๑๐. สสปณฺฑิตจริยา

๑๒๕. ‘‘ปุนาปรํ ยทา โหมิ, สสโก ปวนจารโก;

ติณปณฺณสากผลภกฺโข, ปรเหฐนวิวชฺชิโต.

๑๒๖. ‘‘มกฺกโฏ จ สิงฺคาโล จ, สุตฺตโปโต จหํ ตทา;

วสาม เอกสามนฺตา, สายํ ปาโต จ ทิสฺสเร [สายํ ปาโต ปทิสฺสเร (ก.)].

๑๒๗. ‘‘อหํ เต อนุสาสามิ, กิริเย กลฺยาณปาปเก;

‘ปาปานิ ปริวชฺเชถ, กลฺยาเณ อภินิวิสฺสถ’.

๑๒๘. ‘‘อุโปสถมฺหิ ทิวเส, จนฺทํ ทิสฺวาน ปูริตํ;

เอเตสํ ตตฺถ อาจิกฺขึ, ทิวโส อชฺชุโปสโถ.

๑๒๙. ‘‘ทานานิ ปฏิยาเทถ, ทกฺขิเณยฺยสฺส ทาตเว;

ทตฺวา ทานํ ทกฺขิเณยฺเย, อุปวสฺสถุโปสถํ.

๑๓๐. ‘‘เต เม สาธูติ วตฺวาน, ยถาสตฺติ ยถาพลํ;

ทานานิ ปฏิยาเทตฺวา, ทกฺขิเณยฺยํ คเวสิสุํ [คเวสยฺยุํ (ก.)].

๑๓๑. ‘‘อหํ นิสชฺช จินฺเตสึ, ทานํ ทกฺขิณนุจฺฉวํ;

‘ยทิหํ ลเภ ทกฺขิเณยฺยํ, กึ เม ทานํ ภวิสฺสติ.

๑๓๒. ‘‘‘น เม อตฺถิ ติลา มุคฺคา, มาสา วา ตณฺฑุลา ฆตํ;

อหํ ติเณน ยาเปมิ, น สกฺกา ติณ ทาตเว.

๑๓๓. ‘‘‘ยทิ โกจิ เอติ ทกฺขิเณยฺโย, ภิกฺขาย มม สนฺติเก;

ทชฺชาหํ สกมตฺตานํ, น โส ตุจฺโฉ คมิสฺสติ’.

๑๓๔. ‘‘มม สงฺกปฺปมญฺญาย, สกฺโก พฺราหฺมณวณฺณินา;

อาสยํ เม อุปาคจฺฉิ, ทานวีมํสนาย เม.

๑๓๕. ‘‘ตมหํ ทิสฺวาน สนฺตุฏฺโฐ, อิทํ วจนมพฺรวึ;

‘สาธุ โขสิ อนุปฺปตฺโต, ฆาสเหตุ มมนฺติเก.

๑๓๖. ‘‘‘อทินฺนปุพฺพํ ทานวรํ, อชฺช ทสฺสามิ เต อหํ;

ตุวํ สีลคุณูเปโต, อยุตฺตํ เต ปรเหฐนํ.

๑๓๗. ‘‘‘เอหิ อคฺคึ ปทีเปหิ, นานากฏฺเฐ สมานย;

อหํ ปจิสฺสมตฺตานํ, ปกฺกํ ตฺวํ ภกฺขยิสฺสสิ’.

๑๓๘. ‘‘‘สาธู’ติ โส หฏฺฐมโน, นานากฏฺเฐ สมานยิ;

มหนฺตํ อกาสิ จิตกํ, กตฺวา องฺคารคพฺภกํ.

๑๓๙. ‘‘อคฺคึ ตตฺถ ปทีเปสิ, ยถา โส ขิปฺปํ มหา ภเว;

โผเฏตฺวา รชคเต คตฺเต, เอกมนฺตํ อุปาวิสึ.

๑๔๐. ‘‘ยทา มหากฏฺฐปุญฺโช, อาทิตฺโต ธมธมายติ [ธุมธุมายติ (สี.), ธมมายติ (ก.)];

ตทุปฺปติตฺวา ปปตึ, มชฺเฌ ชาลสิขนฺตเร.

๑๔๑. ‘‘ยถา สีโตทกํ นาม, ปวิฏฺฐํ ยสฺส กสฺสจิ;

สเมติ ทรถปริฬาหํ, อสฺสาทํ เทติ ปีติ จ.

๑๔๒. ‘‘ตเถว ชลิตํ อคฺคึ, ปวิฏฺฐสฺส มมํ ตทา;

สพฺพํ สเมติ ทรถํ, ยถา สีโตทกํ วิย.

๑๔๓. ‘‘ฉวึ จมฺมํ มํสํ นฺหารุํ, อฏฺฐึ หทยพนฺธนํ;

เกวลํ สกลํ กายํ, พฺราหฺมณสฺส อทาสห’’นฺติ.

สสปณฺฑิตจริยํ ทสมํ.

อกิตฺติวคฺโค ปฐโม.

ตสฺสุทฺทานํ –

อกิตฺติพฺราหฺมโณ สงฺโข, กุรุราชา ธนญฺจโย;

มหาสุทสฺสโน ราชา, มหาโควินฺทพฺราหฺมโณ.

นิมิ จนฺทกุมาโร จ, สิวิ เวสฺสนฺตโร สโส;

อหเมว ตทา อาสึ, โย เต ทานวเร อทา.

เอเต ทานปริกฺขารา, เอเต ทานสฺส ปารมี;

ชีวิตํ ยาจเก ทตฺวา, อิมํ ปารมิ ปูรยึ.

ภิกฺขาย อุปคตํ ทิสฺวา, สกตฺตานํ ปริจฺจชึ;

ทาเนน เม สโม นตฺถิ, เอสา เม ทานปารมีติ.

ทานปารมินิทฺเทโส นิฏฺฐิโต.