๘. สุจินฺติตตฺเถรอปทานํ

๑๐๗. ‘‘นคเร หํสวติยา, อโหสึ กสฺสโก ตทา;

กสิกมฺเมน ชีวามิ, เตน โปเสมิ ทารเก.

๑๐๘. ‘‘สุสมฺปนฺนํ ตทา เขตฺตํ, ธญฺญํ เม ผลินํ [ผลิตํ (สี. ปี.)] อหุ;

ปากกาเล จ สมฺปตฺเต, เอวํ จินฺเตสหํ ตทา.

๑๐๙. ‘‘นจฺฉนฺนํ นปฺปติรูปํ, ชานนฺตสฺส คุณาคุณํ;

โยหํ สงฺเฆ อทตฺวาน, อคฺคํ ภุญฺเชยฺย เจ ตทา [มตฺตนา (สฺยา.)].

๑๑๐. ‘‘อยํ พุทฺโธ อสมสโม, ทฺวตฺตึสวรลกฺขโณ;

ตโต ปภาวิโต สงฺโฆ, ปุญฺญกฺเขตฺโต อนุตฺตโร.

๑๑๑. ‘‘ตตฺถ ทสฺสามหํ ทานํ, นวสสฺสํ ปุเร ปุเร;

เอวาหํ จินฺตยิตฺวาน, หฏฺโฐ ปีณิตมานโส [ปีติก… (สฺยา.)].

๑๑๒. ‘‘เขตฺตโต ธญฺญมาหตฺวา, สมฺพุทฺธํ อุปสงฺกมึ;

อุปสงฺกมฺม สมฺพุทฺธํ, โลกเชฏฺฐํ นราสภํ;

วนฺทิตฺวา สตฺถุโน ปาเท, อิทํ วจนมพฺรวึ.

๑๑๓. ‘‘‘นวสสฺสญฺจ สมฺปนฺนํ, อายาโคสิ [อิธ โหสิ (สฺยา.)] จ ตฺวํ มุเน;

อนุกมฺปมุปาทาย, อธิวาเสหิ จกฺขุม’.

๑๑๔. ‘‘ปทุมุตฺตโร โลกวิทู, อาหุตีนํ ปฏิคฺคโห;

มม สงฺกปฺปมญฺญาย, อิทํ วจนมพฺรวิ.

๑๑๕. ‘‘‘จตฺตาโร จ ปฏิปนฺนา, จตฺตาโร จ ผเล ฐิตา;

เอส สงฺโฆ อุชุภูโต, ปญฺญาสีลสมาหิโต;

ยชนฺตานํ มนุสฺสานํ, ปุญฺญเปกฺขาน ปาณินํ.

๑๑๖. ‘‘‘กโรโตปธิกํ ปุญฺญํ, สงฺเฆ ทินฺนํ มหปฺผลํ;

ตสฺมึ สงฺเฆว [สํเฆ จ (สฺยา. ปี.)] ทาตพฺพํ, ตว สสฺสํ ตเถตรํ.

๑๑๗. ‘‘‘สงฺฆโต อุทฺทิสิตฺวาน, ภิกฺขู เนตฺวาน สํฆรํ;

ปฏิยตฺตํ ฆเร สนฺตํ, ภิกฺขุสงฺฆสฺส เทหิ ตฺวํ’.

๑๑๘. ‘‘สงฺฆโต อุทฺทิสิตฺวาน, ภิกฺขู เนตฺวาน สํฆรํ;

ยํ ฆเร ปฏิยตฺตํ เม, ภิกฺขุสงฺฆสฺสทาสหํ.

๑๑๙. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๑๒๐. ‘‘ตตฺถ เม สุกตํ พฺยมฺหํ, โสวณฺณํ สปฺปภสฺสรํ;

สฏฺฐิโยชนมุพฺเพธํ, ตึสโยชนวิตฺถตํ.

เอกูนวีสติมํ ภาณวารํ.

๑๒๑. ‘‘อากิณฺณํ ภวนํ มยฺหํ, นารีคณสมากุลํ;

ตตฺถ ภุตฺวา ปิวิตฺวา จ, วสามิ ติทเส อหํ.

