๔. กุลาวกวคฺโค

๓๑. กุลาวกา มาตลิ สิมฺพลิสฺมึ, อีสามุเขน ปริวชฺชยสฺสุ;

กามํ จชาม อสุเรสุ ปาณํ, มา เม ทิชา วิกฺกุลวา [มายิเม ทิชา วิกุลาวา (สี. สฺยา. ปี.)] อเหสุนฺติ.

กุลาวกชาตกํ ปฐมํ.

๓๒. รุทํ มนุญฺญํ รุจิรา จ ปิฏฺฐิ, เวฬุริยวณฺณูปนิภา [วณฺณูปฏิภา (สฺยา.), วณฺณสนฺนิภา (ก.)] จ คีวา;

พฺยามมตฺตานิ จ เปขุณานิ, นจฺเจน เต ธีตรํ โน ททามีติ.

นจฺจชาตกํ ทุติยํ.

๓๓. สมฺโมทมานา คจฺฉนฺติ, ชาลมาทาย ปกฺขิโน;

ยทา เต วิวทิสฺสนฺติ, ตทา เอหินฺติ เม วสนฺติ.

สมฺโมทมานชาตกํ ตติยํ.

๓๔. น มํ สีตํ น มํ อุณฺหํ, น มํ ชาลสฺมิ พาธนํ;

ยญฺจ มํ มญฺญเต มจฺฉี, อญฺญํ โส รติยา คโตติ.

มจฺฉชาตกํ จตุตฺถํ.

๓๕. สนฺติ ปกฺขา อปตนา, สนฺติ ปาทา อวญฺจนา;

มาตาปิตา จ นิกฺขนฺตา, ชาตเวท ปฏิกฺกมาติ.

วฏฺฏกชาตกํ ปญฺจมํ.

๓๖. ยํ นิสฺสิตา ชคติรุหํ วิหงฺคมา, สฺวายํ อคฺคึ ปมุญฺจติ;

ทิสา ภชถ วกฺกงฺคา [วงฺกงฺคา (สฺยา.)], ชาตํ สรณโต ภยนฺติ.

สกุณชาตกํ ฉฏฺฐํ.

๓๗. เย วุฑฺฒ [วทฺธ (สี. ปี.)] มปจายนฺติ, นรา ธมฺมสฺส โกวิทา;

ทิฏฺเฐว ธมฺเม ปาสํสา, สมฺปราเย จ สุคฺคตีติ.

ติตฺติรชาตกํ สตฺตมํ.

๓๘. นาจฺจนฺตํ นิกติปฺปญฺโญ, นิกตฺยา สุขเมธติ;

อาราเธติ นิกติปฺปญฺโญ [อาราเธ นิกติปฺปญฺโญ (ปี.)], พโก กกฺกฏกามิวาติ.

พกชาตกํ อฏฺฐมํ.

๓๙. มญฺเญ โสวณฺณโย ราสิ, โสณฺณมาลา จ นนฺทโก;

ยตฺถ ทาโส อามชาโต, ฐิโต ถุลฺลานิ [ถูลานิ (ก.)] คชฺชตีติ.

นนฺทชาตกํ นวมํ.

๔๐. กามํ ปตามิ นิรยํ, อุทฺธํปาโท อวํสิโร;

นานริยํ กริสฺสามิ, หนฺท ปิณฺฑํ ปฏิคฺคหาติ.

ขทิรงฺคารชาตกํ ทสมํ.

กุลาวกวคฺโค จตุตฺโถ.

ตสฺสุทฺทานํ –

สิริมาตลิ ธีตร ปกฺขิวโร, รติยาคโต มาตาปิตา จ ปุน;

ชคตีรุห วุฑฺฒ สุกกฺกฏโก, ตถา นนฺทกปิณฺฑวเรน ทสาติ.