๕๒๐. คนฺธตินฺทุกชาตกํ (๑๐)

๓๓๒. อปฺปมาโท อมตํ ปทํ [อมตปทํ (สี. ปี.)], ปมาโท มจฺจุโน ปทํ;

อปฺปมตฺตา น มียนฺติ, เย ปมตฺตา ยถา มตา.

๓๓๓. มทา ปมาโท ชาเยถ, ปมาทา ชายเต ขโย;

ขยา ปโทสา [ขยา จ โทสา (สี.)] ชายนฺติ, มา ปมาโท [มา มโท (สี. สฺยา. ปี.)] ภรตูสภ [ภารธูสภ (ก.)].

๓๓๔. พหู หิ ขตฺติยา ชีนา, อตฺถํ รฏฺฐํ ปมาทิโน;

อโถปิ คามิโน คามา, อนคารา อคาริโน.

๓๓๕. ขตฺติยสฺส ปมตฺตสฺส, รฏฺฐสฺมึ รฏฺฐวฑฺฒน;

สพฺเพ โภคา วินสฺสนฺติ, รญฺโญ ตํ วุจฺจเต อฆํ.

๓๓๖. เนส ธมฺโม มหาราช, อติเวลํ ปมชฺชสิ;

อิทฺธํ ผีตํ ชนปทํ, โจรา วิทฺธํสยนฺติ นํ.

๓๓๗. น เต ปุตฺตา ภวิสฺสนฺติ, น หิรญฺญํ น ธานิยํ [น หิรญฺญนิธานิยา (ก.)];

รฏฺเฐ วิลุปฺปมานมฺหิ, สพฺพโภเคหิ ชิยฺยสิ.

๓๓๘. สพฺพโภคา ปริชิณฺณํ, ราชานํ วาปิ ขตฺติยํ [ขตฺติย (ก.)];

ญาติมิตฺตา สุหชฺชา จ, น ตํ มญฺญนฺติ มานิยํ [มนฺติยํ (สฺยา.)].

๓๓๙. หตฺถาโรหา อนีกฏฺฐา, รถิกา ปตฺติการกา;

ตเมวมุปชีวนฺตา, น ตํ มญฺญนฺติ มานิยํ.

๓๔๐. อสํวิหิตกมฺมนฺตํ, พาลํ ทุมฺมนฺติมนฺตินํ;

สิรี ชหติ ทุมฺเมธํ, ชิณฺณํว อุรโค ตจํ.

๓๔๑. สุสํวิหิตกมฺมนฺตํ, กาลุฏฺฐายึ อตนฺทิตํ;

สพฺเพ โภคาภิวฑฺฒนฺติ, คาโว สอุสภามิว.

๓๔๒. อุปสฺสุตึ มหาราช, รฏฺเฐ ชนปเท จร;

ตตฺถ ทิสฺวา จ สุตฺวา จ, ตโต ตํ [ตฺวํ (ก.)] ปฏิปชฺชสิ.

๓๔๓. เอวํ เวเทตุ ปญฺจาโล, สงฺคาเม สรมปฺปิโต [สมปฺปิโต (สี. ปี.)];

ยถาหมชฺช เวเทมิ, กณฺฏเกน สมปฺปิโต.

๓๔๔. ชิณฺโณ ทุพฺพลจกฺขูสิ, น รูปํ สาธุ ปสฺสสิ;

กึ ตตฺถ พฺรหฺมทตฺตสฺส, ยํ ตํ มคฺเคยฺย [มคฺเฆยฺย (ปี.)] กณฺฏโก [กณฺฑโก (สี. สฺยา. ปี.)].

๓๔๕. พเหฺวตฺถ พฺรหฺมทตฺตสฺส, โสหํ [โยหํ (สี. สฺยา. ปี.)] มคฺคสฺมิ [มคฺโคสฺมิ (ปี.)] พฺราหฺมณ;

อรกฺขิตา ชานปทา, อธมฺมพลินา หตา.

๓๔๖. รตฺติญฺหิ [รตฺติญฺจ (สี.)] โจรา ขาทนฺติ, ทิวา ขาทนฺติ ตุณฺฑิยา;

รฏฺฐสฺมึ กูฏราชสฺส, พหุ อธมฺมิโก ชโน.

๓๔๗. เอตาทิเส ภเย ชาเต [ตาต (สี. ปี.)], ภยฏฺฏา ตาต [ตาว (สี. ปี.)] มาณวา;

นิลฺเลนกานิ กุพฺพนฺติ, วเน อาหตฺว กณฺฏกํ.

๓๔๘. กทาสฺสุ นามยํ ราชา, พฺรหฺมทตฺโต มริสฺสติ;

ยสฺส รฏฺฐมฺหิ ชิยฺยนฺติ, อปฺปติกา กุมาริกา.

๓๔๙. ทุพฺภาสิตญฺหิ เต ชมฺมิ, อนตฺถปทโกวิเท;

กุหึ ราชา กุมารีนํ, ภตฺตารํ ปริเยสติ.

๓๕๐. น เม ทุพฺภาสิตํ พฺรเหฺม, โกวิทตฺถปทา อหํ;

อรกฺขิตา ชานปทา, อธมฺมพลินา หตา.

๓๕๑. รตฺติญฺหิ โจรา ขาทนฺติ, ทิวา ขาทนฺติ ตุณฺฑิยา;

รฏฺฐสฺมึ กูฏราชสฺส, พหุ อธมฺมิโก ชโน;

ทุชฺชีเว ทุพฺภเร ทาเร, กุโต ภตฺตา กุมาริโย.

