๖. นิมิราชจริยา

๔๐. ‘‘ปุนาปรํ ยทา โหมิ, มิถิลายํ ปุรุตฺตเม;

นิมิ นาม มหาราชา, ปณฺฑิโต กุสลตฺถิโก.

๔๑. ‘‘ตทาหํ มาปยิตฺวาน, จตุสฺสาลํ จตุมฺมุขํ;

ตตฺถ ทานํ ปวตฺเตสึ, มิคปกฺขินราทินํ.

๔๒. ‘‘อจฺฉาทนญฺจ สยนํ, อนฺนํ ปานญฺจ โภชนํ;

อพฺโพจฺฉินฺนํ กริตฺวาน, มหาทานํ ปวตฺตยึ.

๔๓. ‘‘ยถาปิ เสวโก สามึ, ธนเหตุมุปาคโต;

กาเยน วาจา มนสา, อาราธนียเมสติ.

๔๔. ‘‘ตเถวาหํ สพฺพภเว, ปริเยสิสฺสามิ โพธิชํ;

ทาเนน สตฺเต ตปฺเปตฺวา, อิจฺฉามิ โพธิมุตฺตม’’นฺติ.

นิมิราชจริยํ ฉฏฺฐํ.