๓๕๘. จูฬธมฺมปาลชาตกํ (๕-๑-๘)

๔๔. อหเมว ทูสิยา ภูนหตา, รญฺโญ มหาปตาปสฺส;

เอตํ มุญฺจตุ ธมฺมปาลํ, หตฺเถ เม เทว เฉเทหิ.

๔๕. อหเมว ทูสิยา ภูนหตา, รญฺโญ มหาปตาปสฺส;

เอตํ มุญฺจตุ ธมฺมปาลํ, ปาเท เม เทว เฉเทหิ.

๔๖. อหเมว ทูสิยา ภูนหตา, รญฺโญ มหาปตาปสฺส;

เอตํ มุญฺจตุ ธมฺมปาลํ, สีสํ เม เทว เฉเทหิ.

๔๗. น หิ [นห (สี. สฺยา. ปี.) เอตฺถ ห-กาโร เขเท] นูนิมสฺส รญฺโญ, มิตฺตามจฺจา จ วิชฺชเร สุหทา;

เย น วทนฺติ ราชานํ, มา ฆาตยิ โอรสํ ปุตฺตํ.

๔๘. น หิ [นห (สี. สฺยา. ปี.) เอตฺถ ห-กาโร เขเท] นูนิมสฺส รญฺโญ, ญาตี มิตฺตา จ วิชฺชเร สุหทา;

เย น วทนฺติ ราชานํ, มา ฆาตยิ อตฺรชํ ปุตฺตํ.

๔๙. จนฺทนสารานุลิตฺตา, พาหา ฉิชฺชนฺติ ธมฺมปาลสฺส;

ทายาทสฺส ปถพฺยา, ปาณา เม เทว รุชฺฌนฺตีติ.

จูฬธมฺมปาลชาตกํ อฏฺฐมํ.