๘. สลฺลสุตฺตํ

๕๗๙. อนิมิตฺตมนญฺญาตํ, มจฺจานํ อิธ ชีวิตํ;

กสิรญฺจ ปริตฺตญฺจ, ตญฺจ ทุกฺเขน สํยุตํ.

๕๘๐. น หิ โส อุปกฺกโม อตฺถิ, เยน ชาตา น มิยฺยเร;

ชรมฺปิ ปตฺวา มรณํ, เอวํธมฺมา หิ ปาณิโน.

๕๘๑. ผลานมิว ปกฺกานํ, ปาโต ปตนโต [ปปตโต (สี. ปี. อฏฺฐ.)] ภยํ;

เอวํ ชาตาน มจฺจานํ, นิจฺจํ มรณโต ภยํ.

๕๘๒. ยถาปิ กุมฺภการสฺส, กตา มตฺติกภาชนา;

สพฺเพ เภทนปริยนฺตา [เภทปริยนฺตา (สฺยา.)], เอวํ มจฺจาน ชีวิตํ.

๕๘๓. ทหรา จ มหนฺตา จ, เย พาลา เย จ ปณฺฑิตา;

สพฺเพ มจฺจุวสํ ยนฺติ, สพฺเพ มจฺจุปรายณา.

๕๘๔. เตสํ มจฺจุปเรตานํ, คจฺฉตํ ปรโลกโต;

น ปิตา ตายเต ปุตฺตํ, ญาตี วา ปน ญาตเก.

๕๘๕. เปกฺขตํ เยว ญาตีนํ, ปสฺส ลาลปตํ ปุถุ;

เอกเมโกว มจฺจานํ, โควชฺโฌ วิย นียติ [นิยฺยติ (พหูสุ)].

๕๘๖. เอวมพฺภาหโต โลโก, มจฺจุนา จ ชราย จ;

ตสฺมา ธีรา น โสจนฺติ, วิทิตฺวา โลกปริยายํ.

๕๘๗. ยสฺส มคฺคํ น ชานาสิ, อาคตสฺส คตสฺส วา;

อุโภ อนฺเต อสมฺปสฺสํ, นิรตฺถํ ปริเทวสิ.

๕๘๘. ปริเทวยมาโน เจ, กิญฺจิทตฺถํ อุทพฺพเห;

สมฺมูโฬฺห หึสมตฺตานํ, กยิรา เจ นํ วิจกฺขโณ.

๕๘๙. น หิ รุณฺเณน โสเกน, สนฺตึ ปปฺโปติ เจตโส;

ภิยฺยสฺสุปฺปชฺชเต ทุกฺขํ, สรีรํ จุปหญฺญติ.

๕๙๐. กิโส วิวณฺโณ ภวติ, หึสมตฺตานมตฺตนา;

น เตน เปตา ปาเลนฺติ, นิรตฺถา ปริเทวนา.

๕๙๑. โสกมปฺปชหํ ชนฺตุ, ภิยฺโย ทุกฺขํ นิคจฺฉติ;

อนุตฺถุนนฺโต กาลงฺกตํ [กาลกตํ (สี. สฺยา.)], โสกสฺส วสมนฺวคู.

๕๙๒. อญฺเญปิ ปสฺส คมิเน, ยถากมฺมูปเค นเร;

มจฺจุโน วสมาคมฺม, ผนฺทนฺเตวิธ ปาณิโน.

๕๙๓. เยน เยน หิ มญฺญนฺติ, ตโต ตํ โหติ อญฺญถา;

เอตาทิโส วินาภาโว, ปสฺส โลกสฺส ปริยายํ.

๕๙๔. อปิ วสฺสสตํ ชีเว, ภิยฺโย วา ปน มาณโว;

ญาติสงฺฆา วินา โหติ, ชหาติ อิธ ชีวิตํ.

๕๙๕. ตสฺมา อรหโต สุตฺวา, วิเนยฺย ปริเทวิตํ;

เปตํ กาลงฺกตํ ทิสฺวา, เนโส ลพฺภา มยา อิติ.

๕๙๖. ยถา สรณมาทิตฺตํ, วารินา ปรินิพฺพเย [ปรินิพฺพุโต (สี. ก.)];

เอวมฺปิ ธีโร สปญฺโญ, ปณฺฑิโต กุสโล นโร;

ขิปฺปมุปฺปติตํ โสกํ, วาโต ตูลํว ธํสเย.

๕๙๗. ปริเทวํ ปชปฺปญฺจ, โทมนสฺสญฺจ อตฺตโน;

อตฺตโน สุขเมสาโน, อพฺพเห สลฺลมตฺตโน.

๕๙๘. อพฺพุฬฺหสลฺโล อสิโต, สนฺตึ ปปฺปุยฺย เจตโส;

สพฺพโสกํ อติกฺกนฺโต, อโสโก โหติ นิพฺพุโตติ.

สลฺลสุตฺตํ อฏฺฐมํ นิฏฺฐิตํ.