๔. สนฺนิฏฺฐาปกตฺเถรอปทานํ

๗๐. ‘‘อรญฺเญ กุฏิกํ กตฺวา, วสามิ ปพฺพตนฺตเร;

ลาภาลาเภน สนฺตุฏฺโฐ, ยเสน อยเสน จ.

๗๑. ‘‘ปทุมุตฺตโร โลกวิทู, อาหุตีนํ ปฏิคฺคโห;

วสีสตสหสฺเสหิ [ภิกฺขุสตสหสฺเสหิ (สฺยา.)], อาคจฺฉิ มม สนฺติกํ.

๗๒. ‘‘อุปาคตํ มหานาคํ [มหาวีรํ (สี.)], ชลชุตฺตมนามกํ;

ติณสนฺถรํ [ติณตฺถรํ (ก.)] ปญฺญาเปตฺวา, อทาสึ สตฺถุโน อหํ.

๗๓. ‘‘ปสนฺนจิตฺโต สุมโน, อามณฺฑํ ปานียญฺจหํ;

อทาสึ อุชุภูตสฺส, วิปฺปสนฺเนน เจตสา.

๗๔. ‘‘สตสหสฺสิโต กปฺเป [สตสหสฺเส อิโต กปฺเป (สี.)], ยํ ทานมททึ ตทา;

ทุคฺคตึ นาภิชานามิ, อามณฺฑสฺส อิทํ ผลํ.

๗๕. ‘‘เอกตาลีสกปฺปมฺหิ, เอโก อาสึ อรินฺทโม;

สตฺตรตนสมฺปนฺโน, จกฺกวตฺตี มหพฺพโล.

๗๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สนฺนิฏฺฐาปโก [สนฺนิธาปโก (สี.)] เถโร อิมา คาถาโย อภาสิตฺถาติ.

สนฺนิฏฺฐาปกตฺเถรสฺสาปทานํ จตุตฺถํ.