๙. สุภทฺทตฺเถรอปทานํ

๑๐๑. ‘‘ปทุมุตฺตโร โลกวิทู, อาหุตีนํ ปฏิคฺคโห;

ชนตํ อุทฺธริตฺวาน, นิพฺพายติ มหายโส.

๑๐๒. ‘‘นิพฺพายนฺเต จ สมฺพุทฺเธ, ทสสหสฺสิ กมฺปถ;

ชนกาโย มหา อาสิ, เทวา สนฺนิปตุํ ตทา.

๑๐๓. ‘‘จนฺทนํ ปูรยิตฺวาน, ตครามลฺลิกาหิ จ;

หฏฺโฐ หฏฺเฐน จิตฺเตน, อาโรปยึ [อาเลเปสึ (สี.), อาโรเปสึ (สฺยา.)] นรุตฺตมํ.

๑๐๔. ‘‘มม สงฺกปฺปมญฺญาย, สตฺถา โลเก อนุตฺตโร;

นิปนฺนโกว สมฺพุทฺโธ, อิมา คาถา อภาสถ.

๑๐๕. ‘‘‘โย เม ปจฺฉิมเก กาเล, คนฺธมาเลน [คนฺธมลฺเลน (สฺยา. ก.) นปุํสเกกตฺตํ มนสิกาตพฺพํ] ฉาทยิ;

ตมหํ กิตฺตยิสฺสามิ, สุณาถ มม ภาสโต.

๑๐๖. ‘‘‘อิโต จุโต อยํ โปโส, ตุสิตกายํ คมิสฺสติ;

ตตฺถ รชฺชํ กริตฺวาน, นิมฺมานํ โส คมิสฺสติ.

๑๐๗. ‘‘‘เอเตเนว อุปาเยน, ทตฺวา มาลํ [มลฺยํ (สี.), มลฺลํ (สฺยา. ก.)] วรุตฺตมํ;

สกกมฺมาภิรทฺโธ โส, สมฺปตฺตึ อนุโภสฺสติ.

๑๐๘. ‘‘‘ปุนาปิ ตุสิเต กาเย, นิพฺพตฺติสฺสติยํ นโร;

ตมฺหา กายา จวิตฺวาน, มนุสฺสตฺตํ คมิสฺสติ.

๑๐๙. ‘‘‘สกฺยปุตฺโต มหานาโค, อคฺโค โลเก สเทวเก;

โพธยิตฺวา พหู สตฺเต, นิพฺพายิสฺสติ จกฺขุมา.

๑๑๐. ‘‘‘ตทา โสปคโต สนฺโต, สุกฺกมูเลน โจทิโต;

อุปสงฺกมฺม สมฺพุทฺธํ, ปญฺหํ ปุจฺฉิสฺสติ ตทา.

๑๑๑. ‘‘‘หาสยิตฺวาน สมฺพุทฺโธ, สพฺพญฺญู โลกนายโก;

ปุญฺญกมฺมํ ปริญฺญาย, สจฺจานิ วิวริสฺสติ.

๑๑๒. ‘‘‘อารทฺโธ จ อยํ ปโญฺห, ตุฏฺโฐ เอกคฺคมานโส;

สตฺถารํ อภิวาเทตฺวา, ปพฺพชฺชํ ยาจยิสฺสติ.

๑๑๓. ‘‘‘ปสนฺนมานสํ ทิสฺวา, สกกมฺเมน โตสิตํ;

ปพฺพาเชสฺสติ โส พุทฺโธ, อคฺคมคฺคสฺส โกวิโท.

๑๑๔. ‘‘‘วายมิตฺวานยํ โปโส, สมฺมาสมฺพุทฺธสาสเน;

สพฺพาสเว ปริญฺญาย, นิพฺพายิสฺสตินาสโว’.

ปญฺจมภาณวารํ.

๑๑๕. ‘‘ปุพฺพกมฺเมน สํยุตฺโต, เอกคฺโค สุสมาหิโต;

พุทฺธสฺส โอรโส ปุตฺโต, ธมฺมโชมฺหิ สุนิมฺมิโต.

๑๑๖. ‘‘ธมฺมราชํ อุปคมฺม, อปุจฺฉึ ปญฺหมุตฺตมํ;

กถยนฺโต จ เม ปญฺหํ, ธมฺมโสตํ อุปานยิ.

๑๑๗. ‘‘ตสฺสาหํ ธมฺมมญฺญาย, วิหาสึ สาสเน รโต;

สพฺพาสเว ปริญฺญาย, วิหรามิ อนาสโว.

๑๑๘. ‘‘สตสหสฺสิโต กปฺเป, ชลชุตฺตมนายโก;

นิพฺพายิ อนุปาทาโน, ทีโปว เตลสงฺขยา.

๑๑๙. ‘‘สตฺตโยชนิกํ อาสิ, ถูปญฺจ รตนามยํ;

ธชํ ตตฺถ อปูเชสึ, สพฺพภทฺทํ มโนรมํ.

๑๒๐. ‘‘กสฺสปสฺส จ พุทฺธสฺส, ติสฺโส นามคฺคสาวโก;

ปุตฺโต เม โอรโส อาสิ, ทายาโท ชินสาสเน.

๑๒๑. ‘‘ตสฺส หีเนน มนสา, วาจํ ภาสึ อภทฺทกํ;

เตน กมฺมวิปาเกน, ปจฺฉา เม อาสิ ภทฺทกํ [ปจฺฉิเม อทฺทสํ ชินํ (สี.)].

๑๒๒. ‘‘อุปวตฺตเน สาลวเน, ปจฺฉิเม สยเน มุนิ;

ปพฺพาเชสิ มหาวีโร, หิโต การุณิโก ชิโน.

๑๒๓. ‘‘อชฺเชว ทานิ ปพฺพชฺชา, อชฺเชว อุปสมฺปทา;

อชฺเชว ปรินิพฺพานํ, สมฺมุขา ทฺวิปทุตฺตเม.

๑๒๔. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สุภทฺโท เถโร อิมา คาถาโย อภาสิตฺถาติ.

สุภทฺทตฺเถรสฺสาปทานํ นวมํ.