๙. ชตุกณฺณิตฺเถรอปทานํ

๒๗๖. ‘‘นคเร หํสวติยา, เสฏฺฐิปุตฺโต อโหสหํ;

สมปฺปิโต กามคุเณ, ปริจาเรมหํ ตทา.

๒๗๗. ‘‘ตโต [ตโย (สี.)] ปาสาทมารุยฺห, มหาโภเค วลญฺชโก [อุพฺพิทฺธา เคหลุญฺชกา (ก.), อุพฺพิทฺธาเคหลญฺฉกา (สี.)];

ตตฺถ นจฺเจหิ คีเตหิ, ปริจาเรมหํ ตทา.

๒๗๘. ‘‘ตูริยา อาหตา มยฺหํ, สมฺมตาฬสมาหิตา;

นจฺจนฺตา [รญฺชนฺตี (สฺยา.), รชฺชนฺตา (ก.)] อิตฺถิโย สพฺพา, หรนฺติเยว เม มโน.

๒๗๙. ‘‘เจลาปิกา [เจลาวกา (สฺยา.), เวลามิกา (ปี.)] ลามณิกา [วามนิกา (สฺยา. ปี.)], กุญฺชวาสี ติมชฺฌิกา [กุญฺชวา สีหิมชฺฌิตา (สฺยา.), กุชฺชา วา สีหิมชฺฌิกา (ปี.)];

ลงฺฆิกา โสกชฺฌายี จ, ปริวาเรนฺติ มํ สทา.

๒๘๐. ‘‘เวตาฬิโน กุมฺภถูนี, นฏา จ นจฺจกา พหู;

นฏกา นาฏกา เจว, ปริวาเรนฺติ มํ สทา.

๒๘๑. ‘‘กปฺปกา นฺหาปกา สูทา, มาลาการา สุปาสกา [สุมาปกา (สี. สฺยา.)];

ชลฺลา มลฺลา จ เต สพฺเพ, ปริวาเรนฺติ มํ สทา.

๒๘๒. ‘‘เอเตสุ กีฬมาเนสุ, สิกฺขิเต กตุปาสเน;

รตฺตินฺทิวํ น ชานามิ, อินฺโทว ติทสงฺคเณ.

๒๘๓. ‘‘อทฺธิกา ปถิกา สพฺเพ, ยาจกา วรกา พหู;

อุปคจฺฉนฺติ เต นิจฺจํ, ภิกฺขยนฺตา มมํ ฆรํ.

๒๘๔. ‘‘สมณา พฺราหฺมณา เจว, ปุญฺญกฺเขตฺตา อนุตฺตรา;

วฑฺฒยนฺตา มมํ ปุญฺญํ, อาคจฺฉนฺติ มมํ ฆรํ.

๒๘๕. ‘‘ปฏคา [ปฏกา (สี. สฺยา.), ปทกา (ปี.)] ลฏุกา [ลฏกา (สี.)] สพฺเพ, นิคณฺฐา ปุปฺผสาฏกา;

เตทณฺฑิกา เอกสิขา, อาคจฺฉนฺติ มมํ ฆรํ.

๒๘๖. ‘‘อาชีวกา วิลุตฺตาวี, โคธมฺมา เทวธมฺมิกา;

รโชชลฺลธรา เอเต, อาคจฺฉนฺติ มมํ ฆรํ.

๒๘๗. ‘‘ปริตฺตกา สนฺติปตฺตา [ปริวตฺตกา สิทฺธิปตฺตา (สี. สฺยา. ปี.)], โกธปุคฺคนิกา [โกณฺฑปุคฺคณิกา (สี.), โกณฺฑปุคฺคลิกา (ปี.)] พหู;

ตปสฺสี วนจารี จ, อาคจฺฉนฺติ มมํ ฆรํ.

๒๘๘. ‘‘โอฑฺฑกา ทมิฬา เจว, สากุฬา มลวาฬกา [มลยาลกา (สี. สฺยา. ปี.)];

สวรา โยนกา เจว, อาคจฺฉนฺติ มมํ ฆรํ.

๒๘๙. ‘‘อนฺธกา มุณฺฑกา สพฺเพ, โกฏลา หนุวินฺทกา [โกลกา สานุวินฺทกา (สี. ปี.)];

อาราวจีนรฏฺฐา จ, อาคจฺฉนฺติ มมํ ฆรํ.

๒๙๐. ‘‘อลสนฺทกา [อลสนฺตา (ก.)] ปลฺลวกา, ธมฺมรา นิคฺคมานุสา [พพฺพรา ภคฺคการุสา (สี.)];

เคหิกา [โรหิตา (สี.), พาหิกา (ปี.)] เจตปุตฺตา จ, อาคจฺฉนฺติ มมํ ฆรํ.

