๕. นนฺทกตฺเถรอปทานํ

๑๔๓. ‘‘ปทุมุตฺตโร นาม ชิโน, สพฺพธมฺเมสุ จกฺขุมา;

อิโต สตสหสฺสมฺหิ, กปฺเป อุปฺปชฺชิ นายโก.

๑๔๔. ‘‘หิตาย สพฺพสตฺตานํ, สุขาย วทตํ วโร;

อตฺถาย ปุริสาชญฺโญ, ปฏิปนฺโน สเทวเก.

๑๔๕. ‘‘ยสคฺคปตฺโต สิริมา, กิตฺติวณฺณภโต [กิตฺติวณฺณ ภโฏ (สฺยา. ก.)] ชิโน;

ปูชิโต สพฺพโลกสฺส, ทิสา สพฺพาสุ วิสฺสุโต.

๑๔๖. ‘‘อุตฺติณฺณวิจิกิจฺโฉ โส, วีติวตฺตกถํกโถ;

ปริปุณฺณมนสงฺกปฺโป, ปตฺโต สมฺโพธิมุตฺตมํ.

๑๔๗. ‘‘อนุปฺปนฺนสฺส มคฺคสฺส, อุปฺปาเทตา นรุตฺตโม;

อนกฺขาตญฺจ อกฺขาสิ, อสญฺชาตญฺจ สญฺชนี.

๑๔๘. ‘‘มคฺคญฺญู มคฺควิทู [โส มคฺควิทู (สี. ปี.)] จ, มคฺคกฺขายี นราสโภ;

มคฺคสฺส กุสโล สตฺถา, สารถีนํ วรุตฺตโม [นรุตฺตโม (สฺยา.)].

๑๔๙. ‘‘ตทา มหาการุณิโก, ธมฺมํ เทเสสิ นายโก;

นิมุคฺเค กามปงฺกมฺหิ [โมหปงฺกมฺหิ (สี. สฺยา.), โมหมคฺคมฺหิ (ปี.)], สมุทฺธรติ ปาณิเน.

๑๕๐. ‘‘ภิกฺขุนีนํ โอวทเน, สาวกํ เสฏฺฐสมฺมตํ;

วณฺณยํ เอตทคฺคมฺหิ, ปญฺญเปสิ มหามุนิ.

๑๕๑. ‘‘ตํ สุตฺวาหํ ปมุทิโต, นิมนฺเตตฺวา ตถาคตํ;

โภชยิตฺวา สสงฺฆํ ตํ, ปตฺถยึ ฐานมุตฺตมํ.

๑๕๒. ‘‘ตทา ปมุทิโต นาโถ, มํ อโวจ มหาอิสิ;

‘สุขี ภวสฺสุ ทีฆาวุ [ทีฆายุ (สี. สฺยา.)], ลจฺฉเส ตํ มโนรถํ.

๑๕๓. ‘‘‘สตสหสฺสิโต กปฺเป, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๑๕๔. ‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

นนฺทโก นาม นาเมน, เหสฺสติ สตฺถุ สาวโก’.

๑๕๕. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสูปโค อหํ.

๑๕๖. ‘‘ปจฺฉิเม จ ภเว ทานิ, ชาโต เสฏฺฐิกุเล อหํ;

สาวตฺถิยํ ปุเร วเร, อิทฺเธ ผีเต มหทฺธเน.

๑๕๗. ‘‘ปุรปฺปเวเส สุคตํ, ทิสฺวา วิมฺหิตมานโส;

เชตารามปฏิคฺคาเห, ปพฺพชึ อนคาริยํ.

๑๕๘. ‘‘นจิเรเนว กาเลน, อรหตฺตมปาปุณึ;

ตโตหํ ติณฺณสํสาโร, สาสิโต สพฺพทสฺสินา.

๑๕๙. ‘‘ภิกฺขุนีนํ ธมฺมกถํ, ปฏิปุจฺฉากรึ อหํ;

สาสิตา ตา มยา สพฺพา, อภวึสุ อนาสวา.

๑๖๐. ‘‘สตานิ ปญฺจนูนานิ, ตทา ตุฏฺโฐ มหาหิโต;

ภิกฺขุนีนํ โอวทตํ, อคฺคฏฺฐาเน ฐเปสิ มํ.

๑๖๑. ‘‘สตสหสฺเส กตํ กมฺมํ, ผลํ ทสฺเสสิ เม อิธ;

สุมุตฺโต สรเวโคว, กิเลเส ฌาปยึ มม.

๑๖๒. ‘‘กิเลสา ฌาปิตา มยฺหํ…เป… วิหรามิ อนาสโว.

๑๖๓. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๖๔. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา นนฺทโก เถโร อิมา คาถาโย

อภาสิตฺถาติ.

นนฺทกตฺเถรสฺสาปทานํ ปญฺจมํ.