๗. เอกธมฺมสฺสวนิยตฺเถรอปทานํ

๘๘. ‘‘ปทุมุตฺตโร นาม ชิโน, สพฺพธมฺมาน ปารคู;

จตุสจฺจํ ปกาเสนฺโต, สนฺตาเรสิ พหุํ ชนํ.

๘๙. ‘‘อหํ เตน สมเยน, ชฏิโล อุคฺคตาปโน;

ธุนนฺโต วากจีรานิ, คจฺฉามิ อมฺพเร ตทา.

๙๐. ‘‘พุทฺธเสฏฺฐสฺส อุปริ, คนฺตุํ น วิสหามหํ;

ปกฺขีว เสลมาสชฺช, คมนํ น ลภามหํ.

๙๑. ‘‘อุทเก โวกฺกมิตฺวาน, เอวํ คจฺฉามิ อมฺพเร;

น เม อิทํ ภูตปุพฺพํ, อิริยาปถวิโกปนํ.

๙๒. ‘‘หนฺท เมตํ คเวสิสฺสํ, อปฺเปวตฺถํ ลเภยฺยหํ;

โอโรหนฺโต อนฺตลิกฺขา, สทฺทมสฺโสสิ สตฺถุโน.

๙๓. ‘‘สเรน รชนีเยน, สวนีเยน วคฺคุนา;

อนิจฺจตํ กเถนฺตสฺส, ตญฺเญว อุคฺคหึ ตทา;

อนิจฺจสญฺญมุคฺคยฺห, อคมาสึ มมสฺสมํ.

๙๔. ‘‘ยาวตายุํ วสิตฺวาน, ตตฺถ กาลงฺกโต อหํ;

จริเม วตฺตมานมฺหิ, สทฺธมฺมสฺสวนํ สรึ.

๙๕. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๙๖. ‘‘ตึสกปฺปสหสฺสานิ, เทวโลเก รมึ อหํ;

เอกปญฺญาสกฺขตฺตุญฺจ, เทวรชฺชมการยึ.

๙๗. ‘‘เอกวีสติกฺขตฺตุญฺจ [เอกตึสติ… (สฺยา.)], จกฺกวตฺตี อโหสหํ;

ปเทสรชฺชํ วิปุลํ, คณนาโต อสงฺขิยํ.

๙๘. ‘‘อนุโภมิ สกํ ปุญฺญํ, สุขิโตหํ ภวาภเว;

อนุสฺสรามิ ตํ สญฺญํ, สํสรนฺโต ภวาภเว;

น โกฏึ ปฏิวิชฺฌามิ, นิพฺพานํ อจฺจุตํ ปทํ.

๙๙. ‘‘ปิตุเคเห นิสีทิตฺวา, สมโณ ภาวิตินฺทฺริโย;

กถํส [กถยํ (สี. ปี. ก.)] ปริทีเปนฺโต, อนิจฺจตมุทาหริ.

๑๐๐. ‘‘‘อนิจฺจา วต สงฺขารา, อุปฺปาทวยธมฺมิโน;

อุปฺปชฺชิตฺวา นิรุชฺฌนฺติ, เตสํ วูปสโม สุโข’.

๑๐๑. ‘‘สห คาถํ สุณิตฺวาน, ปุพฺพสญฺญมนุสฺสรึ;

เอกาสเน นิสีทิตฺวา, อรหตฺตมปาปุณึ.

๑๐๒. ‘‘ชาติยา สตฺตวสฺเสน, อรหตฺตมปาปุณึ;

อุปสมฺปาทยี พุทฺโธ, ธมฺมสฺสวนสฺสิทํ ผลํ.

๑๐๓. ‘‘สตสหสฺสิโต กปฺเป, ยํ ธมฺมมสุณึ ตทา;

ทุคฺคตึ นาภิชานามิ, ธมฺมสฺสวนสฺสิทํ ผลํ.

๑๐๔. ‘‘กิเลสา ฌาปิตา มยฺหํ…เป… วิหรามิ อนาสโว.

๑๐๕. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๐๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา เอกธมฺมสฺสวนิโย เถโร อิมา

คาถาโย อภาสิตฺถาติ.

เอกธมฺมสฺสวนิยตฺเถรสฺสาปทานํ สตฺตมํ.