๔๒๕. อฏฺฐานชาตกํ (๙)

๗๗. คงฺคา กุมุทินี สนฺตา, สงฺขวณฺณา จ โกกิลา;

ชมฺพุ ตาลผลํ ทชฺชา, อถ นูน ตทา สิยา.

๗๘. ยทา กจฺฉปโลมานํ, ปาวาโร ติวิโธ สิยา;

เหมนฺติกํ ปาวุรณํ [ปาปุรณํ (สี. สฺยา. ปี.)], อถ นูน ตทา สิยา.

๗๙. ยทา มกสปาทานํ [ทาฐานํ (สี. ปี.)], อฏฺฏาโล สุกโต สิยา;

ทโฬฺห จ อวิกมฺปี จ [อปฺปกมฺปี จ (สี. ปี.)], อถ นูน ตทา สิยา.

๘๐. ยทา สสวิสาณานํ, นิสฺเสณี สุกตา สิยา;

สคฺคสฺสาโรหณตฺถาย, อถ นูน ตทา สิยา.

๘๑. ยทา นิสฺเสณิมารุยฺห, จนฺทํ ขาเทยฺยุ มูสิกา;

ราหุญฺจ ปริปาเตยฺยุํ [ปริพาเหยฺยุํ (สฺยา.)], อถ นูน ตทา สิยา.

๘๒. ยทา สุราฆฏํ ปิตฺวา, มกฺขิกา คณจาริณี;

องฺคาเร วาสํ กปฺเปยฺยุํ, อถ นูน ตทา สิยา.

๘๓. ยทา พิมฺโพฏฺฐสมฺปนฺโน, คทฺรโภ สุมุโข สิยา;

กุสโล นจฺจคีตสฺส, อถ นูน ตทา สิยา.

๘๔. ยทา กากา อุลูกา จ, มนฺตเยยฺยุํ รโหคตา;

อญฺญมญฺญํ ปิหเยยฺยุํ, อถ นูน ตทา สิยา.

๘๕. ยทา มุฬาล [ปุลส (สี. ปี.), ปุลาส (สฺยา.)] ปตฺตานํ, ฉตฺตํ ถิรตรํ สิยา;

วสฺสสฺส ปฏิฆาตาย, อถ นูน ตทา สิยา.

๘๖. ยทา กุลโก [กุลุงฺโก (สี. ปี.), กุลุโก (สฺยา.)] สกุโณ, ปพฺพตํ คนฺธมาทนํ;

ตุณฺเฑนาทาย คจฺเฉยฺย, อถ นูน ตทา สิยา.

๘๗. ยทา สามุทฺทิกํ นาวํ, ส-ยนฺตํ ส-วฏากรํ [สปฏาการํ (ก.)];

เจโฏ อาทาย คจฺเฉยฺย, อถ นูน ตทา สิยาติ.

อฏฺฐานชาตกํ นวมํ.