๓๕๒. เอวํ สยตุ ปญฺจาโล, สงฺคาเม สตฺติยา หโต;

ยถายํ กปโณ เสติ, หโต ผาเลน สาลิโย.

๓๕๓. อธมฺเมน ตุวํ ชมฺม, พฺรหฺมทตฺตสฺส กุชฺฌสิ;

โย ตฺวํ สปสิ ราชานํ, อปรชฺฌิตฺวาน อตฺตโน [อตฺตนา (ปี.)].

๓๕๔. ธมฺเมน พฺรหฺมทตฺตสฺส, อหํ กุชฺฌามิ พฺราหฺมณ;

อรกฺขิตา ชานปทา, อธมฺมพลินา หตา.

๓๕๕. รตฺติญฺหิ โจรา ขาทนฺติ, ทิวา ขาทนฺติ ตุณฺฑิยา;

รฏฺฐสฺมึ กูฏราชสฺส, พหุ อธมฺมิโก ชโน.

๓๕๖. สา นูน ปุน เร ปกฺกา, วิกาเล ภตฺตมาหริ;

ภตฺตหารึ อเปกฺขนฺโต, หโต ผาเลน สาลิโย.

๓๕๗. เอวํ หญฺญตุ ปญฺจาโล, สงฺคาเม อสินา หโต [ทฬฺหํ (ปี.)];

ยถาหมชฺช ปหโต, ขีรญฺจ เม ปวฏฺฏิตํ.

๓๕๘. ยํ ปสุ ขีรํ ฉฑฺเฑติ, ปสุปาลํ วิหึสติ [ปสุปาลญฺจ หึสติ (สี.), ปสุ ผาลญฺจ หึสติ (ปี.)];

กึ ตตฺถ พฺรหฺมทตฺตสฺส, ยํ โน ครหเต [ครหโต (ปี.)] ภวํ.

๓๕๙. คารโยฺห พฺรเหฺม ปญฺจาโล, พฺรหฺมทตฺตสฺส ราชิโน;

อรกฺขิตา ชานปทา, อธมฺมพลินา หตา.

๓๖๐. รตฺติญฺหิ โจรา ขาทนฺติ, ทิวา ขาทนฺติ ตุณฺฑิยา;

รฏฺฐสฺมึ กูฏราชสฺส, พหุ อธมฺมิโก ชโน.

๓๖๑. จณฺฑา อฏนกา [อฏนก (ปี.), อกฏนา (ก.)] คาวี, ยํ ปุเร น ทุหามเส;

ตํ ทานิ อชฺช โทหาม, ขีรกาเมหุปทฺทุตา.

๓๖๒. เอวํ กนฺทตุ ปญฺจาโล, วิปุตฺโต วิปฺปสุกฺขตุ;

ยถายํ กปณา คาวี, วิปุตฺตา ปริธาวติ.

๓๖๓. ยํ ปสุ ปสุปาลสฺส, สมฺภเมยฺย [ปพฺภเมยฺย (สี. ปี.)] รเวยฺย วา;

โก นีธ อปราธตฺถิ, พฺรหฺมทตฺตสฺส ราชิโน.

๓๖๔. อปราโธ มหาพฺรเหฺม, พฺรหฺมทตฺตสฺส ราชิโน;

อรกฺขิตา ชานปทา, อธมฺมพลินา หตา.

๓๖๕. รตฺติญฺหิ โจรา ขาทนฺติ, ทิวา ขาทนฺติ ตุณฺฑิยา;

รฏฺฐสฺมึ กูฏราชสฺส, พหุ อธมฺมิโก ชโน;

กถํ โน อสิโกสตฺถา, ขีรปา หญฺญเต ปชา.

๓๖๖. เอวํ ขชฺชตุ ปญฺจาโล, หโต ยุทฺเธ สปุตฺตโก;

ยถาหมชฺช ขชฺชามิ, คามิเกหิ [คามเกหิ (สี. ปี.)] อรญฺญโช.

๓๖๗. น สพฺพภูเตสุ วิเธนฺติ [วิธนฺติ (ก.)] รกฺขํ, ราชาโน มณฺฑูก มนุสฺสโลเก;

เนตฺตาวตา ราชา อธมฺมจารี, ยํ ตาทิสํ ชีวมเทยฺยุ ธงฺกา.

๓๖๘. อธมฺมรูโป วต พฺรหฺมจารี, อนุปฺปิยํ ภาสสิ ขตฺติยสฺส;

วิลุปฺปมานาย ปุถุปฺปชาย, ปูเชสิ ราชํ ปรมปฺปมาทํ [ราชํ ปรมปฺปวาทํ (สี.), ราชา ปรมปฺปวาทึ (สฺยา.)].

๓๖๙. สเจ อิมํ พฺรเหฺม สุรชฺชกํ สิยา, ผีตํ รฏฺฐํ มุทิตํ [ปูริตํ (ก.)] วิปฺปสนฺนํ;

ภุตฺวา พลึ อคฺคปิณฺฑญฺจ กากา, น มาทิสํ ชีวมเทยฺยุ ธงฺกาติ.

คนฺธตินฺทุกชาตกํ ทสมํ.

ตสฺสุทฺทานํ –

กึฉนฺท กุมฺภ ชยทฺทิส ฉทฺทนฺต, อถ ปณฺฑิตสมฺภว สิรกปิ;

ทกรกฺขส ปณฺฑรนาควโร, อถ สมฺพุล ตินฺทุกเทวสุโตติ.

ตึสนิปาตํ นิฏฺฐิตํ.