๑. ภทฺทาลิตฺเถรอปทานํ

๑. ‘‘สุเมโธ นาม สมฺพุทฺโธ, อคฺโค การุณิโก มุนิ;

วิเวกกาโม โลกคฺโค, หิมวนฺตมุปาคมิ.

๒. ‘‘อชฺโฌคาเหตฺวา หิมวํ, สุเมโธ โลกนายโก;

ปลฺลงฺกํ อาภุชิตฺวาน, นิสีทิ ปุริสุตฺตโม.

๓. ‘‘สมาธึ โส สมาปนฺโน, สุเมโธ โลกนายโก;

สตฺตรตฺตินฺทิวํ พุทฺโธ, นิสีทิ ปุริสุตฺตโม.

๔. ‘‘ขาริภารํ [ขาริกาชํ (สี.)] คเหตฺวาน, วนมชฺโฌคหึ อหํ;

ตตฺถทฺทสาสึ สมฺพุทฺธํ, โอฆติณฺณมนาสวํ.

๕. ‘‘สมฺมชฺชนึ คเหตฺวาน, สมฺมชฺชิตฺวาน อสฺสมํ;

จตุทณฺเฑ ฐเปตฺวาน, อกาสึ มณฺฑปํ ตทา.

๖. ‘‘สาลปุปฺผํ อาหริตฺวา, มณฺฑปํ ฉาทยึ อหํ;

ปสนฺนจิตฺโต สุมโน, อภิวนฺทึ ตถาคตํ.

๗. ‘‘ยํ วทนฺติ สุเมโธติ, ภูริปญฺญํ สุเมธสํ;

ภิกฺขุสงฺเฆ นิสีทิตฺวา, อิมา คาถา อภาสถ.

๘. ‘‘‘พุทฺธสฺส คิรมญฺญาย, สพฺเพ เทวา สมาคมุํ;

อสํสยํ พุทฺธเสฏฺโฐ, ธมฺมํ เทเสติ จกฺขุมา.

๙. ‘‘‘สุเมโธ นาม สมฺพุทฺโธ, อาหุตีนํ ปฏิคฺคโห;

เทวสงฺเฆ นิสีทิตฺวา, อิมา คาถา อภาสถ.

๑๐. ‘‘‘โย เม สตฺตาหํ มณฺฑปํ, ธารยี สาลฉาทิตํ;

ตมหํ กิตฺตยิสฺสามิ, สุณาถ มม ภาสโต.

๑๑. ‘‘‘เทวภูโต มนุสฺโส วา, เหมวณฺโณ ภวิสฺสติ;

ปหูตโภโค หุตฺวาน, กามโภคี ภวิสฺสติ.

๑๒. ‘‘‘สฏฺฐิ นาคสหสฺสานิ, สพฺพาลงฺการภูสิตา;

สุวณฺณกจฺฉา มาตงฺคา, เหมกปฺปนวาสสา.

๑๓. ‘‘‘อารูฬฺหา คามณีเยหิ, โตมรงฺกุสปาณิภิ;

สายํ ปาโต [สายปาโต (ปี.)] อุปฏฺฐานํ, อาคมิสฺสนฺติมํ นรํ;

เตหิ นาเคหิ ปริวุโต, รมิสฺสติ อยํ นโร.

๑๔. ‘‘‘สฏฺฐิ อสฺสสหสฺสานิ, สพฺพาลงฺการภูสิตา;

อาชานียาว ชาติยา, สินฺธวา สีฆวาหิโน.

๑๕. ‘‘‘อารูฬฺหา คามณีเยหิ, อิลฺลิยาจาปธาริภิ;

ปริวาเรสฺสนฺติมํ นิจฺจํ, พุทฺธปูชายิทํ ผลํ.

๑๖. ‘‘‘สฏฺฐิ รถสหสฺสานิ, สพฺพาลงฺการภูสิตา;

ทีปา อโถปิ เวยคฺฆา, สนฺนทฺธา อุสฺสิตทฺธชา.

๑๗. ‘‘‘อารูฬฺหา คามณีเยหิ, จาปหตฺเถหิ วมฺมิภิ;

ปริวาเรสฺสนฺติมํ นิจฺจํ, พุทฺธปูชายิทํ ผลํ.

๑๘. ‘‘‘สฏฺฐิ คามสหสฺสานิ, ปริปุณฺณานิ สพฺพโส;

ปหูตธนธญฺญานิ, สุสมิทฺธานิ สพฺพโส;

สทา ปาตุภวิสฺสนฺติ, พุทฺธปูชายิทํ ผลํ.

๑๙. ‘‘‘หตฺถี อสฺสา รถา ปตฺตี, เสนา จ จตุรงฺคินี;

ปริวาเรสฺสนฺติมํ นิจฺจํ, พุทฺธปูชายิทํ ผลํ.

๒๐. ‘‘‘อฏฺฐารเส กปฺปสเต, เทวโลเก รมิสฺสติ;

สหสฺสกฺขตฺตุํ ราชา จ, จกฺกวตฺตี ภวิสฺสติ.

๒๑. ‘‘‘สตานํ ตีณิกฺขตฺตุญฺจ, เทวรชฺชํ กริสฺสติ;

ปเทสรชฺชํ วิปุลํ, คณนาโต อสงฺขิยํ.

๒๒. ‘‘‘ตึสกปฺปสหสฺสมฺหิ, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๒๓. ‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สพฺพาสเว ปริญฺญาย, วิหริสฺสตินาสโว’.

๒๔. ‘‘ตึสกปฺปสหสฺสมฺหิ, อทฺทสํ โลกนายกํ;

เอตฺถนฺตรมุปาทาย, คเวสึ อมตํ ปทํ.

๒๕. ‘‘ลาภา มยฺหํ สุลทฺธํ เม, ยมหญฺญาสิ สาสนํ;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๒๖. ‘‘นโม เต ปุริสาชญฺญ, นโม เต ปุริสุตฺตม;

ตว ญาณํ ปกิตฺเตตฺวา, ปตฺโตมฺหิ อจลํ ปทํ.

๒๗. ‘‘ยํ ยํ โยนุปปชฺชามิ, เทวตฺตํ อถ มานุสํ;

สพฺพตฺถ สุขิโต โหมิ, ผลํ เม ญาณกิตฺตเน.

๒๘. ‘‘อิทํ ปจฺฉิมกํ มยฺหํ, จริโม วตฺตเต ภโว;

นาโคว พนฺธนํ เฉตฺวา, วิหรามิ อนาสโว.

๒๙. ‘‘กิเลสา ฌาปิตา มยฺหํ, ภวา สพฺเพ สมูหตา;

นาโคว พนฺธนํ เฉตฺวา, วิหรามิ อนาสโว.

๓๐. ‘‘สฺวาคตํ วต เม อาสิ, มม พุทฺธสฺส สนฺติเก;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๓๑. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา ภทฺทาลิตฺเถโร อิมา คาถาโย อภาสิตฺถาติ.

ภทฺทาลิตฺเถรสฺสาปทานํ ปฐมํ.