๘. ยาคุทายกตฺเถรอปทานํ

๑๔๙. ‘‘อติถึ [อตีตํ (ก.)] เม คเหตฺวาน, อคจฺฉึ คามกํ ตทา;

สมฺปุณฺณนทิกํ ทิสฺวา, สงฺฆารามํ อุปาคมึ.

๑๕๐. ‘‘อารญฺญกา ธุตธรา, ฌายิโน ลูขจีวรา;

วิเวกาภิรตา ธีรา, สงฺฆาราเม วสนฺติ เต.

๑๕๑. ‘‘คติ เตสํ อุปจฺฉินฺนา, สุวิมุตฺตาน ตาทินํ;

ปิณฺฑาย เต น คจฺฉนฺติ, โอรุทฺธนทิตาย หิ [โอรุทฺธนทิกายตึ (สฺยา.)].

๑๕๒. ‘‘ปสนฺนจิตฺโต สุมโน, เวทชาโต กตญฺชลี;

ตณฺฑุลํ เม คเหตฺวาน, ยาคุทานํ อทาสหํ.

๑๕๓. ‘‘ปญฺจนฺนํ ยาคุํ ทตฺวาน, ปสนฺโน เสหิ ปาณิภิ;

สกกมฺมาภิรทฺโธหํ, ตาวตึสมคจฺฉหํ.

๑๕๔. ‘‘มณิมยญฺจ เม พฺยมฺหํ, นิพฺพตฺติ ติทเส คเณ;

นารีคเณหิ สหิโต, โมทามิ พฺยมฺหมุตฺตเม.

๑๕๕. ‘‘เตตฺตึสกฺขตฺตุํ เทวินฺโท, เทวรชฺชมการยึ;

ตึสกฺขตฺตุํ จกฺกวตฺตี, มหารชฺชมการยึ.

๑๕๖. ‘‘ปเทสรชฺชํ วิปุลํ, คณนาโต อสงฺขิยํ;

เทวโลเก มนุสฺเส วา, อนุโภตฺวา สยํ [ยสํ (สฺยา.)] อหํ.

๑๕๗. ‘‘ปจฺฉิเม ภเว สมฺปตฺเต, ปพฺพชึ อนคาริยํ;

สห โอโรปิเต เกเส, สพฺพํ สมฺปฏิวิชฺฌหํ.

๑๕๘. ‘‘ขยโต วยโต จาปิ, สมฺมสนฺโต กเฬวรํ;

ปุเร สิกฺขาปทาทานา, อรหตฺตมปาปุณึ.

๑๕๙. ‘‘สุทินฺนํ เม ทานวรํ, วาณิชฺชํ สมฺปโยชิตํ;

เตเนว ยาคุทาเนน, ปตฺโตมฺหิ อจลํ ปทํ.

๑๖๐. ‘‘โสกํ ปริทฺทวํ พฺยาธึ, ทรถํ จิตฺตตาปนํ;

นาภิชานามิ อุปฺปนฺนํ, ยาคุทานสฺสิทํ ผลํ.

๑๖๑. ‘‘ยาคุํ สงฺฆสฺส ทตฺวาน, ปุญฺญกฺเขตฺเต อนุตฺตเร;

ปญฺจานิสํเส อนุโภมิ, อโห ยาคุสุยิฏฺฐตา.

๑๖๒. ‘‘อพฺยาธิตา รูปวตา, ขิปฺปํ ธมฺมนิสนฺติตา [นิพุชฺฌิตา (สฺยา.)];

ลาภิตา อนฺนปานสฺส, อายุ ปญฺจมกํ มม.

๑๖๓. ‘‘โย โกจิ เวทํ ชนยํ, สงฺเฆ ยาคุํ ทเทยฺย โส;

อิมานิ ปญฺจ ฐานานิ, ปฏิคเณฺหยฺย ปณฺฑิโต.

๑๖๔. ‘‘กรณียํ กตํ สพฺพํ, ภวา อุคฺฆาฏิตา มยา;

สพฺพาสวา ปริกฺขีณา, นตฺถิ ทานิ ปุนพฺภโว.

๑๖๕. ‘‘โส อหํ วิจริสฺสามิ, คามา คามํ ปุรา ปุรํ;

นมสฺสมาโน สมฺพุทฺธํ, ธมฺมสฺส จ สุธมฺมตํ.

๑๖๖. ‘‘ตึสกปฺปสหสฺสมฺหิ, ยํ ทานมททึ ตทา;

ทุคฺคตึ นาภิชานามิ, ยาคุทานสฺสิทํ ผลํ.

๑๖๗. ‘‘กิเลสา ฌาปิตา มยฺหํ…เป… วิหรามิ อนาสโว.

๑๖๘. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๖๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ยาคุทายโก เถโร อิมา คาถาโย อภาสิตฺถาติ.

ยาคุทายกตฺเถรสฺสาปทานํ อฏฺฐมํ.