๑๐. จุนฺทตฺเถรอปทานํ

๑๒๕. ‘‘สิทฺธตฺถสฺส ภควโต, โลกเชฏฺฐสฺส ตาทิโน;

อคฺฆิยํ การยิตฺวาน, ชาติปุปฺเผหิ ฉาทยึ.

๑๒๖. ‘‘นิฏฺฐาเปตฺวาน ตํ ปุปฺผํ, พุทฺธสฺส อุปนามยึ;

ปุปฺผาวเสสํ ปคฺคยฺห, พุทฺธสฺส อภิโรปยึ.

๑๒๗. ‘‘กญฺจนคฺฆิยสงฺกาสํ, พุทฺธํ โลกคฺคนายกํ;

ปสนฺนจิตฺโต สุมโน, ปุปฺผคฺฆิยมุปานยึ.

๑๒๘. ‘‘วิติณฺณกงฺโข สมฺพุทฺโธ, ติณฺโณเฆหิ ปุรกฺขโต;

ภิกฺขุสงฺเฆ นิสีทิตฺวา, อิมา คาถา อภาสถ.

๑๒๙. ‘‘‘ทิพฺพคนฺธํ ปวายนฺตํ, โย เม ปุปฺผคฺฆิยํ อทา;

ตมหํ กิตฺตยิสฺสามิ, สุณาถ มม ภาสโต.

๑๓๐. ‘‘‘อิโต จุโต อยํ โปโส, เทวสงฺฆปุรกฺขโต;

ชาติปุปฺเผหิ ปริกิณฺโณ, เทวโลกํ คมิสฺสติ.

๑๓๑. ‘‘‘อุพฺพิทฺธํ ภวนํ ตสฺส, โสวณฺณญฺจ มณีมยํ;

พฺยมฺหํ ปาตุภวิสฺสติ, ปุญฺญกมฺมปฺปภาวิตํ.

๑๓๒. ‘‘‘จตุสตฺตติกฺขตฺตุํ โส, เทวรชฺชํ กริสฺสติ;

อนุโภสฺสติ สมฺปตฺตึ, อจฺฉราหิ ปุรกฺขโต.

๑๓๓. ‘‘‘ปถพฺยา รชฺชํ ติสตํ, วสุธํ อาวสิสฺสติ;

ปญฺจสตฺตติกฺขตฺตุญฺจ, จกฺกวตฺตี ภวิสฺสติ.

๑๓๔. ‘‘‘ทุชฺชโย นาม นาเมน, เหสฺสติ มนุชาธิโป;

อนุโภตฺวาน ตํ ปุญฺญํ, สกกมฺมํ อปสฺสิโต [สกกมฺมูปสํหิโต (สฺยา.)].

๑๓๕. ‘‘‘วินิปาตํ อคนฺตฺวาน, มนุสฺสตฺตํ คมิสฺสติ;

หิรญฺญํ ตสฺส [หิรญฺญสฺส จ (สี. ก.)] นิจิตํ, โกฏิสตมนปฺปกํ.

๑๓๖. ‘‘‘นิพฺพตฺติสฺสติ โยนิมฺหิ, พฺราหฺมเณ โส ภวิสฺสติ;

วงฺคนฺตสฺส สุโต ธีมา, สาริยา โอรโส ปิโย.

๑๓๗. ‘‘‘โส จ ปจฺฉา ปพฺพชิตฺวา, องฺคีรสสฺส สาสเน;

จูฬจุนฺโทติ [จูลจุนฺโทติ (สี.)] นาเมน, เหสฺสติ สตฺถุ สาวโก.

๑๓๘. ‘‘‘สามเณโรว โส สนฺโต, ขีณาสโว ภวิสฺสติ;

สพฺพาสเว ปริญฺญาย, นิพฺพายิสฺสตินาสโว’.

๑๓๙. ‘‘อุปฏฺฐหึ มหาวีรํ, อญฺเญ จ เปสเล พหู;

ภาตรํ เม จุปฏฺฐาสึ, อุตฺตมตฺถสฺส ปตฺติยา.

๑๔๐. ‘‘ภาตรํ เม อุปฏฺฐิตฺวา, ธาตุํ ปตฺตมฺหิ โอหิย [โอปิย (สี.), โอจิย (สฺยา.)];

สมฺพุทฺธํ อุปนาเมสึ, โลกเชฏฺฐํ นราสภํ.

๑๔๑. ‘‘อุโภ หตฺเถหิ ปคฺคยฺห, พุทฺโธ โลเก สเทวเก;

สนฺทสฺสยนฺโต ตํ ธาตุํ, กิตฺตยิ อคฺคสาวกํ.

๑๔๒. ‘‘จิตฺตญฺจ สุวิมุตฺตํ เม, สทฺธา มยฺหํ ปติฏฺฐิตา;

สพฺพาสเว ปริญฺญาย, วิหรามิ อนาสโว.

๑๔๓. ‘‘ปฏิสมฺภิทานุปฺปตฺตา, วิโมกฺขาปิ จ ผสฺสิตา [ปฏิสมฺภิทา จตสฺโส, วิโมกฺขาปิ จ อฏฺฐิเม (สฺยา.)];

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา จุนฺโท เถโร อิมา คาถาโย อภาสิตฺถาติ.

จุนฺทตฺเถรสฺสาปทานํ ทสมํ.

อุปาลิวคฺโค ปญฺจโม.