๒. เอกฉตฺติยตฺเถรอปทานํ

๓๒. ‘‘จนฺทภาคานทีตีเร, อสฺสโม สุกโต มม;

สุสุทฺธปุลินากิณฺโณ, ปนฺนสาลา สุมาปิตา.

๓๓. ‘‘อุตฺตานกูลา นทิกา, สุปติตฺถา มโนรมา;

มจฺฉกจฺฉปสมฺปนฺนา [… สญฺฉนฺนา (ก.)], สุสุมารนิเสวิตา.

๓๔. ‘‘อจฺฉา ทีปี จ มยูรา, กรวีกา จ สาฬิกา;

กูชนฺติ สพฺพทา เอเต, โสภยนฺตา มมสฺสมํ.

๓๕. ‘‘โกกิลา มญฺชุภาณี จ, หํสา จ มธุรสฺสรา;

อภิกูชนฺติ เต ตตฺถ, โสภยนฺตา มมสฺสมํ.

๓๖. ‘‘สีหา พฺยคฺฆา วราหา จ, อจฺฉ [วก (สี. ปี.), พกา (สฺยา.), วกา (ก.)] โกกตรจฺฉกา;

คิริทุคฺคมฺหิ นาเทนฺติ, โสภยนฺตา มมสฺสมํ.

๓๗. ‘‘เอณีมิคา จ สรภา, เภรณฺฑา สูกรา พหู;

คิริทุคฺคมฺหิ นาเทนฺติ, โสภยนฺตา มมสฺสมํ.

๓๘. ‘‘อุทฺทาลกา จมฺปกา จ, ปาฏลี สินฺทุวารกา;

อติมุตฺตา อโสกา จ, โสภยนฺติ มมสฺสมํ [ปุปฺผนฺติ มม อสฺสเม (สี. ปี.)].

๓๙. ‘‘องฺโกลา ยูถิกา เจว, สตฺตลี พิมฺพิชาลิกา;

กณิการา จ ปุปฺผนฺติ, โสภยนฺตา มมสฺสมํ [กณิกากณิการา จ, ปุปฺผนฺติ มม อสฺสเม (สี. สฺยา. ปี.)].

๔๐. ‘‘นาคา สาลา จ สฬลา, ปุณฺฑรีเกตฺถ ปุปฺผิตา;

ทิพฺพคนฺธํ สมฺปวนฺตา, โสภยนฺติ มมสฺสมํ.

๔๑. ‘‘อชฺชุนา อสนา เจตฺถ, มหานามา จ ปุปฺผิตา;

สาลา จ กงฺคุปุปฺผา จ, โสภยนฺติ มมสฺสมํ.

๔๒. ‘‘อมฺพา ชมฺพู จ ติลกา, นิมฺพา จ สาลกลฺยาณี;

ทิพฺพคนฺธํ สมฺปวนฺตา, โสภยนฺติ มมสฺสมํ.

๔๓. ‘‘อโสกา จ กปิฏฺฐา จ, คิริมาเลตฺถ [ภคินิมาเลตฺถ (สี. ปี.), ภคินิมาลา จ (สฺยา.)] ปุปฺผิตา;

ทิพฺพคนฺธํ สมฺปวนฺตา, โสภยนฺติ มมสฺสมํ.

๔๔. ‘‘กทมฺพา กทลี เจว, อิสิมุคฺคา จ โรปิตา;

ธุวํ ผลานิ ธาเรนฺติ, โสภยนฺตา มมสฺสมํ.

๔๕. ‘‘หรีตกา อามลกา, อมฺพชมฺพุวิภีตกา;

โกลา ภลฺลาตกา พิลฺลา, ผลิโน มม อสฺสเม.

๔๖. ‘‘อวิทูเร โปกฺขรณี, สุปติตฺถา มโนรมา;

มนฺทาลเกหิ สญฺฉนฺนา, ปทุมุปฺปลเกหิ จ.

๔๗. ‘‘คพฺภํ คณฺหนฺติ ปทุมา, อญฺเญ ปุปฺผนฺติ เกสรี;

โอปตฺตกณฺณิกา เจว, ปุปฺผนฺติ มม อสฺสเม.

๔๘. ‘‘ปาฐีนา ปาวุสา มจฺฉา, พลชา มุญฺชโรหิตา;

อจฺโฉทกมฺหิ วิจรํ, โสภยนฺติ มมสฺสมํ.

๔๙. ‘‘นยิตา อมฺพคนฺธี จ, อนุกูเล จ เกตกา;

ทิพฺพคนฺธํ สมฺปวนฺตา, โสภยนฺติ มมสฺสมํ.

๕๐. ‘‘มธุ ภิสมฺหา สวติ, ขีรสปฺปิ มุฬาลิภิ;

ทิพฺพคนฺธํ สมฺปวนฺตา, โสภยนฺติ มมสฺสมํ.

๕๑. ‘‘ปุลินา โสภนา ตตฺถ, อากิณฺณา ชลเสวิตา;

โอปุปฺผา ปุปฺผิตา เสนฺติ, โสภยนฺตา มมสฺสมํ.

๕๒. ‘‘ชฏาภาเรน ภริตา, อชินุตฺตรวาสนา;

วากจีรธรา สพฺเพ, โสภยนฺติ มมสฺสมํ.

๕๓. ‘‘ยุคมตฺตมเปกฺขนฺตา, นิปกา สนฺตวุตฺติโน;

กามโภเค อนเปกฺขา, วสนฺติ มม อสฺสเม.

