๔๖๒. สํวรชาตกํ (๘)

๙๗. ชานนฺโต โน มหาราช, ตว สีลํ ชนาธิโป;

อิเม กุมาเร ปูเชนฺโต, น ตํ เกนจิ มญฺญถ.

๙๘. ติฏฺฐนฺเต โน มหาราเช, อทุ [อาทุ (สี. ปี.), อาทู (สฺยา.)] เทเว ทิวงฺคเต;

ญาตี ตํ สมนุญฺญึสุ, สมฺปสฺสํ อตฺถมตฺตโน.

๙๙. เกน สํวรวตฺเตน, สญฺชาเต อภิติฏฺฐสิ;

เกน ตํ นาติวตฺตนฺติ, ญาติสงฺฆา สมาคตา.

๑๐๐. น ราชปุตฺต อุสูยามิ [ราชปุตฺต นุสฺสุยฺยามิ (ก.)], สมณานํ มเหสินํ;

สกฺกจฺจํ เต นมสฺสามิ, ปาเท วนฺทามิ ตาทินํ.

๑๐๑. เต มํ ธมฺมคุเณ ยุตฺตํ, สุสฺสูสมนุสูยกํ;

สมณา มนุสาสนฺติ [สมนุสาสนฺติ (สี. สฺยา. ปี.)], อิสี ธมฺมคุเณ รตา.

๑๐๒. เตสาหํ วจนํ สุตฺวา, สมณานํ มเหสินํ;

น กิญฺจิ อติมญฺญามิ, ธมฺเม เม นิรโต มโน.

๑๐๓. หตฺถาโรหา อนีกฏฺฐา, รถิกา ปตฺติการกา;

เตสํ [เตสุ (ปี.)] นปฺปฏิพนฺธามิ, นิวิฏฺฐํ [นิพทฺธํ (สี. ปี.)] ภตฺตเวตนํ.

๑๐๔. มหามตฺตา จ เม อตฺถิ, มนฺติโน ปริจารกา;

พาราณสึ โวหรนฺติ, พหุมํสสุโรทกํ.

๑๐๕. อโถปิ วาณิชา ผีตา, นานารฏฺเฐหิ อาคตา;

เตสุ เม วิหิตา รกฺขา, เอวํ ชานาหุโปสถ.

๑๐๖. ธมฺเมน กิร ญาตีนํ, รชฺชํ กาเรหิ สํวร;

เมธาวี ปณฺฑิโต จาสิ [จาปิ (สี. ปี.)], อโถปิ ญาตินํ หิโต.

๑๐๗. ตํ ตํ ญาติปริพฺยูฬฺหํ, นานารตนโมจิตํ;

อมิตฺตา นปฺปสหนฺติ, อินฺทํว อสุราธิโปติ.

สํวรชาตกํ อฏฺฐมํ.