๑๐. อุเทนตฺเถรอปทานํ

๓๓๐. ‘‘หิมวนฺตสฺสาวิทูเร, ปทุโม นาม ปพฺพโต;

อสฺสโม สุกโต มยฺหํ, ปณฺณสาลา สุมาปิตา.

๓๓๑. ‘‘นทิโย สนฺทเร ตตฺถ, สุปติตฺถา มโนรมา;

อจฺโฉทกา สีตชลา, สนฺทเร นทิโย สทา.

๓๓๒. ‘‘ปาฐีนา ปาวุสา มจฺฉา, พลชา มุญฺชโรหิตา;

โสเภนฺตา นทิโย เอเต, วสนฺติ นทิยา สทา.

๓๓๓. ‘‘อมฺพชมฺพูหิ สญฺฉนฺนา, กเรริติลกา ตถา;

อุทฺทาลกา ปาฏลิโย, โสเภนฺติ มม อสฺสมํ.

๓๓๔. ‘‘องฺโกลกา พิมฺพิชาลา, มายาการี จ ปุปฺผิตา;

คนฺเธน อุปวายนฺตา, โสเภนฺติ มม อสฺสมํ.

๓๓๕. ‘‘อติมุตฺตา สตฺตลิกา, นาคา สาลา จ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํ.

๓๓๖. ‘‘โกสมฺพา สฬลา นีปา, อฏฺฐงฺคาปิ จ ปุปฺผิตา [อฏฺฐงฺคา จ สุปุปฺผิตา (สี.), กฏฺฐงฺคา จ สุปุปฺผิตา (ปี.)];

ทิพฺพคนฺธํ สมฺปวนฺตา, โสเภนฺติ มม อสฺสมํ.

๓๓๗. ‘‘หรีตกา อามลกา, อมฺพชมฺพุวิภีตกา;

โกลา ภลฺลาตกา พิลฺลา, ผลานิ พหุ อสฺสเม.

๓๓๘. ‘‘กลมฺพา กนฺทลี ตตฺถ, ปุปฺผนฺติ มม อสฺสเม;

ทิพฺพคนฺธํ [ทิพฺพคนฺธา (สี. สฺยา. ปี.) เอวํ ปรตฺถปิ] สมฺปวนฺตา, โสเภนฺติ มม อสฺสมํ.

๓๓๙. ‘‘อโสกปิณฺฑิวารี จ [อโสกปิณฺฑี จ วรี (สี. สฺยา.), อโสกปิณฺฑี จ วารี (ปี.)], นิมฺพรุกฺขา จ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํ.

๓๔๐. ‘‘ปุนฺนาคา คิริปุนฺนาคา, ติมิรา ตตฺถ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํ.

๓๔๑. ‘‘นิคฺคุณฺฑี สิรินิคฺคุณฺฑี, จมฺปรุกฺเขตฺถ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํ.

๓๔๒. ‘‘อวิทูเร โปกฺขรณี, จกฺกวากูปกูชิตา;

มนฺทาลเกหิ สญฺฉนฺนา, ปทุมุปฺปลเกหิ จ.

๓๔๓. ‘‘อจฺโฉทกา สีตชลา, สุปติตฺถา มโนรมา;

อจฺฉา ผลิกสมานา, โสเภนฺติ มม อสฺสมํ.

๓๔๔. ‘‘ปทุมา ปุปฺผเร ตตฺถ, ปุณฺฑรีกา จ อุปฺปลา;

มนฺทาลเกหิ สญฺฉนฺนา, โสเภนฺติ มม อสฺสมํ.

๓๔๕. ‘‘ปาฐีนา ปาวุสา มจฺฉา, พลชา มุญฺชโรหิตา;

วิจรนฺตาว เต ตตฺถ, โสเภนฺติ มม อสฺสมํ.

๓๔๖. ‘‘กุมฺภีลา สุสุมารา จ, กจฺฉปา จ คหา พหู;

โอคหา อชครา จ, โสเภนฺติ มม อสฺสมํ.

๓๔๗. ‘‘ปาเรวตา รวิหํสา, จกฺกวากา นทีจรา;

ทินฺทิภา สาฬิกา เจตฺถ, โสเภนฺติ มม อสฺสมํ.

๓๔๘. ‘‘นยิตา อมฺพคนฺธี จ, เกตกา ตตฺถ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํ.

๓๔๙. ‘‘สีหา พฺยคฺฆา จ ทีปี จ, อจฺฉโกกตรจฺฉกา;

อนุสญฺจรนฺตา ปวเน, โสเภนฺติ มม อสฺสมํ.

๓๕๐. ‘‘ชฏาภาเรน ภริตา, อชินุตฺตรวาสนา;

อนุสญฺจรนฺตา ปวเน, โสเภนฺติ มม อสฺสมํ.

๓๕๑. ‘‘อชินานิธรา เอเต, นิปกา สนฺตวุตฺติโน;

อปฺปาหาราว เต สพฺเพ, โสเภนฺติ มม อสฺสมํ.

๓๕๒. ‘‘ขาริภารํ คเหตฺวาน, อชฺโฌคยฺห วนํ ตทา;

มูลผลานิ ภุญฺชนฺตา, วสนฺติ อสฺสเม ตทา.

๓๕๓. ‘‘น เต ทารุํ อาหรนฺติ, อุทกํ ปาทโธวนํ;

สพฺเพสํ อานุภาเวน, สยเมวาหรียติ.

๓๕๔. ‘‘จุลฺลาสีติสหสฺสานิ, อิสเยตฺถ สมาคตา;

สพฺเพว ฌายิโน เอเต, อุตฺตมตฺถคเวสกา.