๑๒๒. ‘‘สตานํ ตีณิกฺขตฺตุญฺจ, เทวรชฺชมการยึ;

สตานํ ปญฺจกฺขตฺตุญฺจ, จกฺกวตฺตี อโหสหํ;

ปเทสรชฺชํ วิปุลํ, คณนาโต อสงฺขิยํ.

๑๒๓. ‘‘ภวาภเว สํสรนฺโต, ลภามิ อมิตํ ธนํ;

โภเค เม อูนตา นตฺถิ, นวสสฺสสฺสิทํ ผลํ.

๑๒๔. ‘‘หตฺถิยานํ อสฺสยานํ, สิวิกํ สนฺทมานิกํ;

ลภามิ สพฺพเมเวตํ [สพฺพเมตมฺปิ (ก.)], นวสสฺสสฺสิทํ ผลํ.

๑๒๕. ‘‘นววตฺถํ นวผลํ, นวคฺครสโภชนํ;

ลภามิ สพฺพเมเวตํ, นวสสฺสสฺสิทํ ผลํ.

๑๒๖. ‘‘โกเสยฺยกมฺพลิยานิ, โขมกปฺปาสิกานิ จ;

ลภามิ สพฺพเมเวตํ, นวสสฺสสฺสิทํ ผลํ.

๑๒๗. ‘‘ทาสีคณํ ทาสคณํ, นาริโย จ อลงฺกตา;

ลภามิ สพฺพเมเวตํ, นวสสฺสสฺสิทํ ผลํ.

๑๒๘. ‘‘น มํ สีตํ วา อุณฺหํ วา, ปริฬาโห น วิชฺชติ;

อโถ เจตสิกํ ทุกฺขํ, หทเย เม น วิชฺชติ.

๑๒๙. ‘‘อิทํ ขาท อิทํ ภุญฺช, อิมมฺหิ สยเน สย;

ลภามิ สพฺพเมเวตํ, นวสสฺสสฺสิทํ ผลํ.

๑๓๐. ‘‘อยํ ปจฺฉิมโก ทานิ, จริโม วตฺตเต ภโว;

อชฺชาปิ เทยฺยธมฺโม เม, ผลํ โตเสสิ สพฺพทา.

๑๓๑. ‘‘นวสสฺสํ ททิตฺวาน, สงฺเฆ คณวรุตฺตเม;

อฏฺฐานิสํเส อนุโภมิ, กมฺมานุจฺฉวิเก มม.

๑๓๒. ‘‘วณฺณวา ยสวา โหมิ, มหาโภโค อนีติโก;

มหาปกฺโข [มหาภกฺโข (สฺยา. ก.)] สทา โหมิ, อเภชฺชปริโส สทา.

๑๓๓. ‘‘สพฺเพ มํ อปจายนฺติ, เย เกจิ ปถวิสฺสิตา;

เทยฺยธมฺมา จ เย เกจิ, ปุเร ปุเร ลภามหํ.

๑๓๔. ‘‘ภิกฺขุสงฺฆสฺส วา มชฺเฌ, พุทฺธเสฏฺฐสฺส สมฺมุขา;

สพฺเพปิ สมติกฺกมฺม, เทนฺติ มเมว ทายกา.

๑๓๕. ‘‘ปฐมํ นวสสฺสญฺหิ, ทตฺวา สงฺเฆ คณุตฺตเม;

อิมานิสํเส อนุโภมิ, นวสสฺสสฺสิทํ ผลํ.

๑๓๖. ‘‘สตสหสฺสิโต กปฺเป, ยํ ทานมททึ ตทา;

ทุคฺคตึ นาภิชานามิ, นวสสฺสสฺสิทํ ผลํ.

๑๓๗. ‘‘กิเลสา ฌาปิตา มยฺหํ…เป… วิหรามิ อนาสโว;

๑๓๘. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๓๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สุจินฺติโต เถโร อิมา คาถาโย

อภาสิตฺถาติ.

สุจินฺติตตฺเถรสฺสาปทานํ อฏฺฐมํ.