๒๙๑. ‘‘มาธุรกา โกสลกา, กลิงฺคา [กาสิกา (สี.)] หตฺถิโปริกา;

อิสิณฺฑา มกฺกลา เจว, อาคจฺฉนฺติ มมํ ฆรํ.

๒๙๒. ‘‘เจลาวกา อารพฺภา [อรมฺมา (สี. ปี.)] จ, โอฆุฬฺหา [โอกฺกลา (สี.)] เมฆลา พหู;

ขุทฺทกา สุทฺทกา เจว, อาคจฺฉนฺติ มมํ ฆรํ.

๒๙๓. ‘‘โรหณา สินฺธวา เจว, จิตกา เอกกณฺณิกา;

สุรฏฺฐา อปรนฺตา จ, อาคจฺฉนฺติ มมํ ฆรํ.

๒๙๔. ‘‘สุปฺปารกา กุมารา [กิกุมารา (สี. ปี.)] จ, มลฺลโสวณฺณภูมิกา [มลยา โสณฺณภูมิกา (สี. สฺยา. ปี.)];

วชฺชีตงฺคา [วชฺชี ตารา (สี.), วชฺชีหารา (สฺยา. ปี.)] จ เต สพฺเพ, อาคจฺฉนฺติ มมํ ฆรํ.

๒๙๕. ‘‘นฬการา เปสการา, จมฺมการา จ ตจฺฉกา;

กมฺมารา กุมฺภการา จ, อาคจฺฉนฺติ มมํ ฆรํ.

๒๙๖. ‘‘มณิการา โลหการา, โสณฺณการา จ ทุสฺสิกา;

ติปุการา จ เต สพฺเพ, อาคจฺฉนฺติ มมํ ฆรํ.

๒๙๗. ‘‘อุสุการา ภมการา, เปสการา จ คนฺธิกา;

รชกา ตุนฺนวายา จ, อาคจฺฉนฺติ มมํ ฆรํ.

๒๙๘. ‘‘เตลิกา กฏฺฐหารา จ, อุทหารา จ เปสฺสิกา;

สูปิกา สูปรกฺขา จ, อาคจฺฉนฺติ มมํ ฆรํ.

๒๙๙. ‘‘โทวาริกา อนีกฏฺฐา, พนฺธิกา [วนฺทิกา (สี.), คนฺถิกา (สฺยา.), สนฺทิกา (ปี.)] ปุปฺผฉฑฺฑกา;

หตฺถารุหา หตฺถิปาลา, อาคจฺฉนฺติ มมํ ฆรํ.

๓๐๐. ‘‘อานนฺทสฺส มหารญฺโญ [อานนฺทสฺส นาม รญฺโญ (สฺยา.), อรินฺทมนาม รญฺโญ (ปี.)], มมตฺถสฺส [ปมตฺตสฺส (สี. ปี.), สมคฺคสฺส (สฺยา.)] อทาสหํ;

สตฺตวณฺเณน รตเนน, อูนตฺถํ [อูนตฺตํ (สี. สฺยา. ปี.)] ปูรยามหํ.

๓๐๑. ‘‘เย มยา กิตฺติตา สพฺเพ, นานาวณฺณา พหู ชนา;

เตสาหํ จิตฺตมญฺญาย, ตปฺปยึ รตเนนหํ.

๓๐๒. ‘‘วคฺคูสุ ภาสมานาสุ, วชฺชมานาสุ เภริสุ;

สงฺเขสุ ธมยนฺเตสุ, สกเคเห รมามหํ.

๓๐๓. ‘‘ภควา ตมฺหิ สมเย, ปทุมุตฺตรนายโก;

วสีสตสหสฺเสหิ, ปริกฺขีณาสเวหิ โส.

๓๐๔. ‘‘ภิกฺขูหิ สหิโต วีถึ, ปฏิปชฺชิตฺถ จกฺขุมา;

โอภาเสนฺโต ทิสา สพฺพา, ทีปรุกฺโขว โชตติ.

๓๐๕. ‘‘วชฺชนฺติ เภริโย สพฺพา, คจฺฉนฺเต โลกนายเก;

ปภา นิทฺธาวเต ตสฺส, สตรํสีว อุคฺคโต.

๓๐๖. ‘‘กวาฏนฺตริกายาปิ, ปวิฏฺเฐน จ รสฺมินา;

อนฺโตฆเรสุ วิปุโล, อาโลโก อาสิ ตาวเท.

๓๐๗. ‘‘ปภํ ทิสฺวาน พุทฺธสฺส, ปาริสชฺเช อโวจหํ;

นิสฺสํสยํ พุทฺธเสฏฺโฐ, อิมํ วีถิมุปาคโต.

