๖. เอกทีปิยตฺเถรอปทานํ

๑๒๔. ‘‘ปรินิพฺพุเต สุคเต, สิทฺธตฺเถ โลกนายเก;

สเทวมานุสา สพฺเพ, ปูเชนฺติ ทฺวิปทุตฺตมํ.

๑๒๕. ‘‘อาโรปิเต จ จิตเก, สิทฺธตฺเถ โลกนายเก;

ยถาสเกน ถาเมน, จิตํ ปูเชนฺติ สตฺถุโน.

๑๒๖. ‘‘อวิทูเร จิตกสฺส, ทีปํ อุชฺชาลยึ อหํ;

ยาว อุเทติ สูริโย, ทีปํ เม ตาว อุชฺชลิ.

๑๒๗. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๑๒๘. ‘‘ตตฺถ เม สุกตํ พฺยมฺหํ, เอกทีปีติ ญายติ;

ทีปสตสหสฺสานิ, พฺยเมฺห ปชฺชลเร มม.

๑๒๙. ‘‘อุทยนฺโตว สูริโย, เทโห เม โชตเต สทา;

สปฺปภาหิ สรีรสฺส, อาโลโก โหติ เม สทา.

๑๓๐. ‘‘ติโรกุฏฺฏํ [ติโรกุฑฺฑํ (สี. สฺยา. ก.)] ติโรเสลํ, สมติคฺคยฺห [สพฺพตฺถปิ เอวเมว ทิสฺสติ] ปพฺพตํ;

สมนฺตา โยชนสตํ, ปสฺสามิ จกฺขุนา อหํ.

๑๓๑. ‘‘สตฺตสตฺตติกฺขตฺตุญฺจ, เทวโลเก รมึ อหํ;

เอกตึสติกฺขตฺตุญฺจ, เทวรชฺชมการยึ.

๑๓๒. ‘‘อฏฺฐวีสติกฺขตฺตุญฺจ, จกฺกวตฺตี อโหสหํ;

ปเทสรชฺชํ วิปุลํ, คณนาโต อสงฺขิยํ.

๑๓๓. ‘‘เทวโลกา จวิตฺวาน, นิพฺพตฺตึ มาตุกุจฺฉิยํ;

มาตุกุจฺฉิคตสฺสาปิ, อกฺขิ เม น นิมีลติ.

๑๓๔. ‘‘ชาติยา จตุวสฺโสหํ, ปพฺพชึ อนคาริยํ;

อฑฺฒมาเส อสมฺปตฺเต, อรหตฺตมปาปุณึ.

๑๓๕. ‘‘ทิพฺพจกฺขุํ วิโสเธสึ, ภวา สพฺเพ สมูหตา;

สพฺเพ กิเลสา สญฺฉินฺนา, เอกทีปสฺสิทํ ผลํ.

๑๓๖. ‘‘ติโรกุฏฺฏํ ติโรเสลํ, ปพฺพตญฺจาปิ เกวลํ;

สมติกฺกมฺม [สพฺพตฺถปี เอวเมว ทิสฺสติ] ปสฺสามิ, เอกทีปสฺสิทํ ผลํ.

๑๓๗. ‘‘วิสมา เม สมา โหนฺติ, อนฺธกาโร น วิชฺชติ;

นาหํ ปสฺสามิ ติมิรํ, เอกทีปสฺสิทํ ผลํ.

๑๓๘. ‘‘จตุนฺนวุติโต กปฺเป, ยํ ทีปมททึ ตทา;

ทุคฺคตึ นาภิชานามิ, เอกทีปสฺสิทํ ผลํ.

๑๓๙. ‘‘กิเลสา ฌาปิตา มยฺหํ…เป… วิหรามิ อนาสโว.

๑๔๐. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๔๑. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา เอกทีปิโย เถโร อิมา คาถาโย อภาสิตฺถาติ.

เอกทีปิยตฺเถรสฺสาปทานํ ฉฏฺฐํ.