๕๔. ‘‘ปรูฬฺหกจฺฉนขโลมา, ปงฺกทนฺตา รชสฺสิรา;

รโชชลฺลธรา สพฺเพ, วสนฺติ มม อสฺสเม.

๕๕. ‘‘อภิญฺญาปารมิปฺปตฺตา, อนฺตลิกฺขจรา จ เต;

อุคฺคจฺฉนฺตา นภํ เอเต, โสภยนฺติ มมสฺสมํ.

๕๖. ‘‘เตหิ สิสฺเสหิ ปริวุโต, วสามิ วิปิเน ตทา;

รตฺตินฺทิวํ น ชานามิ, สทา ฌานสมปฺปิโต.

๕๗. ‘‘ภควา ตมฺหิ สมเย, อตฺถทสฺสี มหามุนิ;

ตมนฺธการํ นาเสนฺโต, อุปฺปชฺชิ โลกนายโก.

๕๘. ‘‘อถ อญฺญตโร สิสฺโส, อาคจฺฉิ มม สนฺติกํ;

มนฺเต อชฺเฌตุกาโม โส, ฉฬงฺคํ นาม ลกฺขณํ.

๕๙. ‘‘พุทฺโธ โลเก สมุปฺปนฺโน, อตฺถทสฺสี มหามุนิ;

จตุสจฺจํ ปกาเสนฺโต, เทเสติ อมตํ ปทํ.

๖๐. ‘‘ตุฏฺฐหฏฺโฐ ปมุทิโต, ธมฺมนฺตรคตาสโย;

อสฺสมา อภินิกฺขมฺม, อิทํ วจนมพฺรวึ.

๖๑. ‘‘‘พุทฺโธ โลเก สมุปฺปนฺโน, ทฺวตฺตึสวรลกฺขโณ;

เอถ สพฺเพ คมิสฺสาม, สมฺมาสมฺพุทฺธสนฺติกํ’.

๖๒. ‘‘โอวาทปฏิกรา เต, สธมฺเม ปารมึ คตา;

สาธูติ สมฺปฏิจฺฉึสุ, อุตฺตมตฺถคเวสกา.

๖๓. ‘‘ชฏาภารภริตา เต [ชฏาภาเรน ภริตา (ก.)], อชินุตฺตรวาสนา;

อุตฺตมตฺถํ คเวสนฺตา, นิกฺขมึสุ วนา ตทา.

๖๔. ‘‘ภควา ตมฺหิ สมเย, อตฺถทสฺสี มหายโส;

จตุสจฺจํ ปกาเสนฺโต, เทเสติ อมตํ ปทํ.

๖๕. ‘‘เสตจฺฉตฺตํ คเหตฺวาน, พุทฺธเสฏฺฐสฺส ธารยึ;

เอกาหํ ธารยิตฺวาน, พุทฺธเสฏฺฐํ อวนฺทหํ.

๖๖. ‘‘อตฺถทสฺสี ตุ ภควา, โลกเชฏฺโฐ นราสโภ;

ภิกฺขุสงฺเฆ นิสีทิตฺวา, อิมา คาถา อภาสถ.

๖๗. ‘‘‘โย เม ฉตฺตํ อธาเรสิ, ปสนฺโน เสหิ ปาณิภิ;

ตมหํ กิตฺตยิสฺสามิ, สุณาถ มม ภาสโต.

๖๘. ‘‘‘อิมสฺส ชายมานสฺส, เทวตฺเต อถ มานุเส;

ธาเรสฺสติ สทา ฉตฺตํ, ฉตฺตทานสฺสิทํ ผลํ.

๖๙. ‘‘‘สตฺตสตฺตติกปฺปานิ, เทวโลเก รมิสฺสติ;

สหสฺสกฺขตฺตุํ ราชา จ, จกฺกวตฺตี ภวิสฺสติ.

๗๐. ‘‘‘สตฺตสตฺตติกฺขตฺตุญฺจ, เทวรชฺชํ กริสฺสติ;

ปเทสรชฺชํ วิปุลํ, คณนาโต อสงฺขิยํ.

๗๑. ‘‘‘อฏฺฐารเส กปฺปสเต, โคตโม สกฺยปุงฺคโว;

ตมนฺธการํ นาเสนฺโต, อุปฺปชฺชิสฺสติ จกฺขุมา.

๗๒. ‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สพฺพาสเว ปริญฺญาย, วิหริสฺสตินาสโว’.

๗๓. ‘‘ยโต อหํ กมฺมมกํ, ฉตฺตํ พุทฺธสฺส ธารยํ;

เอตฺถนฺตเร น ชานามิ, เสตจฺฉตฺตํ อธาริตํ.

๗๔. ‘‘อิทํ ปจฺฉิมกํ มยฺหํ, จริโม วตฺตเต ภโว;

ฉตฺตธารณมชฺชาปิ, วตฺตเต นิจฺจกาลิกํ.

๗๕. ‘‘อโห เม สุกตํ กมฺมํ, อตฺถทสฺสิสฺส ตาทิโน;

สพฺพาสวา ปริกฺขีณา, นตฺถิ ทานิ ปุนพฺภโว.

๗๖. ‘‘กิเลสา ฌาปิตา มยฺหํ…เป… วิหรามิ อนาสโว.

๗๗. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๗๘. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา เอกฉตฺติโย เถโร อิมา คาถาโย อภาสิตฺถาติ;

เอกฉตฺติยตฺเถรสฺสาปทานํ ทุติยํ.