๙. ปาปวคฺโค

๑๑๖. อภิตฺถเรถ กลฺยาเณ, ปาปา จิตฺตํ นิวารเย;

ทนฺธญฺหิ กโรโต ปุญฺญํ, ปาปสฺมึ รมตี มโน.

๑๑๗. ปาปญฺเจ ปุริโส กยิรา, น นํ [น ตํ (สี. ปี.)] กยิรา ปุนปฺปุนํ;

น ตมฺหิ ฉนฺทํ กยิราถ, ทุกฺโข ปาปสฺส อุจฺจโย.

๑๑๘. ปุญฺญญฺเจ ปุริโส กยิรา, กยิรา นํ [กยิราเถตํ (สี. สฺยา.), กยิราเถนํ (ปี.)] ปุนปฺปุนํ;

ตมฺหิ ฉนฺทํ กยิราถ, สุโข ปุญฺญสฺส อุจฺจโย.

๑๑๙. ปาโปปิ ปสฺสติ ภทฺรํ, ยาว ปาปํ น ปจฺจติ;

ยทา จ ปจฺจติ ปาปํ, อถ ปาโป ปาปานิ [อถ ปาปานิ (?)] ปสฺสติ.

๑๒๐. ภโทฺรปิ ปสฺสติ ปาปํ, ยาว ภทฺรํ น ปจฺจติ;

ยทา จ ปจฺจติ ภทฺรํ, อถ ภโทฺร ภทฺรานิ [อถ ภทฺรานิ (?)] ปสฺสติ.

๑๒๑. มาวมญฺเญถ [มาปฺปมญฺเญถ (สี. สฺยา. ปี.)] ปาปสฺส, น มนฺตํ [น มํ ตํ (สี. ปี.), น มตฺตํ (สฺยา.)] อาคมิสฺสติ;

อุทพินฺทุนิปาเตน, อุทกุมฺโภปิ ปูรติ;

พาโล ปูรติ [ปูรติ พาโล (สี. ก.), อาปูรติ พาโล (สฺยา.)] ปาปสฺส, โถกํ โถกมฺปิ [โถก โถกมฺปิ (สี. ปี.)] อาจินํ.

๑๒๒. มาวมญฺเญถ ปุญฺญสฺส, น มนฺตํ อาคมิสฺสติ;

อุทพินฺทุนิปาเตน, อุทกุมฺโภปิ ปูรติ;

ธีโร ปูรติ ปุญฺญสฺส, โถกํ โถกมฺปิ อาจินํ.

๑๒๓. วาณิโชว ภยํ มคฺคํ, อปฺปสตฺโถ มหทฺธโน;

วิสํ ชีวิตุกาโมว, ปาปานิ ปริวชฺชเย.

๑๒๔. ปาณิมฺหิ เจ วโณ นาสฺส, หเรยฺย ปาณินา วิสํ;

นาพฺพณํ วิสมเนฺวติ, นตฺถิ ปาปํ อกุพฺพโต.

๑๒๕. โย อปฺปทุฏฺฐสฺส นรสฺส ทุสฺสติ, สุทฺธสฺส โปสสฺส อนงฺคณสฺส;

ตเมว พาลํ ปจฺเจติ ปาปํ, สุขุโม รโช ปฏิวาตํว ขิตฺโต.

๑๒๖. คพฺภเมเก อุปฺปชฺชนฺติ, นิรยํ ปาปกมฺมิโน;

สคฺคํ สุคติโน ยนฺติ, ปรินิพฺพนฺติ อนาสวา.

๑๒๗. น อนฺตลิกฺเข น สมุทฺทมชฺเฌ, น ปพฺพตานํ วิวรํ ปวิสฺส [ปวิสํ (สฺยา.)];

น วิชฺชตี [น วิชฺชติ (ก. สี. ปี. ก.)] โส ชคติปฺปเทโส, ยตฺถฏฺฐิโต [ยตฺรฏฺฐิโต (สฺยา.)] มุจฺเจยฺย ปาปกมฺมา.

๑๒๘. น อนฺตลิกฺเข น สมุทฺทมชฺเฌ, น ปพฺพตานํ วิวรํ ปวิสฺส;

น วิชฺชตี โส ชคติปฺปเทโส, ยตฺถฏฺฐิตํ [ยตฺรฏฺฐิตํ (สฺยา.)] นปฺปสเหยฺย มจฺจุ.

ปาปวคฺโค นวโม นิฏฺฐิโต.