๙. ปตฺโถทนทายกตฺเถรอปทานํ

๑๗๐. ‘‘วนจารี ปุเร อาสึ, สตตํ วนกมฺมิโก;

ปตฺโถทนํ คเหตฺวาน, กมฺมนฺตํ อคมาสหํ.

๑๗๑. ‘‘ตตฺถทฺทสาสึ สมฺพุทฺธํ, สยมฺภุํ อปราชิตํ;

วนา ปิณฺฑาย นิกฺขนฺตํ, ทิสฺวา จิตฺตํ ปสาทยึ.

๑๗๒. ‘‘ปรกมฺมายเน [วยกมฺมายเน (ก.)] ยุตฺโต, ปุญฺญญฺจ เม น วิชฺชติ;

อยํ ปตฺโถทโน อตฺถิ, โภชยิสฺสามหํ [โภชยิสฺสามิ มํ (สฺยา.)] มุนึ.

๑๗๓. ‘‘ปตฺโถทนํ คเหตฺวาน, สยมฺภุสฺส อทาสหํ;

มม นิชฺฌายมานสฺส, ปริภุญฺชิ ตทา มุนิ.

๑๗๔. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๑๗๕. ‘‘ฉตฺตึสกฺขตฺตุํ เทวินฺโท, เทวรชฺชมการยึ;

เตตฺตึสกฺขตฺตุํ ราชา จ, จกฺกวตฺตี อโหสหํ.

๑๗๖. ‘‘ปเทสรชฺชํ วิปุลํ, คณนาโต อสงฺขิยํ;

สุขิโต ยสวา โหมิ, ปตฺโถทนสฺสิทํ ผลํ.

๑๗๗. ‘‘ภวาภเว สํสรนฺโต, ลภามิ อมิตํ ธนํ;

โภเค เม อูนตา นตฺถิ, ปตฺโถทนสฺสิทํ ผลํ.

๑๗๘. ‘‘นทีโสตปฏิภาคา, โภคา นิพฺพตฺตเร มม;

ปริเมตุํ น สกฺโกมิ, ปตฺโถทนสฺสิทํ ผลํ.

๑๗๙. ‘‘อิมํ ขาท อิมํ ภุญฺช, อิมมฺหิ สยเน สย;

เตนาหํ สุขิโต โหมิ, ปตฺโถทนสฺสิทํ ผลํ.

๑๘๐. ‘‘จตุนฺนวุติโต กปฺเป, ยํ ทานมททึ ตทา;

ทุคฺคตึ นาภิชานามิ, ปตฺโถทนสฺสิทํ ผลํ.

๑๘๑. ‘‘กิเลสา ฌาปิตา มยฺหํ…เป… วิหรามิ อนาสโว.

๑๘๒. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๘๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปตฺโถทนทายโก เถโร อิมา คาถาโย อภาสิตฺถาติ.

ปตฺโถทนทายกตฺเถรสฺสาปทานํ นวมํ.