๔๖๐. ยุธญฺจยชาตกํ (๖)

๗๓. มิตฺตามจฺจปริพฺยูฬฺหํ [ปริพฺพูฬฺหํ (สี. ปี.)], อหํ วนฺเท รเถสภํ;

ปพฺพชิสฺสามหํ ราช [ปพฺพชิสฺสํ มหาราช (สี. ปี.)], ตํ เทโว อนุมญฺญตุ.

๗๔. สเจ เต อูนํ กาเมหิ, อหํ ปริปูรยามิ [อหํว ปูรยามิ (ก.)] เต;

โย ตํ หึสติ วาเรมิ, มา ปพฺพช [ปพฺพชิ (ปี.)] ยุธญฺจย [ยุธญฺชย (สี. สฺยา.), ยุวญฺชย (ปี.)].

๗๕. น มตฺถิ อูนํ กาเมหิ, หึสิตา เม น วิชฺชติ;

ทีปญฺจ กาตุมิจฺฉามิ, ยํ ชรา นาภิกีรติ.

๗๖. ปุตฺโต วา ปิตรํ ยาเจ, ปิตา วา ปุตฺตโมรสํ;

เนคโม ตํ ยาเจ [เนคโม ยาจเต (สี. สฺยา. ปี.)] ตาต, มา ปพฺพช ยุธญฺจย.

๗๗. มา มํ เทว นิวาเรหิ, ปพฺพชนฺตํ รเถสภ;

มาหํ กาเมหิ สมฺมตฺโต, ชราย วสมนฺวคู.

๗๘. อหํ ตํ ตาต ยาจามิ, อหํ ปุตฺต นิวารเย;

จิรํ ตํ ทฏฺฐุมิจฺฉามิ, มา ปพฺพช ยุธญฺจย.

๗๙. อุสฺสาโวว ติณคฺคมฺหิ, สูริยุคฺคมนํ ปติ;

เอวมายุ มนุสฺสานํ, มา มํ อมฺม นิวารย.

๘๐. ตรมาโน อิมํ ยานํ, อาโรเปตุ [ตรมานา อิมํ ยานํ, อาโรเปนฺตุ (สี. ปี.)] รเถสภ;

มา เม มาตา ตรนฺตสฺส, อนฺตรายกรา อหุ.

๘๑. อภิธาวถ ภทฺทนฺเต, สุญฺญํ เหสฺสติ รมฺมกํ;

ยุธญฺจโย อนุญฺญาโต, สพฺพทตฺเตน ราชินา.

๘๒. โยหุ เสฏฺโฐ สหสฺสสฺส [มนุสฺสานํ (สฺยา.), สหสฺสานํ (ก.)], ยุวา กญฺจนสนฺนิโภ;

โสยํ กุมาโร ปพฺพชิโต, กาสายวสโน พลี.

๘๓. อุโภ กุมารา ปพฺพชิตา, ยุธญฺจโย ยุธิฏฺฐิโล;

ปหาย มาตาปิตโร, สงฺคํ เฉตฺวาน มจฺจุโนติ.

ยุธญฺจยชาตกํ ฉฏฺฐํ.