๑๐. ลิตฺตวคฺโค

๙๑. ลิตฺตํ ปรเมน เตชสา, คิลมกฺขํ ปุริโส น พุชฺฌติ;

คิล เร คิล ปาปธุตฺตก, ปจฺฉา เต กฏุกํ ภวิสฺสตีติ.

ลิตฺตชาตกํ ปฐมํ.

๙๒. อุกฺกฏฺเฐ สูรมิจฺฉนฺติ, มนฺตีสุ อกุตูหลํ;

ปิยญฺจ อนฺนปานมฺหิ, อตฺเถ ชาเต จ ปณฺฑิตนฺติ.

มหาสารชาตกํ ทุติยํ.

๙๓. น วิสฺสเส อวิสฺสตฺเถ, วิสฺสตฺเถปิ น วิสฺสเส;

วิสฺสาสา ภยมเนฺวติ, สีหํว มิคมาตุกาติ [มิคมาตุยา (ก.)].

วิสาสโภชนชาตกํ ตติยํ.

๙๔. โสตตฺโต โสสินฺโท [โสสีโต (สี. สฺยา. ปี.), โสสิโน (ก.)] เจว, เอโก ภึสนเก วเน;

นคฺโค น จคฺคิมาสีโน, เอสนาปสุโต มุนีติ.

โลมหํสชาตกํ จตุตฺถํ.

๙๕. อนิจฺจา วต สงฺขารา, อุปฺปาทวยธมฺมิโน;

อุปฺปชฺชิตฺวา นิรุชฺฌนฺติ, เตสํ วูปสโม สุโขติ.

มหาสุทสฺสนชาตกํ ปญฺจมํ.

๙๖. สมติตฺติกํ อนวเสกํ, เตลปตฺตํ ยถา ปริหเรยฺย;

เอวํ สจิตฺตมนุรกฺเข, ปตฺถยาโน ทิสํ อคตปุพฺพนฺติ.

เตลปตฺตชาตกํ ฉฏฺฐํ.

๙๗. ชีวกญฺจ มตํ ทิสฺวา, ธนปาลิญฺจ ทุคฺคตํ;

ปนฺถกญฺจ วเน มูฬฺหํ, ปาปโก ปุนราคโตติ.

นามสิทฺธิชาตกํ สตฺตมํ.

๙๘. สาธุ โข ปณฺฑิโต นาม, น เตฺวว อติปณฺฑิโต;

อติปณฺฑิเตน ปุตฺเตน, มนมฺหิ อุปกูฬิโตติ [อุปกูลิโตติ (สี.), อุปกุฏฺฐิโตติ (สฺยา.), อุปกุฏิโต (ก.)].

กูฏวาณิชชาตกํ อฏฺฐมํ.

๙๙. ปโรสหสฺสมฺปิ สมาคตานํ, กนฺเทยฺยุํ เต วสฺสสตํ อปญฺญา;

เอโกว เสยฺโย ปุริโส สปญฺโญ, โย ภาสิตสฺส วิชานาติ อตฺถนฺติ.

ปโรสหสฺสชาตกํ นวมํ.

๑๐๐. อสาตํ สาตรูเปน, ปิยรูเปน อปฺปิยํ;

ทุกฺขํ สุขสฺส รูเปน, ปมตฺตมติวตฺตตีติ.

อสาตรูปชาตกํ ทสมํ.

ลิตฺตวคฺโค ทสโม.

ตสฺสุทฺทานํ –

คิลมกฺขกุตูหล มาตุกสฺสา, มุนินา จ อนิจฺจต ปตฺตวรํ;

ธนปาลิวโร อติปณฺฑิตโก, สปโรสหสฺสอสาตทสาติ.

มชฺฌิโม ปณฺณาสโก.