อนิสฺสิโต;

สมฺมา โส โลเก อิริยาโน, น ปิเหตีธ กสฺสจิ.

๙๕๔. ‘‘โยธ กาเม อจฺจตริ, สงฺคํ โลเก ทุรจฺจยํ;

น โส โสจติ นาชฺเฌติ, ฉินฺนโสโต อพนฺธโน.

๙๕๕. ‘‘ยํ ปุพฺเพ ตํ วิโสเสหิ, ปจฺฉา เต มาหุ กิญฺจนํ;

มชฺเฌ เจ โน คเหสฺสสิ, อุปสนฺโต จริสฺสสิ.

๙๕๖. ‘‘สพฺพโส นามรูปสฺมึ, ยสฺส นตฺถิ มมายิตํ;

อสตา จ น โสจติ, ส เว โลเก น ชียติ.

๙๕๗. ‘‘ยสฺส นตฺถิ อิทํ เมติ, ปเรสํ วาปิ กิญฺจนํ;

มมตฺตํ โส อสํวินฺทํ, นตฺถิ เมติ น โสจติ.

๙๕๘. ‘‘อนิฏฺฐุรี อนนุคิทฺโธ, อเนโช สพฺพธี สโม;

ตมานิสํสํ ปพฺรูมิ, ปุจฺฉิโต อวิกมฺปินํ.

๙๕๙. ‘‘อเนชสฺส วิชานโต, นตฺถิ กาจิ นิสงฺขติ [นิสงฺขิติ (สี. ปี.)].

วิรโต โส วิยารพฺภา, เขมํ ปสฺสติ สพฺพธิ.

๙๖๐. ‘‘น สเมสุ น โอเมสุ, น อุสฺเสสุ วทเต มุนิ;

สนฺโต โส วีตมจฺฉโร, นาเทติ น นิรสฺสตี’’ติ.

อตฺตทณฺฑสุตฺตํ ปนฺนรสมํ นิฏฺฐิตํ.