๔๘๒. รุรุมิคราชชาตกํ (๙)

๑๑๗. ตสฺส [กสฺส (สี. ปี.)] คามวรํ ทมฺมิ, นาริโย จ อลงฺกตา;

โย [โก (สี. สฺยา. ปี.)] เมตํ มิคมกฺขาติ [มกฺขาสิ (สฺยา. ก.)], มิคานํ มิคมุตฺตมํ.

๑๑๘. มยฺหํ คามวรํ เทหิ, นาริโย จ อลงฺกตา;

อหํ เต มิคมกฺขิสฺสํ, มิคานํ มิคมุตฺตมํ.

๑๑๙. เอตสฺมึ วนสณฺฑสฺมึ, อมฺพา สาลา จ ปุปฺผิตา;

อินฺทโคปกสญฺฉนฺนา, เอตฺเถโส ติฏฺฐเต มิโค.

๑๒๐. ธนุํ อเทฺวชฺฌํ [อเทชฺฌํ (สี. ปี.), สรชฺชํ (ก.)] กตฺวาน, อุสุํ สนฺนยฺหุปาคมิ [สนฺธายุปาคมิ (สี. ปี.)];

มิโค จ ทิสฺวา ราชานํ, ทูรโต อชฺฌภาสถ.

๑๒๑. อาคเมหิ มหาราช, มา มํ วิชฺฌิ รเถสภ;

โก นุ เต อิทมกฺขาสิ, เอตฺเถโส ติฏฺฐเต มิโค.

๑๒๒. เอส ปาปจโร โปโส, สมฺม ติฏฺฐติ อารกา;

โสยํ [โส หิ (สี. สฺยา. ปี.)] เม อิทมกฺขาสิ, เอตฺเถโส ติฏฺฐเต มิโค.

๑๒๓. สจฺจํ กิเรว มาหํสุ, นรา เอกจฺจิยา อิธ;

กฏฺฐํ นิปฺลวิตํ เสยฺโย, น เตฺวเวกจฺจิ โย นโร.

๑๒๔. กึ นุ รุรุ ครหสิ มิคานํ, กึ ปกฺขีนํ กึ ปน มานุสานํ;

ภยญฺหิ มํ วินฺทตินปฺปรูปํ, สุตฺวาน ตํ มานุสึ ภาสมานํ.

๑๒๕. ยมุทฺธรึ วาหเน วุยฺหมานํ, มโหทเก สลิเล สีฆโสเต;

ตโตนิทานํ ภยมาคตํ มม, ทุกฺโข หเว ราช อสพฺภิ สงฺคโม.

๑๒๖. โสหํ จตุปฺปตฺตมิมํ วิหงฺคมํ, ตนุจฺฉิทํ หทเย โอสฺสชามิ;

หนามิ ตํ มิตฺตทุพฺภึ อกิจฺจการึ [หนามิ มิตฺตทฺทุ’มกิจฺจการึ (สี. ปี.)], โย ตาทิสํ กมฺมกตํ น ชาเน.

๑๒๗. ธีรสฺส พาลสฺส หเว ชนินฺท, สนฺโต วธํ นปฺปสํสนฺติ ชาตุ;

กามํ ฆรํ คจฺฉตุ ปาปธมฺโม, ยญฺจสฺส ภฏฺฐํ ตเทตสฺส เทหิ;

อหญฺจ เต กามกโร ภวามิ.

๑๒๘. อทฺธา รุรุ อญฺญตโร สตํ โส [สตํ’เส (สี.)], โย ทุพฺภโต [ทุพฺภิโน (สฺยา.), ทูภโต (ปี.)] มานุสสฺส น ทุพฺภิ;

กามํ ฆรํ คจฺฉตุ ปาปธมฺโม, ยญฺจสฺส ภฏฺฐํ ตเทตสฺส ทมฺมิ;

อหญฺจ เต กามจารํ ททามิ.

๑๒๙. สุวิชานํ สิงฺคาลานํ, สกุณานญฺจวสฺสิตํ;

มนุสฺสวสฺสิตํ ราช, ทุพฺพิชานตรํ ตโต.

๑๓๐. อปิ เจ มญฺญตี โปโส, ญาติ มิตฺโต สขาติ วา;

โย ปุพฺเพ สุมโน หุตฺวา, ปจฺฉา สมฺปชฺชเต ทิโส.

๑๓๑. สมาคตา ชานปทา, เนคมา จ สมาคตา;

มิคา สสฺสานิ ขาทนฺติ, ตํ เทโว ปฏิเสธตุ.

๑๓๒. กามํ ชนปโท มาสิ, รฏฺฐญฺจาปิ วินสฺสตุ;

น เตฺววาหํ รุรุํ ทุพฺเภ, ทตฺวา อภยทกฺขิณํ.

๑๓๓. มา เม ชนปโท อาสิ [มา มํ ชนปโท อหุ (สฺยา.)], รฏฺฐญฺจาปิ วินสฺสตุ;

น เตฺววาหํ [น เตฺวว (ก. สี. ก.)] มิคราชสฺส, วรํ ทตฺวา มุสา ภเณติ.

รุรุมิคราชชาตกํ นวมํ.