๔๑๕. กุมฺมาสปิณฺฑิชาตกํ (๗-๒-๑๐)

๑๔๒. น กิรตฺถิ อโนมทสฺสิสุ, ปาริจริยา พุทฺเธสุ อปฺปิกา [อปฺปกา (ก.)];

สุกฺขาย อโลณิกาย จ, ปสฺสผลํ กุมฺมาสปิณฺฑิยา.

๑๔๓. หตฺถิควสฺสา จิเม พหู [หตฺถิควาสฺสา จ เม พหู (สี.), หตฺถี ควาสฺสา จิเม พหู (สฺยา.), หตฺถี ควาสฺสา จ เม พหู (ปี.)], ธนธญฺญํ ปถวี จ เกวลา;

นาริโย จิมา อจฺฉรูปมา, ปสฺสผลํ กุมฺมาสปิณฺฑิยา.

๑๔๔. อภิกฺขณํ ราชกุญฺชร, คาถา ภาสสิ โกสลาธิป;

ปุจฺฉามิ ตํ รฏฺฐวฑฺฒน, พาฬฺหํ ปีติมโน ปภาสสิ.

๑๔๕. อิมสฺมิญฺเญว นคเร, กุเล อญฺญตเร อหุํ;

ปรกมฺมกโร อาสึ, ภตโก สีลสํวุโต.

๑๔๖. กมฺมาย นิกฺขมนฺโตหํ, จตุโร สมเณทฺทสํ;

อาจารสีลสมฺปนฺเน, สีติภูเต อนาสเว.

๑๔๗. เตสุ จิตฺตํ ปสาเทตฺวา, นิสีเทตฺวา [นิสาเทตฺวา (?)] ปณฺณสนฺถเต;

อทํ พุทฺธาน กุมฺมาสํ, ปสนฺโน เสหิ ปาณิภิ.

๑๔๘. ตสฺส กมฺมสฺส กุสลสฺส, อิทํ เม เอทิสํ ผลํ;

อนุโภมิ อิทํ รชฺชํ, ผีตํ ธรณิมุตฺตมํ.

๑๔๙. ททํ ภุญฺช มา จ ปมาโท [ทท ภุญฺช จ มา จ ปมาโท (สี. ปี.)], จกฺกํ วตฺตย โกสลาธิป;

มา ราช อธมฺมิโก อหุ, ธมฺมํ ปาลย โกสลาธิป.

๑๕๐. โสหํ ตเทว ปุนปฺปุนํ, วฏุมํ อาจริสฺสามิ โสภเน;

อริยาจริตํ สุโกสเล, อรหนฺโต เม มนาปาว ปสฺสิตุํ.

๑๕๑. เทวี วิย อจฺฉรูปมา, มชฺเฌ นาริคณสฺส โสภสิ;

กึ กมฺมมกาสิ ภทฺทกํ, เกนาสิ วณฺณวตี สุโกสเล.

๑๕๒. อมฺพฏฺฐกุลสฺส ขตฺติย, ทาสฺยาหํ ปรเปสิยา อหุํ;

สญฺญตา จ [สญฺญตา (สี. ปี.)] ธมฺมชีวินี, สีลวตี จ อปาปทสฺสนา.

๑๕๓. อุทฺธฏภตฺตํ อหํ ตทา, จรมานสฺส อทาสิ ภิกฺขุโน;

วิตฺตา สุมนา สยํ อหํ, ตสฺส กมฺมสฺส ผลํ มเมทิสนฺติ.

กุมฺมาสปิณฺฑิชาตกํ ทสมํ.