๔๒๓. อินฺทฺริยชาตกํ (๗)

๖๐. โย อินฺทฺริยานํ กาเมน, วสํ นารท คจฺฉติ;

โส ปริจฺจชฺชุโภ โลเก, ชีวนฺโตว วิสุสฺสติ [ชีวนฺโตปิวิสุสฺสติ (สฺยา.), ชีวนฺโต วาปิ สุสฺสติ (ก.)].

๖๑. สุขสฺสานนฺตรํ ทุกฺขํ, ทุกฺขสฺสานนฺตรํ สุขํ;

โสสิ [โสปิ (สฺยา. ปี. ก.)] ปตฺโต สุขา [สุข (สฺยา.), สุขํ (ก.)] ทุกฺขํ, ปาฏิกงฺข วรํ สุขํ.

๖๒. กิจฺฉกาเล กิจฺฉสโห, โย กิจฺฉํ นาติวตฺตติ;

ส กิจฺฉนฺตํ สุขํ ธีโร, โยคํ สมธิคจฺฉติ.

๖๓. น เหว กามาน กามา, นานตฺถา นาตฺถการณา;

น กตญฺจ นิรงฺกตฺวา, ธมฺมา จวิตุมรหสิ.

๖๔. ทกฺขํ คหปตี [คหปตํ (สี. สฺยา. ปี.), คหวตํ (?)] สาธุ, สํวิภชฺชญฺจ โภชนํ;

อหาโส อตฺถลาเภสุ, อตฺถพฺยาปตฺติ อพฺยโถ.

๖๕. เอตฺตาวเตตํ ปณฺฑิจฺจํ, อปิ โส [อสิโต (สี. สฺยา. ปี.)] ทวิโล [เทวโล (สี. ปี.)] พฺรวิ;

น ยิโต กิญฺจิ ปาปิโย, โย อินฺทฺริยานํ วสํ วเช.

๖๖. อมิตฺตานํว หตฺถตฺถํ, สิวิ ปปฺโปติ มามิว;

กมฺมํ วิชฺชญฺจ ทกฺเขยฺยํ, วิวาหํ สีลมทฺทวํ;

เอเต จ ยเส หาเปตฺวา, นิพฺพตฺโต เสหิ กมฺเมหิ.

๖๗. โสหํ สหสฺสชีโนว อพนฺธุ อปรายโณ;

อริยธมฺมา อปกฺกนฺโต, ยถา เปโต ตเถวหํ.

๖๘. สุขกาเม ทุกฺขาเปตฺวา, อาปนฺโนสฺมิ ปทํ อิมํ;

โส สุขํ นาธิคจฺฉามิ, ฐิโต [จิโต (ปี. สี. อฏฺฐ.)] ภาณุมตามิวาติ.

อินฺทฺริยชาตกํ สตฺตมํ.