๙. โสวณฺณกิงฺกณิยตฺเถรอปทานํ

๑๔๐. ‘‘สทฺธาย อภินิกฺขมฺม, ปพฺพชึ อนคาริยํ;

วากจีรธโร อาสึ, ตโปกมฺมมปสฺสิโต.

๑๔๑. ‘‘อตฺถทสฺสี ตุ ภควา, โลกเชฏฺโฐ นราสโภ;

อุปฺปชฺชิ ตมฺหิ สมเย, ตารยนฺโต มหาชนํ.

๑๔๒. ‘‘พลญฺจ วต เม ขีณํ, พฺยาธินา ปรเมน ตํ;

พุทฺธเสฏฺฐํ สริตฺวาน, ปุลิเน ถูปมุตฺตมํ.

๑๔๓. ‘‘กริตฺวา หฏฺฐจิตฺโตหํ, สหตฺเถน [ปสาเทน (ก.)] สโมกิรึ;

โสณฺณกิงฺกณิปุปฺผานิ, อุทคฺคมนโส อหํ.

๑๔๔. ‘‘สมฺมุขา วิย สมฺพุทฺธํ, ถูปํ ปริจรึ อหํ;

เตน เจโตปสาเทน, อตฺถทสฺสิสฺส ตาทิโน.

๑๔๕. ‘‘เทวโลกํ คโต สนฺโต, ลภามิ วิปุลํ สุขํ;

สุวณฺณวณฺโณ ตตฺถาสึ, พุทฺธปูชายิทํ ผลํ.

๑๔๖. ‘‘อสีติโกฏิโย มยฺหํ, นาริโย สมลงฺกตา;

สทา มยฺหํ อุปฏฺฐนฺติ, พุทฺธปูชายิทํ ผลํ.

๑๔๗. ‘‘สฏฺฐิตุริยสหสฺสานิ [สฏฺฐิตูริย… (ก.)], เภริโย ปณวานิ จ;

สงฺขา จ ฑิณฺฑิมา ตตฺถ, วคฺคู วชฺชนฺติ [นทนฺติ (สี.), วทนฺติ (ปี.)] ทุนฺทุภี.

๑๔๘. ‘‘จุลฺลาสีติสหสฺสานิ, หตฺถิโน สมลงฺกตา;

ติธาปภินฺนมาตงฺคา, กุญฺชรา สฏฺฐิหายนา.

๑๔๙. ‘‘เหมชาลาภิสญฺฉนฺนา, อุปฏฺฐานํ กโรนฺติ เม;

พลกาเย คเช เจว, อูนตา เม น วิชฺชติ.

๑๕๐. ‘‘โสณฺณกิงฺกณิปุปฺผานํ, วิปากํ อนุโภมหํ;

อฏฺฐปญฺญาสกฺขตฺตุญฺจ, เทวรชฺชมการยึ.

๑๕๑. ‘‘เอกสตฺตติกฺขตฺตุญฺจ, จกฺกวตฺตี อโหสหํ;

ปถพฺยา รชฺชํ เอกสตํ, มหิยา การยึ อหํ.

๑๕๒. ‘‘โส ทานิ อมตํ ปตฺโต, อสงฺขตํ สุทุทฺทสํ [คมฺภีรํ ทุทฺทสํ ปทํ (สฺยา.)];

สํโยชนปริกฺขีโณ, นตฺถิ ทานิ ปุนพฺภโว.

๑๕๓. ‘‘อฏฺฐารเส กปฺปสเต, ยํ ปุปฺผมภิโรปยึ;

ทุคฺคตึ นาภิชานามิ, พุทฺธปูชายิทํ ผลํ.

๑๕๔. ‘‘กิเลสา ฌาปิตา มยฺหํ…เป… วิหรามิ อนาสโว.

๑๕๕. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๕๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา โสวณฺณกิงฺกณิโย เถโร อิมา

คาถาโย อภาสิตฺถาติ.

โสวณฺณกิงฺกณิยตฺเถรสฺสาปทานํ นวมํ.