๙. ปทุมตฺเถรอปทานํ

๖๗. ‘‘จตุสจฺจํ ปกาเสนฺโต, วรธมฺมปฺปวตฺตโก;

วสฺสเต [วสฺเสติ (?)] อมตํ วุฏฺฐึ, นิพฺพาเปนฺโต มหาชนํ.

๖๘. ‘‘สธชํ [สทณฺฑํ (สี.)] ปทุมํ คยฺห, อฑฺฒโกเส ฐิโต อหํ;

ปทุมุตฺตรมุนิสฺส, ปหฏฺโฐ อุกฺขิปิมมฺพเร.

๖๙. ‘‘อาคจฺฉนฺเต จ ปทุเม, อพฺภุโต อาสิ ตาวเท;

มม สงฺกปฺปมญฺญาย, ปคฺคณฺหิ วทตํ วโร.

๗๐. ‘‘กรเสฏฺเฐน ปคฺคยฺห, ชลชํ ปุปฺผมุตฺตมํ;

ภิกฺขุสงฺเฆ ฐิโต สตฺถา, อิมา คาถา อภาสถ.

๗๑. ‘‘‘เยนิทํ ปทุมํ ขิตฺตํ, สพฺพญฺญุมฺหิ วินายเก [สพฺพญฺญุตมนายเก (สฺยา. ก.)];

ตมหํ กิตฺตยิสฺสามิ, สุณาถ มม ภาสโต.

๗๒. ‘‘‘ตึสกปฺปานิ เทวินฺโท, เทวรชฺชํ กริสฺสติ;

ปถพฺยา รชฺชํ สตฺตสตํ, วสุธํ อาวสิสฺสติ.

๗๓. ‘‘‘ตตฺถ ปตฺตํ คเณตฺวาน, จกฺกวตฺตี ภวิสฺสติ;

อากาสโต ปุปฺผวุฏฺฐิ, อภิวสฺสิสฺสตี ตทา.

๗๔. ‘‘‘กปฺปสตสหสฺสมฺหิ, โอกฺกากกุลสมฺภโว;

โคตโม นาม นาเมน, สตฺถา โลเก ภวิสฺสติ.

๗๕. ‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สพฺพาสเว ปริญฺญาย, นิพฺพายิสฺสตินาสโว’.

๗๖. ‘‘นิกฺขมิตฺวาน กุจฺฉิมฺหา, สมฺปชาโน ปติสฺสโต;

ชาติยา ปญฺจวสฺโสหํ, อรหตฺตํ อปาปุณึ.

๗๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปทุโม เถโร อิมา คาถาโย อภาสิตฺถาติ.

ปทุมตฺเถรสฺสาปทานํ นวมํ.