๓๐๘. ‘‘ขิปฺปํ โอรุยฺห ปาสาทา, อคมึ อนฺตราปณํ;

สมฺพุทฺธํ อภิวาเทตฺวา, อิทํ วจนมพฺรวึ.

๓๐๙. ‘‘‘อนุกมฺปตุ เม พุทฺโธ, ชลชุตฺตมนายโก;

วสีสตสหสฺเสหิ, อธิวาเสสิ โส มุนิ’.

๓๑๐. ‘‘นิมนฺเตตฺวาน สมฺพุทฺธํ, อภิเนสึ สกํ ฆรํ;

ตตฺถ อนฺเนน ปาเนน, สนฺตปฺเปสึ มหามุนึ.

๓๑๑. ‘‘ภุตฺตาวึ กาลมญฺญาย, พุทฺธเสฏฺฐสฺส ตาทิโน;

สตงฺคิเกน ตูริเยน, พุทฺธเสฏฺฐํ อุปฏฺฐหึ.

๓๑๒. ‘‘ปทุมุตฺตโร โลกวิทู, อาหุตีนํ ปฏิคฺคโห;

อนฺโตฆเร นิสีทิตฺวา, อิมา คาถา อภาสถ.

๓๑๓. ‘‘‘โย มํ ตูริเยหุปฏฺฐาสิ, อนฺนปานญฺจทาสิ เม;

ตมหํ กิตฺตยิสฺสามิ, สุณาถ มม ภาสโต.

๓๑๔. ‘‘‘ปหูตภกฺโข หุตฺวาน, สหิรญฺโญ สโภชโน;

จตุทีเป เอกรชฺชํ, การยิสฺสติยํ นโร.

๓๑๕. ‘‘‘ปญฺจสีเล สมาทาย, ทสกมฺมปเถ ตโต;

สมาทาย ปวตฺเตนฺโต, ปริสํ สิกฺขาปยิสฺสติ.

๓๑๖. ‘‘‘ตูริยสตสหสฺสานิ, เภริโย สมลงฺกตา;

วชฺชยิสฺสนฺติมํ นิจฺจํ, อุปฏฺฐานสฺสิทํ ผลํ.

๓๑๗. ‘‘‘ตึสกปฺปสหสฺสานิ, เทวโลเก รมิสฺสติ;

จตุสฏฺฐิกฺขตฺตุํ เทวินฺโท, เทวรชฺชํ กริสฺสติ.

๓๑๘. ‘‘‘จตุสฏฺฐิกฺขตฺตุํ ราชา, จกฺกวตฺตี ภวิสฺสติ;

ปเทสรชฺชํ วิปุลํ, คณนาโต อสงฺขิยํ.

๓๑๙. ‘‘‘กปฺปสตสหสฺสมฺหิ, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๓๒๐. ‘‘‘อุปปชฺชติ ยํ โยนึ, เทวตฺตํ อถ มานุสํ;

อนูนโภโค หุตฺวาน, มนุสฺสตฺตํ คมิสฺสติ.

๓๒๑. ‘‘‘อชฺฌายโก ภวิตฺวาน, ติณฺณํ เวทาน ปารคู;

อุตฺตมตฺถํ คเวสนฺโต, จริสฺสติ มหึ อิมํ.

๓๒๒. ‘‘‘โส ปจฺฉา ปพฺพชิตฺวาน, สุกฺกมูเลน โจทิโต;

โคตมสฺส ภควโต, สาสเนภิรมิสฺสติ.

๓๒๓. ‘‘‘อาราธยิตฺวาน สมฺพุทฺธํ, โคตมํ สกฺยปุงฺควํ;

กิเลเส ฌาปยิตฺวาน, อรหายํ ภวิสฺสติ’.

๓๒๔. ‘‘วิปิเน พฺยคฺฆราชาว, มิคราชาว เกสรี;

อภีโต วิหรามชฺช, สกฺยปุตฺตสฺส สาสเน.

๓๒๕. ‘‘เทวโลเก มนุสฺเส วา, ทลิทฺเท ทุคฺคติมฺหิ วา;

นิพฺพตฺตึ เม น ปสฺสามิ, อุปฏฺฐานสฺสิทํ ผลํ.

๓๒๖. ‘‘วิเวกมนุยุตฺโตมฺหิ, อุปสนฺโต นิรูปธิ;

นาโคว พนฺธนํ เฉตฺวา, วิหรามิ อนาสโว.

๓๒๗. ‘‘กิเลสา ฌาปิตา มยฺหํ…เป… วิหรามิ อนาสโว.

๓๒๘. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๓๒๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ชตุกณฺณิตฺเถโร อิมา คาถาโย อภาสิตฺถาติ.

ชตุกณฺณิตฺเถรสฺสาปทานํ นวมํ.