๓๖๔. ขชฺโชปนกชาตกํ (๕-๒-๔)

๗๕. โก นุ สนฺตมฺหิ ปชฺโชเต, อคฺคิปริเยสนํ จรํ;

อทฺทกฺขิ รตฺติ [รตฺตึ (สฺยา.)] ขชฺโชตํ, ชาตเวทํ อมญฺญถ.

๗๖. สฺวสฺส โคมยจุณฺณานิ, อภิมตฺถํ ติณานิ จ;

วิปรีตาย สญฺญาย, นาสกฺขิ ปชฺชเลตเว.

๗๗. เอวมฺปิ อนุปาเยน, อตฺถํ น ลภเต มิโค [มูโค (สฺยา.)];

วิสาณโต ควํ โทหํ, ยตฺถ ขีรํ น วินฺทติ.

๗๘. วิวิเธหิ อุปาเยหิ, อตฺถํ ปปฺโปนฺติ มาณวา;

นิคฺคเหน อมิตฺตานํ, มิตฺตานํ ปคฺคเหน จ.

๗๙. เสนาโมกฺขปลาเภน [เสนี โมกฺขูปลาเภน (สฺยา.)], วลฺลภานํ นเยน จ;

ชคตึ ชคติปาลา, อาวสนฺติ วสุนฺธรนฺติ.

ขชฺโชปนกชาตกํ จตุตฺถํ.