๔๖๑. ทสรถชาตกํ (๗)

๘๔. เอถ ลกฺขณ สีตา จ, อุโภ โอตรโถทกํ;

เอวายํ ภรโต อาห, ‘‘ราชา ทสรโถ มโต’’.

๘๕. เกน รามปฺปภาเวน, โสจิตพฺพํ น โสจสิ;

ปิตรํ กาลกตํ [กาลงฺกตํ (ก.)] สุตฺวา, น ตํ ปสหเต ทุขํ.

๘๖. ยํ น สกฺกา นิปาเลตุํ, โปเสน ลปตํ พหุํ;

ส กิสฺส วิญฺญู เมธาวี, อตฺตานมุปตาปเย.

๘๗. ทหรา จ หิ วุทฺธา จ [เย วุทฺธา (สี. อฏฺฐ.), เย วุฑฺฒา (สฺยา.)], เย พาลา เย จ ปณฺฑิตา;

อฑฺฒา เจว ทลิทฺทา จ, สพฺเพ มจฺจุปรายณา.

๘๘. ผลานมิว ปกฺกานํ, นิจฺจํ ปตนโต ภยํ;

เอวํ ชาตาน มจฺจานํ, นิจฺจ มรณโต ภยํ.

๘๙. สายเมเก น ทิสฺสนฺติ, ปาโต ทิฏฺฐา พหุชฺชนา;

ปาโต เอเก น ทิสฺสนฺติ, สายํ ทิฏฺฐา พหุชฺชนา.

๙๐. ปริเทวยมาโน เจ, กิญฺจิทตฺถํ อุทพฺพเห;

สมฺมูโฬฺห หึสมตฺตานํ, กยิรา ตํ วิจกฺขโณ.

๙๑. กิโส วิวณฺโณ ภวติ, หึสมตฺตานมตฺตโน [มตฺตนา (สี. อฏฺฐ. สุ. นิ. ๕๙๐)];

น เตน เปตา ปาเลนฺติ, นิรตฺถา ปริเทวนา.

๙๒. ยถา สรณมาทิตฺตํ, วารินา ปรินิพฺพเย [วารินาวนิพฺพาปเย (สฺยา. ก.)];

เอวมฺปิ ธีโร สุตวา, เมธาวี ปณฺฑิโต นโร;

ขิปฺปมุปฺปติตํ โสกํ, วาโต ตูลํว ธํสเย.

๙๓. มจฺโจ เอโกว [เอโกว มจฺโจ (สี. สฺยา. ปี.)] อจฺเจติ, เอโกว ชายเต กุเล;

สํโยคปรมาเตฺวว, สมฺโภคา สพฺพปาณินํ.

๙๔. ตสฺมา หิ ธีรสฺส พหุสฺสุตสฺส, สมฺปสฺสโต โลกมิมํ ปรญฺจ;

อญฺญาย ธมฺมํ หทยํ มนญฺจ, โสกา มหนฺตาปิ น ตาปยนฺติ.

๙๕. โสหํ ทสฺสญฺจ โภกฺขญฺจ, ภริสฺสามิ จ [โสหํ ยสญฺจ โภคญฺจ, ภริยาปิ จ (สฺยา. ก.)] ญาตเก;

เสสญฺจ ปาลยิสฺสามิ, กิจฺจเมตํ [กิจฺจเมวํ (ปี.)] วิชานโต.

๙๖. ทส วสฺสสหสฺสานิ, สฏฺฐิ วสฺสสตานิ จ;

กมฺพุคีโว มหาพาหุ, ราโม รชฺชมการยีติ.

ทสรถชาตกํ สตฺตมํ.