๓. สีวลิตฺเถรอปทานํ

๕๔. ‘‘ปทุมุตฺตโร นาม ชิโน, สพฺพธมฺเมสุ จกฺขุมา;

อิโต สตสหสฺสมฺหิ, กปฺเป อุปฺปชฺชิ นายโก.

๕๕. ‘‘สีลํ ตสฺส อสงฺเขยฺยํ, สมาธิ วชิรูปโม;

อสงฺเขยฺยํ ญาณวรํ, วิมุตฺติ จ อโนปมา.

๕๖. ‘‘มนุชามรนาคานํ, พฺรหฺมานญฺจ สมาคเม;

สมณพฺราหฺมณากิณฺเณ, ธมฺมํ เทเสสิ นายโก.

๕๗. ‘‘สสาวกํ มหาลาภึ, ปุญฺญวนฺตํ ชุตินฺธรํ;

ฐเปสิ เอตทคฺคมฺหิ, ปริสาสุ วิสารโท.

๕๘. ‘‘ตทาหํ ขตฺติโย อาสึ, นคเร หํสสวฺหเย;

สุตฺวา ชินสฺส ตํ วากฺยํ, สาวกสฺส คุณํ พหุํ.

๕๙. ‘‘นิมนฺตยิตฺวา สตฺตาหํ, โภชยิตฺวา สสาวกํ;

มหาทานํ ททิตฺวาน, ตํ ฐานมภิปตฺถยึ.

๖๐. ‘‘ตทา มํ วินตํ ปาเท, ทิสฺวาน ปุริสาสโภ;

สเรน มหตา วีโร [สุสฺสเรน มหาวีโร (สี. ปี.)], อิทํ วจนมพฺรวิ.

๖๑. ‘‘‘ตโต ชินสฺส วจนํ, โสตุกามา มหาชนา;

เทวทานวคนฺธพฺพา, พฺรหฺมาโน จ มหิทฺธิกา’.

๖๒. ‘‘สมณพฺราหฺมณา เจว, นมสฺสึสุ กตญฺชลี;

‘นโม เต ปุริสาชญฺญ, นโม เต ปุริสุตฺตม.

๖๓. ‘‘‘ขตฺติเยน มหาทานํ, ทินฺนํ สตฺตาหิกมฺปิ โว [สตฺตหิกํ มิ โว (สี.), สตฺตหิกาธิกํ (สฺยา.), สตฺตหิกํ วิโภ (ปี.)];

โสตุกามา ผลํ ตสฺส, พฺยากโรหิ มหามุเน’.

๖๔. ‘‘ตโต อโวจ ภควา, ‘สุณาถ มม ภาสิตํ;

อปฺปเมยฺยมฺหิ พุทฺธมฺหิ, สสงฺฆมฺหิ ปติฏฺฐิตา [สํฆมฺหิ สุปฺปติฏฺฐิตา (สี. ปี.)].

๖๕. ‘‘‘ทกฺขิณา ตาย [ทกฺขิณาทาย (สฺยา. ปี.)] โก วตฺตา, อปฺปเมยฺยผลา หิ สา;

อปิ เจ ส มหาโภโค, ฐานํ ปตฺเถติ อุตฺตมํ.

๖๖. ‘‘‘ลาภี วิปุลลาภานํ, ยถา ภิกฺขุ สุทสฺสโน;

ตถาหมฺปิ ภเวยฺยนฺติ, ลจฺฉเส ตํ อนาคเต.

๖๗. ‘‘‘สตสหสฺสิโต กปฺเป, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๖๘. ‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สีวลิ นาม นาเมน, เหสฺสติ สตฺถุ สาวโก’.

๖๙. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสูปโค อหํ.

๗๐. ‘‘เอกนวุติโต กปฺเป, วิปสฺสี โลกนายโก;

อุปฺปชฺชิ จารุทสฺสโน, สพฺพธมฺมวิปสฺสโก.

๗๑. ‘‘ตทาหํ พนฺธุมติยํ, กุลสฺสญฺญตรสฺส จ;

ทยิโต ปสฺสิโต เจว, อาสึ กมฺมนฺตวาวโฏ [กมฺมนฺตพฺยาวโฏ (สี. สฺยา. ก.)].

๗๒. ‘‘ตทา อญฺญตโร ปูโค, วิปสฺสิสฺส มเหสิโน;

ปริเวสํ อการยิ, มหนฺตมติวิสฺสุตํ.

๗๓. ‘‘นิฏฺฐิเต จ มหาทาเน, ททุํ ขชฺชกสญฺหิตํ;

นวํ ทธึ มธุญฺเจว, วิจินํ เนว อทฺทสุํ.

