๑๒. หํจิวคฺโค

๑๑๑. หํจิ [หํสิ (สี. สฺยา.), หญฺจิ (?)] ตุวํ เอวมญฺญสิ เสยฺโย, ปุตฺเตน ปิตาติ ราชเสฏฺฐ;

หนฺทสฺสตรสฺส เต อยํ, อสฺสตรสฺส หิ คทฺรโภ ปิตาติ.

คทฺรภปญฺหชาตกํ ปฐมํ.

๑๑๒. เยน สตฺตุพิลงฺคา จ, ทิคุณปลาโส จ ปุปฺผิโต;

เยน ททามิ [เยนา’ทามิ (สี. สฺยา.)] เตน วทามิ, เยน น ททามิ [เยน นา’ทามิ (สี. สฺยา.)] น เตน วทามิ;

เอส มคฺโค ยวมชฺฌกสฺส, เอตํ ฉนฺนปถํ วิชานาหีติ.

อมราเทวีปญฺหชาตกํ ทุติยํ.

๑๑๓. สทฺทหาสิ สิงฺคาลสฺส [สิคาลสฺส (สี. สฺยา. ปี.)], สุราปีตสฺส พฺราหฺมณ;

สิปฺปิกานํ สตํ นตฺถิ, กุโต กํสสตา ทุเวติ.

สิงฺคาลชาตกํ ตติยํ.

๑๑๔. พหุจินฺตี อปฺปจินฺตี, อุโภ ชาเล อพชฺฌเร;

มิตจินฺตี ปโมเจสี, อุโภ ตตฺถ สมาคตาติ.

มิตจินฺติชาตกํ จตุตฺถํ.

๑๑๕. ยายญฺญ [ยายญฺเญ (ก.)] มนุสาสติ, สยํ โลลุปฺปจารินี;

สายํ วิปกฺขิกา เสติ, หตา จกฺเกน สาสิกาติ [สาลิกาติ (สี. สฺยา. ปี.)].

อนุสาสิกชาตกํ ปญฺจมํ.

๑๑๖. อติกรมกราจริย, มยฺหมฺเปตํ น รุจฺจติ;

จตุตฺเถ ลงฺฆยิตฺวาน, ปญฺจมายสิ อาวุโตติ.

ทุพฺพจชาตกํ ฉฏฺฐํ.

๑๑๗. อจฺจุคฺคตาติลปตา [อติพลตา (สี. สฺยา. ปี.), อติลปกา (กตฺถจิ)], อติเวลํ ปภาสิตา;

วาจา หนติ ทุมฺเมธํ, ติตฺติรํวาติวสฺสิตนฺติ.

ติตฺติรชาตกํ สตฺตมํ.

๑๑๘. นาจินฺตยนฺโต ปุริโส, วิเสสมธิคจฺฉติ;

จินฺติตสฺส ผลํ ปสฺส, มุตฺโตสฺมิ วธพนฺธนาติ.

วฏฺฏกชาตกํ อฏฺฐมํ.

๑๑๙. อมาตาปิตรสํวทฺโธ [ปิตริ (สี. ปี.), ปิตุ (สฺยา.)], อนาเจรกุเล วสํ;

นายํ กาลํ อกาลํ วา, อภิชานาติ กุกฺกุโฏติ.

อกาลราวิชาตกํ นวมํ.

๑๒๐. อพทฺธา ตตฺถ พชฺฌนฺติ, ยตฺถ พาลา ปภาสเร;

พทฺธาปิ ตตฺถ มุจฺจนฺติ, ยตฺถ ธีรา ปภาสเรติ.

พนฺธนโมกฺขชาตกํ ทสมํ.

หํจิวคฺโค [หํสิวคฺโค (สี. สฺยา.)] ทฺวาทสโม.

ตสฺสุทฺทานํ –

อถ คทฺรภ สตฺตุว กํสสตํ, พหุจินฺติ สาสิกายาติกร;

อติเวล วิเสสมนาจริโยว, ธีราปภาสรเตน ทสาติ.