๔๕๙. ปานียชาตกํ (๕)

๕๙. มิตฺโต มิตฺตสฺส ปานียํ, อทินฺนํ ปริภุญฺชิสํ;

เตน ปจฺฉา วิชิคุจฺฉึ, ตํ ปาปํ ปกตํ มยา;

มา ปุน อกรํ ปาปํ, ตสฺมา ปพฺพชิโต อหํ.

๖๐. ปรทารญฺจ ทิสฺวาน, ฉนฺโท เม อุทปชฺชถ [อุปปชฺชถ (สฺยา. ก.)];

เตน ปจฺฉา วิชิคุจฺฉึ, ตํ ปาปํ ปกตํ มยา;

มา ปุน อกรํ ปาปํ, ตสฺมา ปพฺพชิโต อหํ.

๖๑. ปิตรํ เม มหาราช, โจรา อคณฺหุ [อคณฺหุํ (สี. ปี.), อคณฺหิ (ก.)] กานเน;

เตสาหํ ปุจฺฉิโต ชานํ, อญฺญถา นํ วิยากรึ.

๖๒. เตน ปจฺฉา วิชิคุจฺฉึ, ตํ ปาปํ ปกตํ มยา;

มา ปุน อกรํ ปาปํ, ตสฺมา ปพฺพชิโต อหํ.

๖๓. ปาณาติปาตมกรุํ, โสมยาเค อุปฏฺฐิเต;

เตสาหํ สมนุญฺญาสึ, เตน ปจฺฉา วิชิคุจฺฉึ.

๖๔. ตํ ปาปํ ปกตํ มยา, มา ปุน อกรํ ปาปํ;

ตสฺมา ปพฺพชิโต อหํ.

๖๕. สุราเมรยมาธุกา [มธุกา (สี. สฺยา. ปี.)], เย ชนา ปฐมาสุ โน;

พหูนํ เต อนตฺถาย, มชฺชปานมกปฺปยุํ.

๖๖. เตสาหํ สมนุญฺญาสึ, เตน ปจฺฉา วิชิคุจฺฉึ;

ตํ ปาปํ ปกตํ มยา, มา ปุน อกรํ ปาปํ;

ตสฺมา ปพฺพชิโต อหํ.

๖๗. ธิรตฺถุ สุพหู กาเม, ทุคฺคนฺเธ พหุกณฺฏเก;

เย อหํ ปฏิเสวนฺโต, นาลภึ ตาทิสํ สุขํ.

๖๘. มหสฺสาทา สุขา กามา, นตฺถิ กามา ปรํ [กามปรํ (สี. ปี.)] สุขํ;

เย กาเม ปฏิเสวนฺติ, สคฺคํ เต อุปปชฺชเร.

๖๙. อปฺปสฺสาทา ทุขา กามา, นตฺถิ กามา ปรํ ทุขํ;

เย กาเม ปฏิเสวนฺติ, นิรยํ เต อุปปชฺชเร.

๗๐. อสี ยถา สุนิสิโต, เนตฺตึโสว สุปายิโก [สุปาสิโต (ก. สี. นิยฺย), สุปายิโต (ก. อฏฺฐ.)];

สตฺตีว อุรสิ ขิตฺตา, กามา ทุกฺขตรา ตโต.

๗๑. องฺคารานํว ชลิตํ, กาสุํ สาธิกโปริสํ;

ผาลํว ทิวสํตตฺตํ, กามา ทุกฺขตรา ตโต.

๗๒. วิสํ ยถา หลาหลํ, เตลํ ปกฺกุถิตํ [อุกฺกฏฺฐิตํ (สี. ปี.), ปกฺกุฏฺฐิตํ (สฺยา.)] ยถา;

ตมฺพโลห [ตมฺปโลหํ (สฺยา.)] วิลีนํว, กามา ทุกฺขตรา ตโตติ.

ปานียชาตกํ ปญฺจมํ.