๗๔. ‘‘ตทาหํ ตํ คเหตฺวาน, นวํ ทธึ มธุมฺปิ จ;

กมฺมสฺสามิฆรํ คจฺฉึ, ตเมสนฺตา มมทฺทสุํ.

๗๕. ‘‘สหสฺสมปิ ทตฺวาน, นาลภึสุ จ ตํ ทฺวยํ;

ตโตหํ เอวํ จินฺเตสึ, ‘เนตํ เหสฺสติ โอรกํ.

๗๖. ‘‘‘ยถา อิเม ชนา สพฺเพ, สกฺกโรนฺติ ตถาคตํ;

อหมฺปิ การํ กสฺสามิ, สสงฺเฆ โลกนายเก’.

๗๗. ‘‘ตทาหเมวํ จินฺเตตฺวา, ทธึ มธุญฺจ เอกโต;

มทฺทิตฺวา โลกนาถสฺส, สสงฺฆสฺส อทาสหํ.

๗๘. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๗๙. ‘‘ปุนาหํ พาราณสิยํ, ราชา หุตฺวา มหายโส;

สตฺตุกสฺส ตทา ทุฏฺโฐ, ทฺวารโรธมการยึ.

๘๐. ‘‘ตทา ตปสฺสิโน รุทฺธา, เอกาหํ รกฺขิตา อหุํ;

ตโต ตสฺส วิปาเกน, ปาปตึ [ปาปิฏฺฐํ (สฺยา.) ปาปตฺตํ (ก.)] นิรยํ ภุสํ.

๘๑. ‘‘ปจฺฉิเม จ ภเว ทานิ, ชาโตหํ โกลิเย ปุเร;

สุปฺปวาสา จ เม มาตา, มหาลิ ลิจฺฉวี ปิตา.

๘๒. ‘‘ขตฺติเย ปุญฺญกมฺเมน, ทฺวารโรธสฺส วาหสา;

สตฺต วสฺสานิ นิวสึ, มาตุกุจฺฉิมฺหิ ทุกฺขิโต.

๘๓. ‘‘สตฺตาหํ ทฺวารมูโฬฺหหํ, มหาทุกฺขสมปฺปิโต;

มาตา เม ฉนฺททาเนน, เอวํ อาสิ สุทุกฺขิตา.

๘๔. ‘‘สุวตฺถิโตหํ นิกฺขนฺโต, พุทฺเธน อนุกมฺปิโต;

นิกฺขนฺตทิวเสเยว, ปพฺพชึ อนคาริยํ.

๘๕. ‘‘อุปชฺฌา สาริปุตฺโต เม, โมคฺคลฺลาโน มหิทฺธิโก;

เกเส โอโรปยนฺโต เม, อนุสาสิ มหามติ.

๘๖. ‘‘เกเสสุ ฉิชฺชมาเนสุ, อรหตฺตมปาปุณึ;

เทวา นาคา มนุสฺสา จ, ปจฺจเย อุปเนนฺติ เม.

๘๗. ‘‘ปทุมุตฺตรนาถญฺจ, วิปสฺสิญฺจ วินายกํ;

ยํ ปูชยึ ปมุทิโต, ปจฺจเยหิ วิเสสโต.

๘๘. ‘‘ตโต เตสํ วิเสเสน, กมฺมานํ วิปุลุตฺตมํ;

ลาภํ ลภามิ สพฺพตฺถ, วเน คาเม ชเล ถเล.

๘๙. ‘‘เรวตํ ทสฺสนตฺถาย, ยทา ยาติ วินายโก;

ตึสภิกฺขุสหสฺเสหิ, สห โลกคฺคนายโก.

๙๐. ‘‘ตทา เทโวปณีเตหิ, มมตฺถาย มหามติ;

ปจฺจเยหิ มหาวีโร, สสงฺโฆ โลกนายโก.

๙๑. ‘‘อุปฏฺฐิโต มยา พุทฺโธ, คนฺตฺวา เรวตมทฺทส;

ตโต เชตวนํ คนฺตฺวา, เอตทคฺเค ฐเปสิ มํ.

๙๒. ‘‘‘ลาภีนํ สีวลิ อคฺโค, มม สิสฺเสสุ ภิกฺขโว’;

สพฺพโลกหิโต สตฺถา, กิตฺตยี ปริสาสุ มํ.

๙๓. ‘‘กิเลสา ฌาปิตา มยฺหํ…เป… วิหรามิ อนาสโว.

๙๔. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๙๕. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สีวลิเถโร อิมา คาถาโย

อภาสิตฺถาติ.

สีวลิตฺเถรสฺสาปทานํ ตติยํ.