๖. ทุติยรํสิสญฺญกตฺเถรอปทานํ

๓๕. ‘‘ปพฺพเต หิมวนฺตมฺหิ, วากจีรธโร อหํ;

จงฺกมญฺจ สมารูโฬฺห, นิสีทึ ปาจินามุโข.

๓๖. ‘‘ปพฺพเต สุคตํ ทิสฺวา, ผุสฺสํ ฌานรตํ ตทา;

อญฺชลึ ปคฺคเหตฺวาน, รํสฺยา จิตฺตํ ปสาทยึ.

๓๗. ‘‘เทฺวนวุเต อิโต กปฺเป, ยํ สญฺญมลภึ ตทา;

ทุคฺคตึ นาภิชานามิ, รํสิสญฺญายิทํ ผลํ.

๓๘. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา รํสิสญฺญโก เถโร อิมา คาถาโย อภาสิตฺถาติ.

ทุติยรํสิสญฺญกตฺเถรสฺสาปทานํ ฉฏฺฐํ.