๑๕. กกณฺฏกวคฺโค

๑๔๑. โคธชาตกํ

๑๔๑. น ปาปชนสํเสวี, อจฺจนฺตสุขเมธติ;

โคธากุลํ [โคธกฺกุลํ (ก.)] กกณฺฏาว [กกณฺฏกา (ก.)], กลึ ปาเปติ อตฺตนนฺติ.

โคธชาตกํ ปฐมํ.

๑๔๒. สิงฺคาลชาตกํ

๑๔๒. เอตญฺหิ เต ทุราชานํ, ยํ เสสิ มตสายิกํ;

ยสฺส เต กฑฺฒมานสฺส, หตฺถา ทณฺโฑ น มุจฺจตีติ.

สิงฺคาลชาตกํ ทุติยํ.

๑๔๓. วิโรจชาตกํ

๑๔๓. ลสี จ เต นิปฺผลิตา, มตฺถโก จ ปทาลิโต [วิทาลิโต (สี. ปี.)];

สพฺพา เต ผาสุกา ภคฺคา, อชฺช โข ตฺวํ วิโรจสีติ.

วิโรจชาตกํ ตติยํ.

๑๔๔. นงฺคุฏฺฐชาตกํ

๑๔๔. พหุมฺเปตํ อสพฺภิ [พหุเปตมสพฺภิ (ก.)] ชาตเวท, ยํ ตํ วาลธินาภิปูชยาม;

มํสารหสฺส นตฺถชฺช มํสํ, นงฺคุฏฺฐมฺปิ ภวํ ปฏิคฺคหาตูติ.

นงฺคุฏฺฐชาตกํ จตุตฺถํ.

๑๔๕. ราธชาตกํ

๑๔๕. น ตฺวํ ราธ วิชานาสิ, อฑฺฒรตฺเต อนาคเต;

อพฺยยตํ [อพฺยายตํ (สี. สฺยา. ปี.), อพฺยตฺตตํ (?)] วิลปสิ, วิรตฺตา โกสิยายเนติ.

ราธชาตกํ ปญฺจมํ.

๑๔๖. สมุทฺทกากชาตกํ

๑๔๖. อปิ นุ หนุกา สนฺตา, มุขญฺจ ปริสุสฺสติ;

โอรมาม น ปาเรม, ปูรเตว มโหทธีติ.

สมุทฺทกากชาตกํ ฉฏฺฐํ.

๑๔๗. ปุปฺผรตฺตชาตกํ

๑๔๗. นยิทํ ทุกฺขํ อทุํ ทุกฺขํ, ยํ มํ ตุทติ วายโส;

ยํ สามา ปุปฺผรตฺเตน, กตฺติกํ นานุโภสฺสตีติ.

ปุปฺผรตฺตชาตกํ สตฺตมํ.

๑๔๘. สิงฺคาลชาตกํ

๑๔๘. นาหํ ปุนํ น จ ปุนํ, น จาปิ อปุนปฺปุนํ;

หตฺถิโพนฺทึ ปเวกฺขามิ, ตถา หิ ภยตชฺชิโตติ.

สิงฺคาลชาตกํ อฏฺฐมํ.

๑๔๙. เอกปณฺณชาตกํ

๑๔๙. เอกปณฺโณ อยํ รุกฺโข, น ภูมฺยา จตุรงฺคุโล;

ผเลน วิสกปฺเปน, มหายํ กึ ภวิสฺสตีติ.

เอกปณฺณชาตกํ นวมํ.

๑๕๐. สญฺชีวชาตกํ

๑๕๐. อสนฺตํ โย ปคฺคณฺหาติ, อสนฺตํ จูปเสวติ;

ตเมว ฆาสํ กุรุเต, พฺยคฺโฆ สญฺชีวโก ยถาติ.

สญฺชีวชาตกํ ทสมํ.

กกณฺฏก [ปาปเสวน (ก.)] วคฺโค ปนฺนรสโม.

ตสฺสุทฺทานํ –

สุขเมธติ ทณฺฑวโร จ ปุน, ลสิ วาลธิ ปญฺจมราธวโร;

สมโหทธิ กตฺติก โพนฺทิ ปุน, จตุรงฺคุลพฺยคฺฆวเรน ทสาติ.

(อุปริโม ปณฺณาสโก.) [( ) สีหฬโปตฺถเกเยว ทิสฺสติ]

อถ วคฺคุทฺทานํ –

อปณฺณกํ สีลวคฺคกุรุงฺค, กุลาวกํ อตฺถกาเมน ปญฺจมํ;

อาสีโส อิตฺถิวรุณํ อปายิ, ลิตฺตวคฺเคน เต ทส;

ปโรสตํ หํจิ กุสนาฬิ [หํสิ สริกฺขํ (สพฺพตฺถ)], อสมฺปทํ กกณฺฏกวคฺโค.

เอกนิปาตมฺหิลงฺกตนฺติ.

เอกกนิปาตํ นิฏฺฐิตํ.