๕. ปญฺจหตฺถิยตฺเถรอปทานํ

๗๗. ‘‘สุเมโธ นาม สมฺพุทฺโธ, คจฺฉเต อนฺตราปเณ;

โอกฺขิตฺตจกฺขุ [ขิตฺตจกฺขุ (ก. สี. ก.)] มิตภาณี, สติมา สํวุตินฺทฺริโย.

๗๘. ‘‘ปญฺจ อุปฺปลหตฺถานิ, อาเวฬตฺถํ อหํสุ เม;

เตน พุทฺธํ อปูเชสึ, ปสนฺโน เสหิ ปาณิภิ.

๗๙. ‘‘อาโรปิตา จ เต ปุปฺผา, ฉทนํ อสฺสุ สตฺถุโน;

สมาธึสุ [สํสาวึสุ (สี.)] มหานาคํ, สิสฺสา อาจริยํ ยถา.

๘๐. ‘‘ตึสกปฺปสหสฺสมฺหิ, ยํ ปุปฺผมภิโรปยึ;

ทุคฺคตึ นาภิชานามิ, พุทฺธปูชายิทํ ผลํ.

๘๑. ‘‘อิโต วีสกปฺปสเต, อเหสุํ ปญฺจ ขตฺติยา;

หตฺถิยา นาม นาเมน, จกฺกวตฺตี มหพฺพลา.

๘๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปญฺจหตฺถิโย เถโร อิมา คาถาโย อภาสิตฺถาติ.

ปญฺจหตฺถิยตฺเถรสฺสาปทานํ ปญฺจมํ.