๑๐. อสนโพธิยตฺเถรอปทานํ

๗๘. ‘‘ชาติยา สตฺตวสฺโสหํ, อทฺทสํ โลกนายกํ;

ปสนฺนจิตฺโต สุมโน, อุปคจฺฉึ นรุตฺตมํ.

๗๙. ‘‘ติสฺสสฺสาหํ ภควโต, โลกเชฏฺฐสฺส ตาทิโน;

หฏฺโฐ หฏฺเฐน จิตฺเตน, โรปยึ โพธิมุตฺตมํ.

๘๐. ‘‘อสโน นามเธยฺเยน, ธรณีรุหปาทโป;

ปญฺจวสฺเส ปริจรึ, อสนํ โพธิมุตฺตมํ.

๘๑. ‘‘ปุปฺผิตํ ปาทปํ ทิสฺวา, อพฺภุตํ โลมหํสนํ;

สกํ กมฺมํ ปกิตฺเตนฺโต, พุทฺธเสฏฺฐํ อุปาคมึ.

๘๒. ‘‘ติสฺโส ตทา โส สมฺพุทฺโธ, สยมฺภู อคฺคปุคฺคโล;

ภิกฺขุสงฺเฆ นิสีทิตฺวา, อิมา คาถา อภาสถ.

๘๓. ‘‘‘เยนายํ โรปิตา โพธิ, พุทฺธปูชา จ สกฺกตา;

ตมหํ กิตฺตยิสฺสามิ, สุณาถ มม ภาสโต.

๘๔. ‘‘‘ตึสกปฺปานิ เทเวสุ, เทวรชฺชํ กริสฺสติ;

จตุสฏฺฐิ จกฺขตฺตุํ โส, จกฺกวตฺตี ภวิสฺสติ.

๘๕. ‘‘‘ตุสิตา หิ จวิตฺวาน, สุกฺกมูเลน โจทิโต;

เทฺว สมฺปตฺตี อนุโภตฺวา, มนุสฺสตฺเต รมิสฺสติ.

๘๖. ‘‘‘ปธานปหิตตฺโต โส, อุปสนฺโต นิรูปธิ;

สพฺพาสเว ปริญฺญาย, นิพฺพายิสฺสตินาสโว’.

๘๗. ‘‘วิเวกมนุยุตฺโตหํ, อุปสนฺโต นิรูปธิ;

นาโคว พนฺธนํ เฉตฺวา, วิหรามิ อนาสโว.

๘๘. ‘‘เทฺวนวุเต อิโต กปฺเป, โพธึ โรเปสหํ ตทา;

ทุคฺคตึ นาภิชานามิ, โพธิโรปสฺสิทํ ผลํ.

๘๙. ‘‘จตุสตฺตติโต กปฺเป, ทณฺฑเสโนติ วิสฺสุโต;

สตฺตรตนสมฺปนฺโน, จกฺกวตฺตี ตทา อหุํ.

๙๐. ‘‘เตสตฺตติมฺหิโต กปฺเป, สตฺตาเหสุํ มหีปตี;

สมนฺตเนมินาเมน, ราชาโน จกฺกวตฺติโน.

๙๑. ‘‘ปณฺณวีสติโต กปฺเป, ปุณฺณโก นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโล.

๙๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อสนโพธิโย เถโร อิมา คาถาโย อภาสิตฺถาติ.

อสนโพธิยตฺเถรสฺสาปทานํ ทสมํ.

พีชนิวคฺโค ฉฏฺโฐ.