๔๘๙. สุรุจิชาตกํ (๖)

๑๐๒. มเหสี สุรุจิโน [รุจิโน (สี. สฺยา. ปี.)] ภริยา, อานีตา ปฐมํ อหํ;

ทส วสฺสสหสฺสานิ, ยํ มํ สุรุจิมานยิ.

๑๐๓. สาหํ พฺราหฺมณ ราชานํ, เวเทหํ มิถิลคฺคหํ;

นาภิชานามิ กาเยน, วาจาย อุท เจตสา;

สุรุจึ อติมญฺญิตฺถ [อติมญฺญิตฺโถ (สี. ปี.), อติมญฺญิตา (?)], อาวิ [อาวึ (สี. ปี.)] วา ยทิ วา รโห.

๑๐๔. เอเตน สจฺจวชฺเชน, ปุตฺโต อุปฺปชฺชตํ อิเส;

มุสา เม ภณมานาย, มุทฺธา ผลตุ สตฺตธา.

๑๐๕. ภตฺตุ มม สสฺสุ มาตา, ปิตา จาปิ จ สสฺสุโร;

เต มํ พฺรเหฺม วิเนตาโร, ยาว อฏฺฐํสุ ชีวิตํ.

๑๐๖. สาหํ อหึสารตินี, กามสา [กามโส (สี.)] ธมฺมจารินี [ธมฺมจาริณี (สี.)];

สกฺกจฺจํ เต อุปฏฺฐาสึ, รตฺตินฺทิวมตนฺทิตา.

๑๐๗. เอเตน สจฺจวชฺเชน, ปุตฺโต อุปฺปชฺชตํ อิเส;

มุสา เม ภณมานาย, มุทฺธา ผลตุ สตฺตธา.

๑๐๘. โสฬสิตฺถิสหสฺสานิ, สหภริยานิ พฺราหฺมณ;

ตาสุ อิสฺสา วา โกโธ วา, นาหุ มยฺหํ กุทาจนํ.

๑๐๙. หิเตน ตาสํ นนฺทามิ, น จ เม กาจิ อปฺปิยา;

อตฺตานํวานุกมฺปามิ, สทา สพฺพา สปตฺติโย.

๑๑๐. เอเตน สจฺจวชฺเชน, ปุตฺโต อุปฺปชฺชตํ อิเส;

มุสา เม ภณมานาย, มุทฺธา ผลตุ สตฺตธา.

๑๑๑. ทาเส กมฺมกเร เปสฺเส [โปเส (สฺยา. ก.)], เย จญฺเญ อนุชีวิโน;

เปเสมิ [โปเสมิ (สี. สฺยา. ปี.)] สหธมฺเมน, สทา ปมุทิตินฺทฺริยา.

๑๑๒. เอเตน สจฺจวชฺเชน, ปุตฺโต อุปฺปชฺชตํ อิเส;

มุสา เม ภณมานาย, มุทฺธา ผลตุ สตฺตธา.

๑๑๓. สมเณ พฺราหฺมเณ จาปิ, อญฺเญ จาปิ วนิพฺพเก;

ตปฺเปมิ อนฺนปาเนน, สทา ปยตปาณินี.

๑๑๔. เอเตน สจฺจวชฺเชน, ปุตฺโต อุปฺปชฺชตํ อิเส;

มุสา เม ภณมานาย, มุทฺธา ผลตุ สตฺตธา.

๑๑๕. จาตุทฺทสึ ปญฺจทฺทสึ [ปนฺนรสึ (สี. ปี.)], ยา จ ปกฺขสฺส อฏฺฐมี [อฏฺฐมึ (สี. ปี.)];

ปาฏิหาริยปกฺขญฺจ, อฏฺฐงฺคสุสมาคตํ [อฏฺฐงฺคสุสมาหิตํ (สพฺพตฺถ) วิ. ว. ๑๒๙ ปาฬิยา อฏฺฐกถา ปสฺสิตพฺพา];

อุโปสถํ อุปวสามิ [อุปวสึ (ก.)], สทา สีเลสุ สํวุตา.

๑๑๖. เอเตน สจฺจวชฺเชน, ปุตฺโต อุปฺปชฺชตํ อิเส;

มุสา เม ภณมานาย, มุทฺธา ผลตุ สตฺตธา.

๑๑๗. สพฺเพว เต ธมฺมคุณา, ราชปุตฺติ ยสสฺสินิ;

สํวิชฺชนฺติ ตยิ ภทฺเท, เย ตฺวํ กิตฺเตสิ อตฺตนิ.

๑๑๘. ขตฺติโย ชาติสมฺปนฺโน, อภิชาโต ยสสฺสิมา;

ธมฺมราชา วิเทหานํ, ปุตฺโต อุปฺปชฺชเต ตว [ตวํ (สี. ปี.)].

๑๑๙. ทุมฺมี [รุมฺมี (สี. ปี.)] รโชชลฺลธโร, อเฆ เวหายสํ ฐิโต;

มนุญฺญํ ภาสเส วาจํ, ยํ มยฺหํ หทยงฺคมํ.

๑๒๐. เทวตานุสิ สคฺคมฺหา, อิสิ วาสิ [จาปิ (ก.)] มหิทฺธิโก;

โก วาสิ ตฺวํ อนุปฺปตฺโต, อตฺตานํ เม ปเวทย.

๑๒๑. ยํ เทวสงฺฆา วนฺทนฺติ, สุธมฺมายํ สมาคตา;

โสหํ สกฺโก สหสฺสกฺโข, อาคโตสฺมิ ตวนฺติเก.

๑๒๒. อิตฺถิโย [อิตฺถิยา (ปี.)] ชีวโลกสฺมึ, ยา โหติ [โหนฺติ (สี. สฺยา.)] สมจารินี [สมจาริณี (สี.)];

เมธาวินี สีลวตี, สสฺสุเทวา ปติพฺพตา.

๑๒๓. ตาทิสาย สุเมธาย, สุจิกมฺมาย นาริยา;

เทวา ทสฺสนมายนฺติ, มานุสิยา อมานุสา.

๑๒๔. ตฺวญฺจ ภทฺเท สุจิณฺเณน, ปุพฺเพ สุจริเตน จ;

อิธ ราชกุเล ชาตา, สพฺพกามสมิทฺธินี.

๑๒๕. อยญฺจ เต ราชปุตฺติ, อุภยตฺถ กฏคฺคโห;

เทวโลกูปปตฺตี จ, กิตฺตี จ อิธ ชีวิเต.

๑๒๖. จิรํ สุเมเธ สุขินี, ธมฺมมตฺตนิ ปาลย;

เอสาหํ ติทิวํ ยามิ, ปิยํ เม ตว ทสฺสนนฺติ.

สุรุจิชาตกํ ฉฏฺฐํ.