๓๕๕. ‘‘ตปสฺสิโน พฺรหฺมจารี, โจเทนฺตา อปฺปนาว เต;

อมฺพราวจรา สพฺเพ, วสนฺติ อสฺสเม ตทา.

๓๕๖. ‘‘ปญฺจาหํ สนฺนิปตนฺติ, เอกคฺคา สนฺตวุตฺติโน;

อญฺโญญฺญํ อภิวาเทตฺวา, ปกฺกมนฺติ ทิสามุขา.

๓๕๗. ‘‘ปทุมุตฺตโร นาม ชิโน, สพฺพธมฺมาน ปารคู;

ตมนฺธการํ วิธมํ, อุปฺปชฺชิ ตาวเท ชิโน.

๓๕๘. ‘‘มม อสฺสมสามนฺตา, ยกฺโข อาสิ มหิทฺธิโก;

โส เม สํสิตฺถ สมฺพุทฺธํ, ชลชุตฺตมนายกํ.

๓๕๙. ‘‘เอส พุทฺโธ สมุปฺปนฺโน, ปทุมุตฺตโร มหามุนิ;

ขิปฺปํ คนฺตฺวาน สมฺพุทฺธํ, ปยิรูปาส มาริส.

๓๖๐. ‘‘ยกฺขสฺส วจนํ สุตฺวา, วิปฺปสนฺเนน เจตสา;

อสฺสมํ สํสาเมตฺวาน, นิกฺขมึ วิปินา ตทา.

๓๖๑. ‘‘เจเฬว ฑยฺหมานมฺหิ, นิกฺขมิตฺวาน อสฺสมา;

เอกรตฺตึ นิวาเสตฺวา [นิวสิตฺวา (สี.), นิวาเสน (?)], อุปคจฺฉึ วินายกํ.

๓๖๒. ‘‘ปทุมุตฺตโร โลกวิทู, อาหุตีนํ ปฏิคฺคโห;

จตุสจฺจํ ปกาเสนฺโต, เทเสสิ อมตํ ปทํ.

๓๖๓. ‘‘สุผุลฺลํ ปทุมํ คยฺห, อุปคนฺตฺวา มเหสิโน;

ปสนฺนจิตฺโต สุมโน, พุทฺธสฺส อภิโรปยึ.

๓๖๔. ‘‘ปูชยิตฺวาน สมฺพุทฺธํ, ชลชุตฺตมนายกํ;

เอกํสํ อชินํ กตฺวา, สนฺถวึ โลกนายกํ.

๓๖๕. ‘‘เยน ญาเณน สมฺพุทฺโธ, วสตีห อนาสโว;

ตํ ญาณํ กิตฺตยิสฺสามิ, สุณาถ มม ภาสโต.

๓๖๖. ‘‘‘สํสารโสตํ ฉินฺทิตฺวา, ตาเรสิ สพฺพปาณินํ;

ตว ธมฺมํ สุณิตฺวาน, ตณฺหาโสตํ ตรนฺติ เต.

๓๖๗. ‘‘‘ตุวํ สตฺถา จ เกตุ จ, ธโช ยูโป จ ปาณินํ;

ปรายโณ ปติฏฺฐา จ, ทีโป จ ทฺวิปทุตฺตม [ทิปทุตฺตม (สี. สฺยา. ปี.)].

๓๖๘. ‘‘‘ยาวตา คณิโน โลเก, สตฺถวาหา ปวุจฺจเร;

ตุวํ อคฺโคสิ สพฺพญฺญุ, ตว อนฺโตคธาว เต.

๓๖๙. ‘‘‘ตว ญาเณน สพฺพญฺญุ, ตาเรสิ ชนตํ พหุํ;

ตว ทสฺสนมาคมฺม, ทุกฺขสฺสนฺตํ กริสฺสเร.

๓๗๐. ‘‘‘เย เกจิเม คนฺธชาตา, โลเก วายนฺติ จกฺขุม;

ตว คนฺธสโม นตฺถิ, ปุญฺญกฺเขตฺเต มหามุเน’.

๓๗๑. ‘‘‘ติรจฺฉานโยนึ นิรยํ, ปริโมเจสิ [ปริโมเจหิ (สฺยา. ก.)] จกฺขุม;

อสงฺขตํ ปทํ สนฺตํ, เทเสสิ [เทเสหิ (สฺยา. ก.)] ตฺวํ มหามุเน’.

๓๗๒. ‘‘ปทุมุตฺตโร โลกวิทู, อาหุตีนํ ปฏิคฺคโห;

ภิกฺขุสงฺเฆ นิสีทิตฺวา, อิมา คาถา อภาสถ.

๓๗๓. ‘‘‘โย เม ญาณํ อปูเชสิ, ปสนฺโน เสหิ ปาณิภิ;

ตมหํ กิตฺตยิสฺสามิ, สุณาถ มม ภาสโต.

๓๗๔. ‘‘‘ตึสกปฺปสหสฺสานิ, เทวโลเก รมิสฺสติ;

สหสฺสกฺขตฺตุํ ราชา จ, จกฺกวตฺตี ภวิสฺสติ’.

๓๗๕. ‘‘สุลทฺธลาภํ ลทฺโธมฺหิ, โตสยิตฺวาน สุพฺพตํ;

สพฺพาสเว ปริญฺญาย, วิหรามิ อนาสโว.

๓๗๖. ‘‘กิเลสา ฌาปิตา มยฺหํ…เป… วิหรามิ อนาสโว.

๓๗๗. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๓๗๘. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อุเทโน เถโร อิมา คาถาโย อภาสิตฺถาติ.

อุเทนตฺเถรสฺสาปทานํ ทสมํ.

เมตฺเตยฺยวคฺโค เอกจตฺตาลีสโม.